Rẹvẹleshọnụ 9 - Ika

Isi Nke Itenẹi Opi Ẹtọ Họdụnị Lẹ Eje-mgbugbu Ahụn Opi Nke Isẹn: Igurube A Gba Kẹ Akpị

¹ Mmọn-ozi nke isẹn e gbu opi ẹ, m nọ hụn kokisẹ ohu hụn gha elu-igwee danye ụwa. Wẹ nọ ye kokisẹ hụ ịsanhan mgbugbu ahụn migbu enwẹn ẹ.

² Ọ nọ gụnpụ mgbugbu hụ migbu enwẹn ẹ, ẹnwụnrụn nọ gha ebẹhụ lọpụhama kẹ ẹnwụnrụn okẹn ọkụn wẹ gi a dụnchanpụ unyin goru, nke wụnị ẹnyanwụn lẹ ufere nọ gitọ yeni ẹnwụnrụn a.

³ Ya igurube nọ gha imẹ ẹnwụnrụn hụ banhan elu-ụwa. Wẹ nọ ye igurube ndị hụ ikẹn gi mẹ ihiẹn akpị e mẹ elu-ụwa.

⁴ Wẹ nọ sị wẹ egbulẹ ẹfịfịa rị elu-ụwa mọbụ osisi mọbụ ihiẹn-akụnkụn ọwụlẹ, ka wẹ gbu ndị ahịma Osolobuẹ rịlẹni ezimezi ihun sụọ.

⁵ A nị wẹ wẹ ye wẹ afụnfụn ọrọgbọ ifọn isẹn, kanị anịnị wẹ wẹ gbu wẹ. Wẹ gba ịhịan, ọ tụrụ kẹ ebe akpị nọ gba ịhịan.

⁶ Ogẹn ahụn, ịhịan k'a chọ ọnwụn, ahụnkọ wẹ ọnwụn; ọnwụn k'a rị a gụn wẹ, kanị ọnwụn k'a gbanị wẹ ọsọ.

⁷ Igurube ndị ahụn nọ kẹ ẹshin wẹ kwademẹgụ agha; ihiẹn nọ kẹ okpu-eze goru rịsọnmẹ wẹ isi; ihun wẹ nọ kẹ nke ịhịan.

⁸ Ntutu wẹ sue kẹ ntutu ikpoho; eze rị wẹ ọnụ nọ kẹ nke ẹwọrọ.

⁹ Obi wẹ rị kẹ igwe onyẹ-agha gi e gbọndọn obi; nku wẹ hụ a zụn ụzụn kẹ ebe ẹshin bu ọda dọkpụnkọ ụgbọ-anyịnyan zụnbankọ ọgbọ agha.

¹⁰ Wẹ nwọnsọnmẹ ọdụndụn nọ kẹ nke akpị. Ọdụndụn ahụn kẹ wẹ gi a gba ịhịan ẹdide wẹ gi a hụnjun ẹnya ọrọgbọ ifọn isẹn.

¹¹ Eze igurube ndịnị wụ eje-mmọn ahụn mgbugbu hụ migbu enwẹn ẹ rị ẹka a. Ndị Hibru a kpọ a Abadọnụ, ndị Griki a kpọ a Apolịọnụ.

¹² Nsọngbu nke ibuzọ a ghafegụọ; lee ẹ, ẹbụọ lalazị.

Opi Nke Isin: Ẹshin-mmọn E Gbuni

¹³ Mmọn-ozi nke isin e gbu opi ẹ, m nọ nụ kẹ olu gha mpịn ẹnịnọ rị ntịn ẹnịnọ ukpo nchụn-ẹjan goru hụ rị ihun Osolobuẹ rị e ku oku.

¹⁴ Olu hụ nọ sị mmọn-ozi nke isin hụn gi opi, “Tọpụ mmọn-ozi ẹnọ hụ wẹ kẹnmẹtọ okẹn iyi Yufretisi!”

¹⁵ Wẹ nọ nwan tọpụ mmọn-ozi ẹnọ hụ wẹ kwademẹtọnị ogẹn ahụn, ụhụọhịn hụ, ifọn hụ lẹ ahụa hụ — wẹ nọ nwan tọpụ wẹ nị wẹ gbupụ ụzọ ohu imẹ ịhịan ile rị elu-ụwa, gbuhọdụ ụzọ ẹbụọ.

¹⁶ Ndị-agha gi ẹshin rị ijẹri-ọhụn ọgụn-iri (200,000,000). A nụghọ m ole wẹ rị.

¹⁷ Lee kẹ m dọn hụn ẹshin ndị ahụn imẹ ọhụn ahụn m hụn: ndị rị e nyinni wẹ yisọnmẹ ihiẹn igwe wẹ gi e gbọndọn obi wẹ — hụn wẹ tekwama ihiẹn e nwun kẹ ọkụn lẹ ihiẹn e nwun bru-bru lẹ ihiẹn e nwun kẹ nsịn-ẹnyanwụn. Isi ẹshin ndị hụ rị kẹ nke ẹwọrọ. Ọkụn lẹ ẹnwụnrụn lẹ nsịn-ẹnyanwụn hụ a gha wẹ ọnụ a pụha.

¹⁸ Ya wẹ nọ gi eje-ihiẹn ẹtọ hụ rị a gha ẹshin ndị hụ ọnụ a pụha, hụn wụ ọkụn lẹ ẹnwụnrụn lẹ nsịn-ẹnyanwụn, gbupụ ụzọ ohu imẹ ịhịan ile rị elu-ụwa, gbuhọdụ ụzọ ẹbụọ.

¹⁹ Ọnụ ẹshin ndị ahụn lẹ ọdụndụn wẹ kẹ ikẹn ẹshin ndị hụ rịsọnmẹ. Ọdụndụn wẹ nọsọnmẹ kẹ agwọ nwọn isi, ịya kẹ wẹ gi e mẹ ịhịan ihiẹn.

²⁰ Ndị họdụ elu ụwa ihiẹn ndịnị gbulẹni ebihutọkwọnị mẹbehi eje-ihiẹn wẹ rị e mẹ — efebehini wẹ eje-mmọn lẹ mmọn goru lẹ siliva lẹ igwe-bronzu lẹ mmọn wẹ gi ọmụma lẹ osisi pịn ghalẹni e legha ụzọ mọbụ a nụ ihiẹn mọbụ e jẹn ijẹn,

²¹ egbubehini wẹ ọchụn, ebubehini wẹ nshi, akụsịnị wẹ ughẹrẹ lẹ Izun-ohin.