Rẹvẹleshọnụ 7 - Ika

Isi Nke Ẹsa Mmadụ Nnụ-uku Ọgụn-ẹsa Hụ (144,000)

¹ Ọhụn e mẹgụ, m nọ hụn mmọn-ozi ẹnọ turusọnmẹ ẹbamịn ẹnọ ụwa, e gbọndọn ufere ẹnọ hụn e fe imẹ ụwa, amamgbe ufere e ruzi elu-ụwa mọbụ ohimin mọbụ osisi ọwụlẹ.

² Ya m nọ hụn mmọn-ozi ọzọ k'ọ gha azụụn anwụn nọ a wa pụla, shikọ elu; o gi ihiẹn Osolobuẹ rị ndụn gi e ye ahịma. Ọ nọ gi okẹn olu gwa mmọn-ozi ẹnọ hụ wẹ ye ikẹn wiwi ụwa lẹ ohimin oku,

³ sị wẹ, “E ke wiwilẹ ni ụwa mọbụ ohimin mọbụ osisi ọwụlẹ; cheri ni nị ẹnyi yegụ idibo Osolobuẹ ẹnyi ahịma ezimezi ihun.”

⁴ A nụghọ m mmadụ ole wẹ ye ahịma ahụn: mmadụ nnụ ọgụn-mmẹsatọ (144,000) kẹ wẹ ye ahịma hụ imẹ ikpụlọ ile rị Izrẹlụ:

⁵ nnụ-uku mmẹbụọ (12,000) wụ ndị ikpụlọ Juda; nnụ-uku mmẹbụọ wụ ndị ikpụlọ Rubẹni; nnụ-uku mmẹbụọ wụ ndị ikpụlọ Gadị;

⁶ nnụ-uku mmẹbụọ wụ ndị ikpụlọ Asha; nnụ-uku mmẹbụọ wụ ndị ikpụlọ Naf'tali; nnụ-uku mmẹbụọ wụ ndị ikpụlọ Manasẹ;

⁷ nnụ-uku mmẹbụọ wụ ndị ikpụlọ Simiọnụ; nnụ-uku mmẹbụọ wụ ndị ikpụlọ Livaị; nnụ-uku mmẹbụọ wụ ndị ikpụlọ Isaka;

⁸ nnụ-uku mmẹbụọ wụ ndị ikpụlọ Zẹbulọnụ; nnụ-uku mmẹbụọ wụ ndị ikpụlọ Josẹfụ; nnụ-uku mmẹbụọ wụ ndị ikpụlọ Bẹnjamini.

Igunrun Ghasọnmẹ Alị Ile Pụha

⁹ Ọhụn e mẹgụ, m nọ lee ẹnya, hụn igunrun hi-ogbe, hụn o mẹ ni onwọnni onyẹ saẹka gụn wẹ. Wẹ ghasọnmẹ alị ile, ebọn ile, ndị ile, lẹ asụsụ ile pụha. Igunrunni turu ihun ukpo-eze hụ lẹ ihun Nwa-ebulu hụ. Wẹ ile yi ẹwuru ọchan tueru alị. Onyẹ-onyẹ gi iguru ẹka.

¹⁰ Wẹ hụ e gi okẹn olu e yi oro, a sị, “Nzụọpụha wụ nke Chuku ẹnyi, Onyẹ hụn nọdị ukpo-eze lẹ nke Nwa-ebulu hụ.”

¹¹ Ndị mmọn-ozi ile turusọnmẹ ebẹhụ, fihunmẹ ukpo hụ lẹ ndị-isi hụ lẹ ihiẹn ẹnọ hụ rị ndụn; wẹ nọ kụ isi alị, fe Osolobuẹ,

¹² a bụ ẹbụnị: “Isẹẹ! Ịja-mma lẹ ọghọ lẹ amamihiẹn lẹ ekele lẹ mgbaye lẹ ikẹn lẹ akwanran wụ nke Chuku ẹnyi jẹnrin ejẹn! Isẹẹ!”

¹³ Ya kẹ onyẹ ohu imẹ ndị-isi hụ nọ sị m, “Elee ndị wụ ndịnị yi ẹkwa ọchan tueru alị? Ebe wẹ gha bịa?”

¹⁴ M nọ sị a, “Diọkpa, ịyụ marịn ndị wẹ wụ.” Ọ nọ sị m, “Ndịnị gha okẹn ukpokpo hụ pụha. Wẹ gi ẹdeke Nwa-ebulu hụ sụ ẹwuru wẹ, wẹ nọ họnrin ẹkwa-ọchan.

¹⁵ Ya haịn wẹ gi rị ihun ukpo Osolobuẹ e fe ẹ uhinhin lẹ efinnaị imẹ Ụlọ-nsọ a. Osolobuẹ, Onyẹ hụn rị ukpo-eze, k'a nọyeni wẹ, e che wẹ nche.

¹⁶ Ẹgụn ihiẹn-oriri lẹ ihiẹn-ọrịra agụnkọzị wẹ. Kẹ anwụn kẹ ihiẹn ọwụlẹ a nụ ọkụn amakọzị wẹ.

¹⁷ Makẹni Nwa-ebulu ahụn rị etintinnaị ebẹhụ ukpo hụ rị k'a wụrụ onyẹ-ndu wẹ: o k'e du wẹ shi isi-mirin mirin e ye ndụn. Chuku jẹnkọ d'e finchanpụ wẹ ẹnya-mirin ile.”