Rẹvẹleshọnụ 5 - Ika

Isi Nke Isẹn Nwa-ebulu Osolobuẹ Hụ Sụọ Ru Ogo

¹ M nọ hụn ẹhụhụọ ẹka-nni onyẹ hụ rị ukpo-eze. Wẹ dejun ẹkụkwọ hụ ihiẹn ihun lẹ azụụn, fịfịma, gi eriri ẹsa kẹnmẹ ẹ.

² M nọ hụnzị mmọn-ozi ohu kin akwanran k'o gi okẹn olu e yi, “Onyẹ furu hụn k'a tọpụ eriri ndị hụ, fịfịpụ ẹkụkwọ hụ?”

³ Kanị, onwọnni onyẹ rị elu-igwee mọbụ elu-ụwa mọbụ okpuru ụwa s'ẹka fịfịpụ ẹkụkwọ hụ mọbụ lee ẹnya imẹ ẹ.

⁴ M nọ kwanma ọda-ọda, makẹni onwọnni onyẹ wẹ hụn furu hụn k'a fịfịpụ ẹkụkwọ hụ mọbụ lee ẹnya imẹ ẹ.

⁵ Ya kẹ onyẹ ohu imẹ ndị-isi hụ nọ sị m, “Akwanzilẹ! Lee ẹ, Ẹwọrọ ebọn Juda, Mkpọgụn Defidi, e mẹrigụọ; ya furu hụn a tọpụ eriri ẹsa ndị ahụn, fịfịpụ ẹkụkwọ hụ.”

⁶ Ya m nọ hụn Nwa-ebulu hụn nọ kẹ sị wẹ te gbu ẹ egbu; o turu etintinnaị ihun ukpo-eze hụ, ihiẹn ẹnọ hụ rị ndụn lẹ ndị-isi ẹnọ-kwasị-ọgụn hụ e fihunmẹ ẹ. Nwa-ebuluni nwọn mpịn ẹsa lẹ ẹnya ẹsa hụn wụ Mmọn ẹsa Osolobuẹ, hụn Osolobuẹ zijẹn elu-ụwa ile.

⁷ Nwa-ebulu hụ nọ jẹn d'e weri ẹkụkwọ hụ rị ẹka-nni onyẹ rị nọdị ukpo-eze.

⁸ O werigụ ẹhụhụọ hụ, ihiẹn ẹnọ hụ rị ndụn lẹ ndị-isi ẹnọ-kwasị-ọgụn hụ nọ fiẹnrin alị ihun Nwa-ebulu hụ, onyẹ-onyẹ lẹ ụbọ a lẹ afẹrẹ goru o bu hụn wẹ kpọnjun nsẹnsi. Nsẹnsini wụ ekpere ndị nke Osolobuẹ.

⁹ Ya wẹ nọ bụ ẹbụ ọhụn, sị, “Ịyụ furu hụn k'e weri ẹkụkwọ hụ, hụn k'a tọpụ eriri ndị hụ wẹ gi kẹnmẹ ẹ; makẹni wẹ gbu i, ị nọ gi ẹdeke i gbapụhanị Osolobuẹ ịhịan imẹ ebọn ile lẹ asụsụ ile lẹ ndị ile lẹ alị ile.

¹⁰ Y'e mẹgụọ wẹ wụrụnị Osolobuẹ ẹnyi alị-eze lẹ ndị nchụn-ẹjan; wẹ k'a kị elu-ụwa.”

¹¹ E lezi m ẹnya, m nọ nụ olu ndị mmọn-ozi bugbu enwẹn wẹ ọda! Wẹ fihunmẹ ukpo hụ lẹ ihiẹn ndị hụ rị ndụn lẹ ndị-isi hụ. Wẹ rị ijẹri ijẹri, nnụ-uku nnụ-uku.

¹² Wẹ hụ e gi okẹn olu a bụ, “Nwa-ebulu hụ wẹ gbu furu hụn w'a ja mma, nị ikẹn lẹ akwanran lẹ ẹfe lẹ amamihiẹn lẹ mgbaye lẹ ọghọ lẹ ọjịja-mma wụ nke ẹ!”

¹³ M nọ nụzị kẹ ihiẹn ile Osolobuẹ ke rị a bụ ẹbụ — kẹ ndị rị elu-igwee kẹ ndị rị elu-ụwa kẹ ndị rị okpuru ụwa kẹ ndị rị imẹ ohimin. Ihiẹn wẹ rị a bụ wụ: “Ọjịja-mma lẹ mgbaye lẹ ọghọ lẹ ọkịkị wụ nke Onyẹ hụ nọdị ukpo-eze lẹ Nwa-ebulu hụ — jẹnrin ejẹn!”

¹⁴ Ihiẹn ẹnọ hụ rị ndụn nọ sị, “Isẹẹ!” Ndị-isi hụ nọ fiẹnrin alị, fe Nwa-ebulu ahụn.