Rẹvẹleshọnụ 4 - Ika

Isi Nke Ẹnọ Kẹ W'e Fe Osolobuẹ Imẹ Elu-igwee

¹ Ọhụn e mẹgụ, m nọ lee ẹnya hụn ọnụmụzọ gụnpụnị imẹ elu-igwee. Olu ahụn nọ kẹ opi hụn gwa m oku mbụ nọ sị m, “Bịa elu ebeni nị m ghọsị ị ihiẹn jẹnkọ d'e mẹ ihun.”

² Ozigbo, m nọ rị imẹ-mmọn. M nọ hụn ukpo-eze imẹ elu-igwee ebẹhụ, hụnzị onyẹ ohu nọdị alị elu ẹ!

³ Onyẹ hụn nọdị alị ebẹhụ hụ e nwun ododo-ododo kẹ ihiẹn-mma wụ jaspa lẹ kanelịanị, e gbuke. Ekọn-lẹ-ogugu rị e nwun ẹhụhụọ-oyiyi ẹhụhụọ-oyiyi kẹ ihiẹn-mma wụ ẹmaradị fihunmẹ ukpo-eze hụ.

⁴ Ukpo ẹnọ-kwasị-ọgụn fihunmẹ ukpo-eze ahụn. Ndị-isi ẹnọ-kwasị-ọgụn nọdịsọnmẹ ukpo ndị ahụn. Wẹ ile yisọnmẹ ẹwuru ọchan; wẹ kpu okpu-eze wẹ gi goru mẹmẹ.

⁵ Amụma hụ a gha ukpo-eze hụ e bepụha; mirin hụ e dẹn, akpabọ hụzị a gha ukpo-eze hụ a hanpụha. Ukpẹ ẹsa rị ihun ukpo hụ e nwun — ukpẹ ẹsanị wụ Mmọn ẹsa Osolobuẹ.

⁶ Ihiẹn rịkẹ ohimin ughegbe rị e be nwaịn-nwaịn rị ihun ukpo hụ. Ihiẹn ẹnọ rị ndụn ẹnya jun ihun lẹ azụụn nọhunmẹzi ukpo-eze hụ:

⁷ nke ibuzọ rị kẹ ẹwọrọ; nke ẹbụọ rị kẹ okẹn-efin; ihun nke ẹtọ rị kẹ ihun ịhịan; nke ẹnọ rị kẹ ugọn rị e feni.

⁸ Ihiẹn ẹnọ ndịnị rị ndụn nwọnsọnmẹ nku isin-isin. Ẹnya jun wẹ ẹhụ ile — kẹ okpuru nku wẹ. W'a ra bụbehi ẹbụ, kẹ uhinhin kẹ efinnaị, a bụ, “Nsọ, nsọ, nsọ! Di-nwọnni-ẹnyi Osolobuẹ hụn nwọn ikẹn ile rị nsọ — Onyẹ hụn rị mbụ, hụn rị kikẹnni, hụn lalanị.”

⁹ Ihiẹn ẹnọ ahụn rị ndụn yegụ Onyẹ ahụn rị ndụn jẹnrin ejẹn hụn nọdị alị ukpo-eze ọghọ lẹ mgbaye lẹ ekele ẹnịna,

¹⁰ ndị-isi ẹnọ-kwasị-ọgụn ahụn e fiẹnrin alị ihun ẹ, ihun Onyẹ hụ nọdị ukpo-eze gi fe ẹ, Onyẹ ahụn rị ndụn jẹnrin ejẹn, wẹ hụ a tụ okpu-eze rị wẹ isi e ye ihun ukpo hụ, a sị,

¹¹ “Chuku-nwọnni ẹnyi, i furu onyẹ w'a ja mma makẹni ọghọ lẹ mgbaye lẹ ikẹn wụ nke i. Makẹni, ịyụ ke ihiẹn ile. Ịyụ chọ nị wẹ rị; ịyụ chọ n'ị ke wẹ.”