Rẹvẹleshọnụ 3 - Ika

Isi Nke Ẹtọ Ozi Jesu Sị Wẹ Zi Ndị Ụka Rị Sadisi

¹ “Dejẹnni onyẹ-isi ụka Sadisi, sị a: “Lee ihiẹn onyẹ hụ gi Mmọn ẹsa Osolobuẹ lẹ kokisẹ ẹsa hụ ku: a marịnghọ m ihiẹn ị rị e mẹ. W'e weri i kẹ onyẹ rị ndụn, kanị y'a nwụnhụngụọ!

² Tẹnhin nwan n'i dọnzi ihiẹn họdụnị rị a chọ n'ọ nwụnpụ n'o kẹnrẹn, makẹni ahụnnị m ebe ọrụn ị nọ zu oke ẹnya Chuku m.

³ Nyanhan nwan ihiẹn wẹ kuzi i lẹ ihiẹn i nụ; mẹ ẹ, bihutọ ẹka. Omẹni y'e tẹnhinni, m k'a bịa d'e kunrun i idẹnmizi kẹ ohin, y'a marịnkọ ogẹn m'e gi banhan!

⁴ “Kanị, o nwọnghọ ndị bulẹni ọda rị Sadisi kelẹni ru ẹkwa wẹ unyin. Wẹ jẹnkọ d'e yi ẹkwa ọchan sọn m e jẹnhunmẹ, makẹni wẹ furu efuru.

⁵ Onyẹ hụn mẹrini k'e yi ẹkwa ọchan; onwọnni ogẹn m'e gi finchanpụ ẹfan a imẹ ẹkụkwọ ndụn-itẹbitẹ! M k'a nọ idẹnya Nẹdi m lẹ ndị mmọn-ozi ẹ kpọ ẹfan hụnyẹ, ku oku ẹ ọhụnma.

⁶ Onyẹ nwọn ntịn ya nụ ihiẹn Mmọn-nsọ rị a gwa ụka rị ichẹn-ichẹn!

Ozi Jizọsị Sị Wẹ Zi Ndị Ụka Rị Filadefịa

⁷ “Dejẹnni onyẹ-isi ụka Filadefịa, sị a: “Lee ihiẹn onyẹ hụ rị nsọ ku, onyẹ ezioku; onyẹ hụ gi ịsanhan Defidi; onyẹ hụ wẹ ghalẹni a saẹka a gụnma ụzọ ọ gụnpụ mọbụ gụnpụ ụzọ ọ gụnma: ọ sị,

⁸ “A marịnghọ m ihiẹn ị rị e mẹ. Lee ẹ, a gụnpụgụọnị m'ị ụzọ hụn o mẹ ni onwọnni onyẹ k'a saẹka gụnman'a, makẹni, ọsụọn'a nị y'e nwọnkẹni ndụn, ị hụkwọ e mẹ ihiẹn m ku, y'a zabehini ẹfan m.

⁹ “Lee ẹ! M k'e wẹhẹ ndị ụlọ-ofufe Ekwensụ ahụn, ndị ntụ ahụn a kpọ enwẹn wẹ ndị Ju bụ ẹlẹ wẹ ndị Ju, a bịa wẹ ụkụ ị d'a kụnị ị isi alị, kẹni wẹ hụn ụzọ marịn nị ihiẹn i sụọ m.

¹⁰ Makẹni y'e dingbuọlẹ ihiẹn ile kẹ m dọn gwa ị, anịkọ m afụnfụn lalanị wẹ jẹnkọ d'e gi lele ndị ile rị elu ụwa ru i ẹhụ.

¹¹ M lala ẹgwa, kwọnkẹnmẹ nwan hụn i gi, amamgbe w'a napụ ị ugọn m jẹnkọ d'e tu i.

¹² Onyẹ hụn mẹrini kẹ m k'e gi họnrin adansụn imẹ Ụlọ-nsọ Osolobuẹ m, ọ pụkọzị ebẹhụ kaka! M k'e de ẹfan Osolobuẹ m lẹ ẹfan Jerusalẹm ọhụn wụ obodo uku Osolobuẹ m ye ẹ ẹhụ, Jerusalẹm hụn k'a gha elu-igwee lẹ ẹka Osolobuẹ m bịa; m k'e dezikwọ ẹfan ọhụn m ye onyẹ ahụn ẹhụ.

¹³ Onyẹ nwọn ntịn ya nụ ihiẹn Mmọn-nsọ rị a gwa ụka rị ichẹn-ichẹn!

Ozi Jesu Sị Wẹ Zi Ndị Ụka Rị Laodishia

¹⁴ “Dejẹnni onyẹ-isi ụka Laodishia, sị a, “Lee ihiẹn onyẹ hụ wụ Isẹẹ — Ọshẹri ahụn wụ onyẹ ezioku furu wẹ gi e dọn ẹnya; Onyẹ hụ ihiẹn ile Osolobuẹ ke gha ẹka a bịa: ọ sị,

¹⁵ A marịnghọ m ihiẹn ị rị e mẹ: y'a nụnị ọkụn, y'a jụnị oyi. K'ọ rị m, ị hụ a nụ ọkụn mọbụ a jụ oyi!

¹⁶ Kanị, makẹni i mẹ ṅanran: y'a nụnị ọkụn, y'a jụnị oyi, m'e d'a jụpụ ị kẹ ẹsọn!

¹⁷ “Ị hụ a sị, ‘M wụ ọdanfịn, e hiọlẹ m ọdanfịn, onwọnzini ihiẹn a kọnị m.’ Kanị, y'a marịn n'o nwọnni kẹ ọ han ị, nị y'e rugụọdẹ ihiẹn a gba ẹnya-mirin, nị ogbẹnnyẹ k'ị wụ, nị ị wụ ẹnya-mpịn, nị ị gba ọtọ!

¹⁸ M rị nwan a dụn ị ọdụn: ṅọnnarịn m ezigbo goru unyin rịlẹni, kẹni i hụn ụzọ wụrụ ọdanfịn nke-esi; ṅọnnarịn m ẹkwa ọchan yiri amamgbe w'a hụn ọtọ ị ahụn e mẹ ifẹnrẹn; ṅọnnarịnzị m ọgụn-ẹnya tụnye ẹnya, kẹni i leghama ụzọ.

¹⁹ “Ndị ihiẹn wẹ sụọ m kẹ m'a jụgbọ, a fịan mkpịnsịn. Mẹ ngwa bihutọ ẹka.

²⁰ “Lee ẹ, m turu nwan ọnụmụzọ a dụ ẹka, onyẹ nụ olu m gụnpụ ụzọ, a banhan m d'e kunrun ẹ, e sọn m'ẹ ri, o sọn m ri.

²¹ Onyẹ mẹri, a nị m'a sọn m nọdị ukpo-eze m, kẹ mmẹ nwẹn dọn mẹri, sọn Nẹdi m nọdị ukpo-eze ẹ.

²² Onyẹ nwọn ntịn ya nụ ihiẹn Mmọn-nsọ rị a gwa ụka rị ichẹn-ichẹn!”