Rẹvẹleshọnụ 22 - Ika

Isi Nke Ẹbụọ-kwasị-ọgụn Iyi Mirin Ẹ E Ye Ndụn

¹ Ya mmọn-ozi hụ nọ ghọsị m iyi hụn mirin ẹ e ye ndụn. Ọ hụ e nwun zaị kẹ ughegbe; ukpo-eze Osolobuẹ lẹ Nwa-ebulu ahụn k'ọ rị a gha e hupụha.

² O hukọ ahanmahan ụwaya ahụn rị obodo hụ. Osisi ahụn e ye ndụn rị iyi hụ azụụnnị lẹ azụụnnị. Osisi ahụn a mị ụdị mkpụrụ mmẹbụọ ahụa. Ifọn-ifọn kẹ ọ mị mkpụrụ. Wẹ gi ẹhụhụọ a a zụọ ndị alị ile emu.

³ Ihiẹn wẹ bụ ọnụ arịkọzị. Kama, ukpo-eze Osolobuẹ lẹ Nwa-ebulu hụ k'a rị imẹ obodo hụ; idibo ẹ k'a rị e fe ẹ.

⁴ Wẹ k'a gha a hụn ihun ẹ; ẹfan a k'a rị wẹ ezimezi ihun.

⁵ Eki egikọzị; achọkọzị wẹ ukpẹ-ẹka mọbụ ukpẹ ẹnyanwụn, makẹni Di-nwọnni-ẹnyi wụ Osolobuẹ jẹnkọ d'a wụ ukpẹ wẹ. Wẹ k'a kị jẹnrin ejẹn.

Ọbịbịa Jesu

⁶ Mmọn-ozi hụ nọ sị m, “Ihiẹn ndịnị ile wụ ezioku furu wẹ gi e dọn ẹnya, makẹni Di-nwọnni-ẹnyi lẹ enwẹn ẹ, Chuku hụn a gwa mmọn rị imẹ ndị-amụma ihiẹn ndị-amụma e ku, zihẹ nwan mmọn-ozi ẹ d'a ghọsị idibo ẹ ihiẹn ndị k'e mẹrịrị ẹgwa.”

⁷ Jesu sị, “Lee ẹ, m lala ẹgwa! Ngọzi rịnị onyẹ k'e mẹ ihiẹn ozi rị ẹkụkwọnị ku!”

⁸ Mmẹ wụ Jọnụ gi ntịn m nụ ihiẹn ndịnị, gi ẹnya hụn wẹ. Ogẹn m gi nụgụ wẹ, hụngụ wẹ, m nọ dan alị nị m kụnị mmọn-ozi ahụn ghọsịnị m wẹ isi alị.

⁹ Kanị ọ nọ sị m, “Emẹkwọlẹ a! M wụ odibo nọkẹ ịyụ lẹ umunẹ i wụ ndị-amụma lẹ ndị e mẹ ihiẹn ozi rị imẹ ẹkụkwọnị ku. Fe Osolobuẹ!”

¹⁰ Ọ nọzị sị m, “Ezuemẹlẹ ihiẹn ozi rị imẹ ẹkụkwọnị ku, makẹni, ogẹn wẹ k'e gi mẹ a rịgụọ nsue.

¹¹ Onyẹ e mẹ njọ ya mẹsọnmẹ; onyẹ e bi eje-obibi ya bisọnmẹ; onyẹ ezi-omumẹ ya mẹsọnmẹ; onyẹ rị nsọ ya rịsọnmẹ.”

¹² Jesu sị, “Lee ẹ, m lala ẹgwa, m gi ụgwọ-ọrụn m k'a kụ lala d'a kụ onyẹ-onyẹ ihiẹn ọ rụn.

¹³ Mmẹ wụ Afa lẹ Omega, Ibuzọ lẹ Ikpanzụụn, Mbidọn lẹ Ọgụgụ.”

¹⁴ Ngọzi rịnị ndị ahụn sụ ẹkwa wẹ, kẹni wẹ nị wẹ ri mkpụrụ osisi ahụn e ye ndụn, kẹni wẹ gha ọnụ-mgbọn hụ banye imẹ obodo hụ.

¹⁵ Makẹni ndị e bi kẹ nkitẹ, ndị nshi-lẹ-ẹjan, ndị ughẹrẹ, ndị-izighẹ, ndị a rụa mmọn lẹ onyẹ ọwụlẹ e mẹ mọbụ a kwadọn ihiẹn ya lẹ ntụ wị abanyekọ obodo hụ.

¹⁶ “Mmẹ wụ Jesu zi mmọn-ozi m d'e zi ụnụ ozini, kẹni o ru ụka ichẹn-ichẹn ẹka. Mmẹ wụ mkpọgụn Defidi gha suepụha; m ghazịkwọ ẹhụ Defidi pụha. Mmẹ wụ kokisẹ ụtụntụn ahụn e keni.”

¹⁷ Mmọn-nsọ lẹ okpoho hụ ya lẹ Jesu jẹnkọ d'a gba ẹkụkwọ sị, “Bịa!” Onyẹ ọwụlẹ nụnị ya sịzị, “Bịa!” Onyẹ ọwụlẹ ẹgụn-mirin rị a gụn ya bịa! Onyẹ ọwụlẹ chọnị, ya weri mirin ahụn e ye ndụn, ya weri ẹ ọfẹ ra.

Oku Wẹ Gi Dọ Ẹka-ntịn!

¹⁸ M rị a gwakwọ onyẹ ọwụlẹ nụ ihiẹn ndị wẹ ku imẹ ozi rị ẹkụkwọnị nị onyẹ becheni wẹ, Osolobuẹ e bechen'ẹ afụnfụn ndị hụ wẹ ku oku wẹ imẹ ẹkụkwọnị;

¹⁹ onyẹ wepụ ihiẹn imẹ wẹ, Osolobuẹ e wepụ ihiẹn run'ẹ imẹ osisi hụ e ye ndụn hụn wẹ kusọnmẹ oku ẹ imẹ ẹkụkwọnị lẹ obodo nsọ ahụn wẹ kusọnmẹ oku ẹ imẹ ẹkụkwọnị.

Mmẹkin

²⁰ Onyẹ hụn ku ihiẹn ndịnị sị, “Ẹghẹẹ, m lala ẹgwa!” Isẹẹ! Jesu Onyẹ-nwọnni-ẹnyi, bịa!

²¹ Ẹfọma Jesu Di-nwọnni-ẹnyi ya rịnị ịhịan ile.