Rẹvẹleshọnụ 21 - Ika

Isi Nke Ohu-kwasị-ọgụn Elu-igwee Ọhụn Lẹ Elu-ụwa Ọhụn

¹ Ya m nọ hụn elu-igwee ọhụn lẹ elu-ụwa ọhụn, makẹni elu-igwee ibuzọ lẹ elu-ụwa ibuzọ a lagụọ. Ohimin arịzị a.

Jerusalẹm Ọhụn

² M nọ hụn obodo nsọ hụ, Jerusalẹm ọhụn, k'ọ gha ẹka Osolobuẹ imẹ elu-igwee hidanla. Ọ nọ kẹ nwagbọọ chọgụ mma agbamẹkụkwọ rị e che di ẹ.

³ M nọ nụ okẹn olu gha ukpo-eze hụ a sị, “Lee ẹ, ebe-obibi Osolobuẹ rị nwan imẹ igunrun ịhịan; o k'e bi imẹ igunrun wẹ, wẹ k'a wụ ndị nke ẹ; ya nwẹn k'a nọyeni wẹ, o k'a wụ Chuku wẹ.

⁴ O k'e finchanpụchanrịn wẹ ẹnya-mirin. Ọnwụn arịkọzị, ẹnya-mirin lẹ ẹkwan lẹ ụfụ arịkọzị, makẹni ihiẹn akan a ghafegụọ.”

⁵ Onyẹ hụ nọdị alị elu ukpo-eze hụ nọ sị, “Lee ẹ! M rị e kedọnzi ihiẹn ile!” Ọ nọ sịzị, “Detu ihiẹnni, makẹni oku ndịnị wụ ezioku lẹ oku furu w'e gi dọn ẹnya.”

⁶ Ya ọ nọ sị m, “O mẹgụọ! Mmẹ wụ Ibuzọ lẹ Ikpanzụụn, Mbidọn lẹ Ọgụgụ. Onyẹ ọwụlẹ ẹgụn-mirin rị a gụn, m k'a gha isi-mirin e ye ndụn ye ẹ mirin ọfẹ.

⁷ Onyẹ hụn mẹrini k'e nwọnhẹn ihiẹn ndịnị. M k'a wụ Osolobuẹ ẹ, ya nwẹn a wụ nwa m.

⁸ “Kanị, ndị ụjọ lẹ ndị-ghẹrẹghẹrẹ lẹ ndị rụnị; ndị-izighẹ lẹ ndị ughẹrẹ; ndị ile a gwọ eje-ọgụn; ndị a rụa mmọn lẹ ndị-ntụ ile — wẹ ile shikọ d'a rị odiyiri ọkụn lẹ nsịn-ẹnyanwụn hụ, hụn wụ ọnwụn nke mgbe ẹbụọ.”

Kẹ Jerusalẹm Ọhụn Nọ

⁹ Ya kẹ mmọn-ozi ohu imẹ wẹ ẹsa ahụn bu afẹrẹ afụnfụn ikpanzụụn ẹsa nọ bịa, sị m, “Bịa: m k'a ghọsị ị onyẹ hụ ya lẹ Nwa-ebulu hụ jẹnkọ d'a gba ẹkụkwọ, nwunyẹ Nwa-ebulu hụ.”

¹⁰ Ọ nọ buru m imẹ-mmọn shi elu ugu hi-ogbe jẹn elu, ghọsị m obodo nsọ hụ wụ Jerusalẹm k'ọ gha ẹka Osolobuẹ imẹ elu-igwee hidanla.

¹¹ Ọghọ Osolobuẹ rị a ẹhụ, ọ hụ e be nwaịn-nwaịn kẹ ihiẹn-mma ndị ahụn a kọnị, lekẹ akpụrụ jaspa, ọ hụ e nwun zaị.

¹² Mgbọn ẹ hi-ogbe, jẹn elu. Ọnụ-mgbọn mmẹbụọ k'o nwọn; mmọn-ozi ohu-ohu turusọnmẹ ọnụ-mgbọn ndị hụ. Wẹ de ẹfan ikpụlọ mmẹbụọ rị Izrẹlụ ohu-ohu ye ọnụ-mgbọn ndị ahụn.

¹³ Ọnụ-mgbọn ẹtọ-ẹtọ rịsọnmẹ ẹ ẹbamịn ẹnịnọ: ẹtọ rị ẹbamịn ọwụwa-ẹnyanwụn, ẹtọ rị ẹbamịn-ugu, ẹtọ rị ẹbamịn ndịdan, ẹtọ rị ẹbamịn ọdịdan-ẹnyanwụn.

¹⁴ Mgbọn obodo ahụn rị elu ọmụma mmẹbụọ wẹ gi gben'ẹ iyetọ. Wẹ desọnmẹ ẹfan ndị-ozi pụ-ichẹn mmẹbụọ Nwa-ebulu hụ ye ọmụma ndị ahụn.

¹⁵ Mmọn-ozi hụ gwa m oku gi ẹgbe goru wẹ gi a ma ihiẹn, hụn o k'e gi ma obodo hụ lẹ ọnụ-mgbọn ndị rịn'a lẹ mgbọn ẹ.

¹⁶ Obodo hụ wụ azụụn ẹnọ ahanmahan, usue ẹ lẹ ụshịa a han. Ọ ma obodo hụ, ọ gba ogige bọlụ nnụ-uku mmẹbụọ: usue ẹ lẹ ụshịa a lẹ ojijẹn-elu ẹ han.

¹⁷ Ọ ma mgbọn ẹ, ọ gba kubiti ẹnọ kwasị ọgụn-ẹsa (144). Mmọn-ozi ahụn ma a kẹ ịhịan dọn a ma ihiẹn.

¹⁸ Ihiẹn mma wụ Jaspa kẹ wẹ gi tụn mgbọn hụ; ezigbo goru wẹ buchelẹni ihiẹn ọzọ kẹ wẹ gi tụn obodo hụ; o nwun zaị kẹ ughegbe.

¹⁹ Ụdị ihiẹn-mma ile rị mkpa kẹ wẹ gi chọ ọmụma ndị ahụn wẹ gi mẹmẹ iyetọ mgbọn obodo hụ mma. Nke ibuzọ wụ jaspa, nke ẹbụọ wụ safaya, nke ẹtọ wụ ageti; nke ẹnọ wụ ẹmaradị,

²⁰ nke isẹn wụ ọnik'si, nke isin wụ kanelịanị; nke ẹsa wụ kraịsolaịtị, nke ẹsatọ wụ berilu nke itenẹi wụ tọpazị; nke iri wụ kraịsopresi nke mmanaị wụ jasịntị, nke mmẹbụọ wụ amitisti.

²¹ Ogbe ọmụma ohu-ohu pụ-ichẹn e gbukeni kẹ wẹ gi rụn ọnụ-mgbọn ohu-ohu imẹ wẹ mmẹbụọ. Ụwaya hụn rị imẹ obodo hụ wụ ezigbo goru wẹ buchelẹni ihiẹn ọzọ, e nwun zaị kẹ ughegbe!

²² Ahụnnị m ụlọ-nsọ imẹ obodo hụ — makẹni Di-nwọnni-ẹnyi Osolobuẹ hụn nwọn ikẹn ile lẹ enwẹn ẹ wụ ụlọ-nsọ obodo hụ, ya lẹ Nwa-ebulu hụ.

²³ Obodo hụ achọnị ukpẹ ẹnyanwụn mọbụ ifọn, makẹni ọghọ Osolobuẹ wụ ukpẹ ẹ, Nwa-ebulu ahụn wụ ukpẹ-ẹka a.

²⁴ Ukpẹ obodo ahụn kẹ alị ile k'a rị e gi e legha ụzọ, ndị-nze ụwa k'e wẹhẹsọnmẹ ihiẹn wẹ gi nwọn ọghọ imẹ obodo ahụn.

²⁵ Agụnmakọ wẹ ọnụ-mgbọn obodo hụ ebe eki rị elu bụ eki egikọ ebẹhụ.

²⁶ Wẹ k'e wẹhẹ ihiẹn ile alị ile gi nwọn ọghọ lẹ mgbaye imẹ Obodo hụ.

²⁷ Kanị onwọnni ihiẹn ọwụlẹ rụnị mọbụ onyẹ e mẹ ihiẹn Osolobuẹ a sọ mọbụ onyẹ e mẹ ihiẹn ọwụlẹ ya lẹ ntụ wị k'a banyen'ẹ. Ndị wẹ de ẹfan wẹ imẹ ẹkụkwọ ndụn-itẹbitẹ Nwa-ebulu hụ sụọ k'a banye ẹ.