Rẹvẹleshọnụ 19 - Ika

Isi Nke Mmitenẹi A Ghọghọma Wẹ Elu-igwee

¹ Ọhụn e mẹgụ, m nọ nụ olu ihiẹn nọ kẹ igunrun hi-ogbe imẹ elu-igwee, wẹ hụ e yi, “Ịja-mma ya rịnị Osolobuẹ! Nzụọpụha lẹ ọghọ lẹ ikẹn wụ nke Osolobuẹ ẹnyi,

² makẹni ọ han ezigbo eṅẹn furuni; O yeọlẹ okẹn ịgbaraja hụ afụnfụn ta ịgbaraja hụ gi ughẹrẹ ẹ wiwi ndị rị ụwa. O gbugwarịgụọ a ogbugbu o gbu idibo Osolobuẹ.”

³ Wẹ nọ sịzị, “Ịja-mma ya rịnị Osolobuẹ! Ẹnwụnrụn ọkụn wẹ kpọ ịgbaraja ahụn hụ a lọshi elu jẹnrin ejẹn!”

⁴ Ndị-isi ẹnọ kwasị ọgụn hụ lẹ ihiẹn ẹnọ hụ rị ndụn nọ fiẹnrin alị, fe Onyẹ hụn rị ukpo-eze, sị, “Isẹẹ! Ja nị Osolobuẹ mma.”

Oriri-agbamẹkụkwọ Nwa-ebulu Hụ

⁵ Olu nọ gha ukpo hụ sị, “Ja nị Chuku ẹnyi mma, ụnụ idibo ẹ ile lẹ ndị ile a tụ egun ẹ, kẹ onyẹ-uku kẹ onyẹ-nta!”

⁶ Ya m nọ nụ okẹn olu hụn nọ kẹ olu igunrun hi-ogbe, nọkẹ nke okẹn mirin rị e huni, okẹn akpara, ọ hụ a sị, “Ịja-mma ya rịnị Osolobuẹ — makẹni Di-nwọnni-ẹnyi wụ Osolobuẹ ẹnyi, onyẹ hụn nwọn ikẹn ile, rị a kị!

⁷ Nị ẹnyi ghọghọma nị, a ṅan; nị ẹnyi yemẹ ẹ ọghọ, makẹni agbamẹkụkwọ Nwa-ebulu hụ e rugụọ; nwagbọọ o k'a lụ e kọnrinọlẹ.

⁸ “E yegụọ wẹ nwagbọọ hụ ezigbo ẹkwa linẹ yiri, ẹkwa linẹ nwunni rị e gbukeni,” makẹni ẹkwa linẹ hụ rị a ghọsị ọrụn ọma ndị nke Osolobuẹ rụn.

⁹ Mmọn-ozi hụ nọ sị m, “De ihiẹnni: ‘Ngọzi a rịkakwọnị ndị hụ wẹ kpọ oriri agbamẹkụkwọ Nwa-ebulu hụ.’ ” Ọ nọzị sị m, “Ihiẹnni wụ oku Osolobuẹ nke-esi.”

¹⁰ Ya m nọ gbu osekpu ụkụ a kẹni m kụn'a isi alị. Kanị, ọ nọ sị m, “Emẹkwọlẹ a! M wụhụ odibo nọkẹ yụ lẹ umunẹ i, ndị ile kwọndọn oku Jesu. Kụ nị Osolobuẹ sụọ isi alị, makẹni ozi Jesu wụ nkọwa ihiẹn ile ndị-amụma ku.”

Onyẹ Hụn Nyinkọ Ẹshin Ọchan

¹¹ Ya m nọ hụn kẹ elu-igwee kpupụ, a hụn m ẹshin ọchan ebẹhụ; ẹfan onyẹ rị e nyinn'ẹ wụ “Onyẹ-wẹ-gi-dọn-ẹnya lẹ Ezioku.” Ọ han ezigbo eṅẹn, a lụ agha furuni.

¹² Ẹnya a hụ e nwun kẹ ọkụn. Okpu-eze bu ọda rị a isi. O nwọnzikwọ ẹfan wẹ de ẹhụ a hụn o mẹni onwọnni onyẹ marịn n'a wezụka ya sụọ.

¹³ O yi ẹwuru wẹ yọye imẹ ẹdeke. Ẹfan wẹ gi marịn a wụ “Oku Osolobuẹ”.

¹⁴ Ndị-agha elu-igwee nyinkọ ẹshin ọchan sọnkọ a. Ẹwuru wẹ wụ ezigbo linẹ ọchan nwọnlẹni nkarụ.

¹⁵ Ọpịa-agha tụnị o k'e gi mẹ alị ile ihiẹn rị a ọnụ. O k'e gi ọkpọ-igwe kị wẹ. O k'a zọkpụkpọ wẹ imẹ ebẹhụ Osolobuẹ nwọn ikẹn ile nọ e gi iwe-lẹ-ọnụma a a zọkpụkpọ ndị-njọ kẹ akpụrụ vaịnị.

¹⁶ Nzere wẹ deye elu ẹwuru ẹ lẹ ọgbọdọgbọ a wụ, “Eze ndị-nze lẹ Nna ndị wụ nna.”

Jizọsị K'e Mẹri Eje-anụ Hụ Lẹ Onyẹ Amụma-ntụ Hụ

¹⁷ Ya m nọ hụn mmọn-ozi ohu k'o turu imẹ ẹnyanwụn. Ọ nọ gi okẹn olu kpọ nnụnụ ile e fe imẹ elu oku, sị wẹ, “Bịa nị-o! Gbakikomẹ ni d'e ri oriri pụ ichẹn Osolobuẹ kpọ!

¹⁸ D'e ri ni anụ ndị-nze lẹ ndị ọkị-agha uku lẹ ndị odogun-agha; anụ ẹshin lẹ ndị e nyinni wẹ; anụ ịhịan ile — kẹ ndị nwọn enwẹn wẹ kẹ igbọn, kẹ ndị uku kẹ ndị nta!”

¹⁹ Ya kẹ m nọ hụn eje-anụ hụ lẹ ndị-nze ụwa lẹ ndị-agha wẹ ebe wẹ gbakikomẹ nị wẹ d'a lụsọn Onyẹ ahụn rị e nyin ẹshin hụ lẹ ndị-agha a ọgụn.

²⁰ Kanị wẹ nọ nwụndọn eje-anụ hụ lẹ onyẹ amụma-ntụ ahụn te rị a rụndọnni eje-anụ hụ ọrụn-atụmẹnya, onyẹ-amụma hụ gi ọrụn-atụmẹnya ndị hụ dufie ndị narịn ahịma eje-anụ hụ lẹ ndị fe hụn wẹ leri ẹ kpụ. Wẹ nọ tụ eje-anụ hụ lẹ onyẹ amụma-ntụ ahụn lẹ ndụn ye imẹ odiyiri ọkụn nsịn-ẹnyanwụn;

²¹ gi ọpịa-agha rị ọnụ onyẹ ahụn rị e nyin ẹshin ọchan gbupụ ndị họdụnị. Ya nnụnụ ile nọ gi anụ wẹ rikarị ẹfọ.