Rẹvẹleshọnụ 17 - Ika

Isi Nke Mmẹsa Okẹn Ịgbaraja Hụ Lẹ Eje-anụ Ufie Hụ

¹ Mmọn-ozi ohu imẹ wẹ ẹsa hụ gi afẹrẹ nọ bịa d'e kunrun m, sị m, “Bịa, nị m ghọsị ị afụnfụn wẹ sikọ d'e ye okẹn ịgbaraja hụ nọdị alị elu iyi bu ọda,

² okẹn ịgbaraja ahụn ndị-nze ụwa mẹ mgba a; ịgbaraja ahụn ndị ile bi elu-ụwa rị e mẹ mgba a, ọ hụ a tụ wẹ kẹ manya.”

³ Ya mmọn-ozi hụ nọ buru m imẹ mmọn shi imẹ atụ, m nọ hụn okpoho nọdị alị elu eje-anụ ohu e nwun ufie-ufie. Wẹ de ẹfan ichẹn-ichẹn wẹ gi e kuja oku Osolobuẹ jun eje-anụ ufie ahụn ẹhụ. Isi ẹsa lẹ mpịn iri kẹ eje-anụ ufie ahụn nwọn.

⁴ Okpoho hụ yisọnmẹ ẹwuru ṅanran ọda-ọda; goru lẹ ihiẹn-mma ndị ọzọ pụ-ichẹn e gbukeni lẹ ejije jun ẹ ẹhụ. O gi mkpu goru ẹka; ihiẹn w'a sọ lẹ ihiẹn ụrụ ya lẹ ịgbaraja a wị jun mkpu hụ.

⁵ O nwọn ẹfan wẹ deye ẹ ezimezi ihun w'a kọwa akọwa — ẹfan ahụn wụ “Babilọnụ Uku, Nnẹ Ndị-ịgbaraja Lẹ Ihiẹn Ile Rụnị Rị Imẹ Ụwa.”

⁶ M nọ hụn a nị ẹdeke okpoho hụ ra, ẹdeke ndị-nsọ lẹ ndị wẹ gbu makẹ oku Jizọsị, rị a tụ a kẹ manya. Okpoho hụ m hụn a tụka m ẹnya!

⁷ Kanị, mmọn-ozi hụ nọ sị m, “K'ọ rị a tụnị ị ẹnya? M k'a kọwan'ị ihiẹn okpohoni lẹ eje-anụ ufie isi ẹsa lẹ mpịn iri hụ bun'ẹ wụ.

⁸ “Eje-anụ ufie hụ ị hụn te rị mbụ; ọ rịzị a nwan; kanị, o d'a gha mgbugbu hụ migbu enwẹn ẹ pụha. Ọ pụhagụ, ọ la ntikpọ. Ogẹn ndị rị elu-ụwa k'e gi hụn kẹ eje-anụ ufie hụ pụhazị, ndị ahụn ile wẹ deyelẹni ẹfan wẹ imẹ ẹkụkwọ ndụn-itẹbitẹ ogẹn ụwa gi bidọn, o k'a tụ wẹ ẹnya. Makẹni, o te rị arị, bụ ọ rịzị a nwan, kanị ọ lalazị alala.

⁹ “Ihiẹnni chọ amamihiẹn lẹ nghọta. Isi ẹsa hụ wụ ugu ẹsa okpoho hụ nọdị elu wẹ; isi ẹsa hụ wụzị ndị-nze ẹsa.

¹⁰ Imẹ ndị-nze ẹsa hụ, isẹn a dangụọ; ohu rị nwan a kị; ọzọ rịn'a eke bịa. Kanị, ọ bịa, ọ kịhụ ẹkẹrẹ sụọ.

¹¹ “O mẹ nke eje-anụ ufie ahụn te rị mbụ hụn rịzịlẹni nwan, ịya wụ eze k'e mẹ wẹ ẹsatọ, bụ onyẹ ohu imẹ wẹ ẹsa rọ, makẹni o k'a kịdọnzi. Kanị, ogẹn o k'e gi pụhazị, ọ k'a lazịkwọ ntikpọ.

¹² “Mpịn iri hụ ị hụn wụ ndị-nze iri wẹ kelẹni kin eze. Kanị wẹ k'e kin wẹ eze, a kị wẹ mgbahunmẹ ọkụrọkụ ohu sụọ, uwẹ lẹ eje-anụ ufie ahụn.

¹³ Ihiẹn ohu kẹ wẹ iri chọkọ. Wẹ k'e gi ufiri ẹ bu ikẹn wẹ lẹ ọkịkị wẹ che eje-anụ ufie hụ ẹka.

¹⁴ Wẹ k'a lụsọn Nwa-ebulu hụ agha, kanị Nwa-ebulu hụ k'e mẹri wẹ, makẹni ịya wụ Nna ndị wụ nna lẹ Eze ndị-nze lẹzi makẹni ndị ya lẹ wẹ wị wụ ndị ọ kpọ oku, ndị ọ họrị, ndị furu wẹ gi e dọn ẹnya.”

¹⁵ Mmọn-ozi hụ nọzị sị m, “Mirin ndị ahụn ị hụn ịgbaraja ahụn nọdị alị elu wẹ wụ ndị rị ichẹn-ichẹn, igunrun ichẹn-ichẹn, alị ichẹn-ichẹn lẹ asụsụ ichẹn-ichẹn.

¹⁶ “Nke mpịn iri hụ ị hụn, ize ịgbaraja hụ k'a ban wẹ lẹ eje-anụ ufie hụ; wẹ k'a napụchanrịn a ihiẹn ile, gbarị a ọtọ, ripụ uru-ẹhụ a, kpọ a ọkụn,

¹⁷ makẹni Osolobuẹ e mẹgụọ wẹ ile e kwerigbama kẹni o gi wẹ mẹ ihiẹn ọ chọ n'o mẹ, mẹ wẹ bu ọkịkị wẹ che ẹka eje-anụ ufie hụ, d'e ru ogẹn oku Osolobuẹ e gi mẹzuchanrịn.

¹⁸ “Okpoho hụ ị hụn wụ obodo uku hụ a kịchanrịn ndị-nze rị ụwa.”