Rẹvẹleshọnụ 16 - Ika

Isi Nke Mmisin Eje-afụnfụn Ẹsa Ikpanzụụn!

¹ Ya m nọ nụ kẹ olu hannị gha imẹ Ụlọ-nsọ elu-igwee ebẹhụ gwa ndị mmọn-ozi ẹsa hụ oku, sị wẹ, “D'e hu ni iwe-lẹ-ọnụma Osolobuẹ rị imẹ afẹrẹ ẹsanị ye elu-ụwa.”

Eje-ẹtẹ Jọgbu Enwẹn Ẹ!

² Ya mmọn-ozi ibuzọ nọ jẹn d'e hu ihiẹn rị imẹ afẹrẹ a ye elu-ụwa, eje-ẹtẹ e shin, a tụrụ, nọ jun ndị ahụn ẹhụ, ndị ahụn bu ahịma eje-anụ ahụn lẹ ndị fe hụn wẹ leri ẹ kpụ.

Ihiẹn Ile Rị Ohimin A Nwụnhụn!

³ Mmọn-ozi nke ẹbụọ nọ hu ihiẹn rị imẹ afẹrẹ a ye imẹ ohimin, mirin ohimin nọ rị kẹ ẹdeke onyẹ nwụnhụnnị. Ihiẹn ile rị ndụn imẹ ohimin nọ nwụnhụn.

Iyi Lẹ Isi-mirin E Họnrin Ẹdeke!

⁴ Mmọn-ozi nke ẹtọ e hu ihiẹn rị imẹ afẹrẹ a ye imẹ iyi lẹ isi-mirin rịsọnmẹ ụwa, wẹ nọ họnrin ẹdeke.

⁵ Ya kẹ m nọ nụ kẹ mmọn-ozi mirin ile rị ẹka a sị, “Euu Onyẹ-nsọ, onyẹ hụn rị kikẹnni hụn rịzịkwọ mbụ, ihiẹn furuni k'i mẹ ebe ị nọ ye afụnfụn ndịnị.

⁶ Makẹni ẹdeke ndị-nsọ lẹ ndị-amụma rị wẹ ẹka, y'e yegụọ wẹ ẹdeke ra! Ihiẹn wẹ chọ kẹ wẹ rị nwan a hụn!”

⁷ M nọ nụ kẹ ukpo nchụn-ẹjan shịarị, sị, “Ẹghẹẹ, Chuku-nwọnni ẹnyi hụn nwọn ikẹn ile, ikpe ị ma wẹ hụ mma, ezigbo eṅẹn kẹ y'a han!”

Anwụn E D'a Magbu Wẹ!

⁸ Mmọn-ozi nke ẹnọ nọ hu ihiẹn rị afẹrẹ a ye ẹnyanwụn, mẹ anwụn ma ịhịan ọda-ọda.

⁹ Ọ ma wẹ ọda-ọda, wẹ nọ kpọma Osolobuẹ hụn rị e zihẹ afụnfụn ndịnị wẹ iyi. Egini w'ẹ rogharị, ye ẹ ọghọ.

Ishi A Gba Ụzọ Ile!!

¹⁰ Mmọn-ozi nke isẹn nọ hu ihiẹn rị imẹ afẹrẹ a ye ukpo-eze eje-anụ hụ, alị-eze eje-anụ hụ nọ gba ishi; wẹ hụ a tadẹ ire wẹ makẹ okẹn ụfụ wẹ rị imẹ ẹ;

¹¹ wẹ nọ kpọma Chuku rị elu-igwee iyi makẹ ụfụ lẹ ẹtẹ rị wẹ ẹhụ; ebihutọnị wẹ ẹka.

Iyi Yufretisi A Tahị, Họnrin Ụwaya!

¹² Mmọn-ozi nke isin e hu ihiẹn rị afẹrẹ a ye iyi uku Yufretisi, mirin ẹ nọ tahị, họnrin ụzọ ndị-nze rị ibẹka ọwụwa-ẹnyanwụn k'a ghaha.

¹³ M nọ hụn eje-mmọn ẹtọ rịsọnmẹ kẹ ẹwọ kẹ wẹ ghasọnmẹ ọnụ Dragọnụ lẹ ọnụ eje-anụ hụ lẹ ọnụ onyẹ amụma-ntụ hụ pụla.

¹⁴ Eje-mmọn ndị a rụnsọnmẹ ọrụn-atụmẹnya; uwẹ e jẹn d'a kpọgbama ndị-nze ile rị ụwa makẹ agha wẹ jẹnkọ d'a lụ Ụhụọhịn ahụn Osolobuẹ nwọn ikẹn ile kaye.

¹⁵ (Jesu sị, “Lee ẹ! M jẹnkọ d'a bịa idẹnmizi nọkẹ ohin. Ngọzi jẹnkọ d'a rịnị onyẹ k'e dọnrin ẹnya, kwọnkẹnmẹ ẹwuru ẹ, amamgbe ọ gi ọtọ ghahunmẹ, ifẹnrẹn e mẹgbu ẹ!”)

¹⁶ Eje-mmọn ẹtọ hụ nọ kpọkwama ndị-nze, wẹ ile nọ zu imẹ ebe w'a kpọ Harụ-Amagidọnụ asụsụ Hibru.

Alị E Zinzin Hụn Jọgbu Enwẹn Ẹ!

¹⁷ Mmọn-ozi nke ẹsa e hu ihiẹn rị afẹrẹ a ye imẹ ufere, okẹn olu nọ gha ukpo-eze hụ, imẹ Ụlọ-nsọ, sị, “Ọ mẹgụọ!”

¹⁸ Amụma nọ besọnmẹ, mirin nọ dẹnsọnmẹ, akpara a hansọnmẹ, alị nọ zinzin ọda-ọda. Alị ezinzintuni ẹnịna kete ịhịan bimẹlẹ ụwa — o zinzinkẹnmẹkẹ!

¹⁹ Ya kẹ obodo uku hụ nọ kebe ụzọ ẹtọ; obodo shịa ẹfọ rịsọnmẹ alị ile nọ tikpọchanrịn. Osolobuẹ a nyanhan Babilọnụ uku hụ, we mkpu hụ iwe-lẹ-ọnụma a rị ye ẹ ra kẹ manya.

²⁰ Alị ile ohimin fihunmẹ nọ fopụ; ahụnzịnị wẹ ugu ọwụlẹ.

²¹ Ẹregede ẹkwan-igwere nyịn kẹ ẹkpa simẹnti hụ a gha elu igwere a dankwasị ịhịan — ya wẹ nọ bụma Osolobuẹ ọnụ yeni ihiẹn ẹkwan-igwere ahụn rị e mẹ wẹ, makẹni o mẹshigụọ wẹ ikẹn ọda-ọda!