Rẹvẹleshọnụ 15 - Ika

Isi Nke Mmisẹn Nsọngbu Ẹsa Ikpanzụụn E D'e Bidọn

¹ Ya m nọ hụnzị ihiẹn pụ-ichẹn imẹ elu-igwee; ọnwan a tụka ẹnya: mmọn-ozi ẹsa gi eje-afụnfụn ẹsa ikpanzụụn họdụnị hụn iwe-lẹ-ọnụma Osolobuẹ k'e gi bi.

² M nọ hụn ihiẹn nọ kẹ ohimin ughegbe wẹ gwọgbama ya lẹ ọkụn, hụnzị ndị hụ mẹri eje-anụ hụ lẹ enwẹn ẹ lẹ hụn wẹ leri ẹ kpụ lẹ ahịma a. Wẹ turu mkpẹnrẹn ohimin ughegbe hụ. Wẹ gisọnmẹ ụbọ Osolobuẹ.

³ Wẹ hụ a bụ ẹbụ odibo Osolobuẹ wụ Mozizi lẹ ẹbụ Nwa-ebulu hụ: “Euu Chuku-nwọnni ẹnyi hụn nwọn ikẹn ile! Y'e mẹkẹ okẹn ihiẹn lẹ ihiẹn a tụ ẹnya! Euu, Eze alị ile! Ezioku lẹ ẹka furuni k'i gi e mẹ ihiẹn i.

⁴ Euu Osolobuẹ, onyẹ k'a sị n'ọ tụkọ egun i, n'ọ jakọ ẹfan ị mma? Ịyụ sụọ rị nsọ. Alị ile k'a bịa d'e fe i, makẹni y'a ghọsịọlẹ n'ị y'e mẹ ihiẹn furuni.”

⁵ Ọhụn a gharịgụ, m nọ hụn nị Ụlọ-nsọ, Ọdụ ahụn a shịa ẹri, hụn rị imẹ elu-igwee, gụnpụ agụnpụ.

⁶ Ndị mmọn-ozi ẹsa hụ gi eje-afụnfụn ẹsa hụ nọ gha ebẹhụ pụha. Wẹ yisọnmẹ ẹkwa linẹ nwunni rị e gbukeni, gi ihiẹn goru kẹnhunmẹ obi.

⁷ Ohu imẹ ihiẹn ẹnọ ahụn rị ndụn nọ buye ndị mmọn-ozi ẹsa hụ afẹrẹ goru ẹsa. Ihiẹn jun afẹrẹ ndị hụ wụ iwe-lẹ-ọnụma Osolobuẹ, Onyẹ hụ rị ndụn jẹnrin ejẹn.

⁸ Ẹnwụnrụn e jun ụlọ-nsọ hụ yeni ọghọ rị Osolobuẹ ẹhụ lẹ ikẹn Osolobuẹ; onwọnzini onyẹ saẹka banye Ụlọ-nsọ hụ d'e ru nị eje-afụnfụn ẹsa ahụn ndị mmọn-ozi ẹsa ahụn gi e bi.