Rẹvẹleshọnụ 12 - Ika

Isi Nke Mmẹbụọ Okpoho Hụ Lẹ Eje-anụ Uku Hụ

¹ Ya kẹ ihiẹn pụ-ichẹn nọ pụha imẹ elu-igwee: e lee okpoho yi ẹnyanwụn kẹ ẹwuru; ifọn rị a okpuru ụkụ; o kpuhụ okpu-eze kokisẹ mmẹbụọ rị.

² Ọ rị imẹ; ọ hụ a kwan makẹ imẹ rị e mẹn'ẹ — imẹ ahụn hụ e mẹ e mẹshi ẹ ikẹn.

³ Ihiẹn ọzọ pụ ichẹn nọzị pụha imẹ elu-igwee: eje-anụ hi-ogbe wụ dragọnụ; o nwun ufie-ufie. Isi ẹsa lẹ mpịn iri k'o nwọn. Okpu-eze ohu-ohu rịsọnmẹ ẹ isi ẹsa hụ.

⁴ Ọdụndụn a nọ zarị ụzọ ohu imẹ kokisẹ rị elu-igwere, tụ wẹ ye alị — ọ họdụ ụzọ ẹbụọ. Dragọnụ hụ nọ turu ihun okpoho hụ imẹ rị e mẹ, kẹni ọ ripụ nwa a hụn o gihụ mụpụha a.

⁵ Okpoho hụ nọ mụ okẹnnyẹ hụn jẹnkọ d'e gi ẹka ze kẹ ọkpọ-igwe kị alị ile. Hụn o gihụ mụpụha nwata-okẹnnyẹ hụ, wẹ nọ jụrụ nwata ahụn, we ẹ shi ebe Osolobuẹ lẹ ukpo-eze Osolobuẹ rị.

⁶ Ya okpoho hụ nọ gbashi imẹ atụ d'a nọdị ebẹhụ Osolobuẹ kwademẹn'ẹ, ebe wẹ k'a nọ e ye ẹ ihiẹn-oriri akpọhịn ọgụn-ẹtọ kwasị nnụ-ẹtọ, (1,260).

⁷ Ya wẹ nọ lụma agha elu-igwee. Mmọn-ozi wụ Maịkẹlụ lẹ ndị mmọn-ozi e sọnn'ẹ nọ lụsọn eje-anụ uku hụ wụ Dragọnụ agha, Dragọnụ lẹ ndị mmọn-ozi ẹ nọ lụsọn wẹ agha.

⁸ Kanị wẹ nọ mẹri Dragọnụ hụ, anịzịnị wẹ ya lẹ ndị mmọn-ozi ẹ nọdị elu-igwee.

⁹ Wẹ nọ tụtu Dragọnụ uku hụ ye elu-ụwa, agwọ mbụ-mbụ hụ w'a kpọ Ekwensụ, a kpọzị a Setanị, hụn e dufie ụwa ile; a tụtu wẹ kẹ ịya kẹ ndị mmọn-ozi ẹ.

¹⁰ M nọ nwan nụ okẹn olu imẹ elu-igwee, hụn rị a sị, “Nzụọpụha lẹ ikẹn lẹ alị-eze Chuku ẹnyi lẹ ọkịkị Kraịstị a a bịagụọ nwan. Makẹni a tụtugụọ wẹ onyẹ ahụn e kpe umunẹ ẹnyi ndị Itu-Kraịstị, ẹka Osolobuẹ ẹnyi uhinhin lẹ efinnaị.

¹¹ “Kanị e gi wẹ ẹdeke Nwa-ebulu hụ lẹ oku wẹ gi shịan'a ẹri mẹri ẹ; ndụn wẹ a danị wẹ, e kweridẹ wẹ nị wẹ gbu wẹ.

¹² Elu-igwee ya ghọghọma nwan; ịya lẹ ndị bi imẹ ẹ! Kanị o k'a jọnị ụwa lẹ ohimin njọ, makẹni Ekwensụ e hidangụọ d'e kunrun ụnụ. O gi okẹn olulu bịa — makẹni o marịngụọ nị ogẹn ẹ họdụ ẹkẹrẹ!”

Ekwensụ E Buhẹzi Nsọngbu Ẹ Elu-ụwa

¹³ Ogẹn Dragọnụ hụ gi hụn nị a tụtugụọ w'a ye elu-ụwa, ọ nọ chụma okpoho hụ mụ nwata-okẹnnyẹ hụ.

¹⁴ Kanị, e ye wẹ okpoho hụ nku ẹbụọ, nku ugọn uku, kẹni ọ gha ebe agwọ hụ rị fepụ, shi imẹ atụ, ebe wẹ jẹnkọ d'a nọ e ye ẹ ihiẹn-oriri ahụa ẹtọ lẹ ifọn isin.

¹⁵ Ya kẹ agwọ hụ, dragọnụ hụ, nọ gha ọnụ a hupụha mirin nọ kẹ iyi, n'o hukpu okpoho ahụn, huru ẹ,

¹⁶ kanị alị nọ yeni okpoho hụ ẹka: alị e kpupụ, luepụ mirin hụ han kẹ iyi hụn Dragọnụ hụ gha ọnụ hupụha.

¹⁷ Iwe okpoho hụ nọ we Dragọnụ hụ, ọ pụ d'a lụsọn ụmụ okpoho hụ agha — ụmụ a ndị ọzọ, ndị hụn e mẹ ihiẹn Chuku ku, e kwọnkẹnmẹ oku Jesu;

¹⁸ o turu elu ẹjan rị mkpẹnrẹn ohimin.