Rẹvẹleshọnụ 11 - Ika

Isi Nke Mmanaị Ndị Ọshẹri Ẹbụọ Hụ

¹ Ya wẹ nọ ye m ihiẹn wẹ gi a ma ihiẹn hụn nọ kẹ mkpịnsịn. Wẹ nọ sị m, “D'a ma Ụlọ-NSỌ Osolobuẹ lẹ ukpo nchụn-ẹjan, y'a gụn ndị rị ebẹhụ e fe ofufe.

² Ka amalẹ ihun-ezi Ụlọ-NSỌ, hapụ ọhụn makẹni o bugụọ a che ẹka ndị alị ọzọ. Wẹ k'a zọ obodo nsọ hụ ụkụ ọrọgbọ ifọn ẹbụọ kwasị ọgụnnaị.

³ “M k'e ye ndị ọshẹri m ẹbụọ ikẹn ku oku-Chuku, ọrọgbọ akpọhịn ọgụn-ẹtọ kwasị nnụ-ẹtọ, (1,260), wẹ k'e yisọnmẹ achọ (ahịọ) wẹ gi a kwan ịhịan.”

⁴ Ndị ọshẹrini kẹ osisi olivu ẹbụọ lẹ obu-ukpẹ ẹbụọ hụ rị ihun Onyẹ-nwọn ụwa ile rị a ghọsị.

⁵ Onyẹ chọ n'ọ mẹ wẹ ihiẹn ọwụlẹ, ọkụn a gha wẹ ọnụ pụha dụngbu ndị ahụn rị a chọ nị wẹ mẹ wẹ ihiẹn — ẹrịra kẹ onyẹ chọ n'o mẹ wẹ ihiẹn k'a dọn nwụnhụn.

⁶ Wẹ nwọn ikẹn wẹ gi a kpọkin igwere mẹ mirin ezuelẹ ọrọgbọ hụ ile wẹ rị e ku oku-Chuku. Wẹ nwọnzi ikẹn wẹ gi e mẹ mirin rị elu ụwa e họnrin ẹdeke; wẹ nwọnzikwọ ikẹn wẹ e gi mẹ ụwa ihiẹn ọwụlẹ wẹ chọ ogẹn wẹ gi chọ a.

⁷ Wẹ shịagụ ẹri wẹ, eje-anụ hụ hụn k'a gha mgbugbu hụ migbu enwẹn ẹ pụha k'a lụsọn wẹ agha, mẹri wẹ, gbu wẹ.

⁸ Ozun wẹ k'a rị ụzọ ụwaya kanị rị obodo uku hụ wẹ gi “Sodọm” lẹ “Ijiptu” marịn imẹ-mmọn, obodo ohu hụ wẹ nọ kpọgbu Di-nwọnni wẹ.

⁹ Ndị rị ichẹn-ichẹn lẹ ebọn ichẹn-ichẹn lẹ asụsụ ichẹn-ichẹn lẹ alị ichẹn-ichẹn rị elu ụwa k'a gba ozun wẹ ilee ọrọgbọ akpọhịn ẹtọ lẹ mkpikpi, anịkọ wẹ wẹ li wẹ.

¹⁰ Ndị bi ụwa k'a rị a ghọghọ, e mẹ mmẹmmẹ, e yetarị ihiẹn, nị madụ ẹbụbụọ hụ a nwụnhụn, makẹni ndị oku-Chuku ẹbụọnị te bu afụnfụn tọnị ndị ile rị elu-ụwa.

¹¹ Kanị o mẹpụ akpọhịn ẹtọ lẹ mkpikpi, Osolobuẹ nọ zihẹ ufere w'e gi rị ndụn, ọ ban imẹ wẹ, e lihi wẹ ọtọ, okẹn egun nọ bịa ndị hụnnị wẹ.

¹² Ya wẹ nọ nụ okẹn olu gha elu-igwee sị wẹ, “Bịa nị elu ebeni!” Ya wẹ nọ buli elu, orukpu e weri wẹ shi elu-igwee, idẹnya ndị-iṅẹnrẹn wẹ rị e lee wẹ ile.

¹³ Ozigbo, alị nọ zinzin ọda-ọda, azụụn ohu imẹ obodo hụ nọ tikpọ, ọ họdụ azụụn itenẹi. Alị hụ zinzinni gbu madụ nnụ-uku ẹsa (7,000). Egun nọ tụkẹnmẹ ndị họdụnị, wẹ nọ kweri nị Osolobuẹ hụn rị elu-igwee e hikẹ ogbe.

¹⁴ Nsọngbu nke ẹbụọ a ghafegụọ; lee ẹ, nke ẹtọ lala ozigbo-ozigbo.

Opi Nke Ẹsa

¹⁵ Ya mmọn-ozi nke ẹsa nọ gbu opi ẹ, m nọ nụ okẹn olu rịsọnmẹ elu-igwee rị a sị, “Alị-eze ụwa a wụrụọlẹ nke Di-nwọnni-ẹnyi lẹ Kraịstị a; o k'a kị jẹnrin ejẹn!”

¹⁶ Ya kẹ ndị-isi ẹnọ kwasị ọgụn ahụn nọdịsọnmẹ ukpo wẹ ihun Osolobuẹ nọ fiẹnrin alị, fe Osolobuẹ,

¹⁷ a bụ ẹbụnị: “Ẹnyi rị e ye i ekele, Di-nwọnni ẹnyi, Chuku hụn nwọn ikẹn ile, onyẹ hụn rị kikẹnni, hụn rịzịkwọ mbụ. Makẹni y'e gigụọ ikẹn i hi-ogbe kịma.

¹⁸ Alị ile e te kpọghọ ọnụma; kanị y'e gigụọ iwe-lẹ-ọnụma ị mẹ wẹ ihiẹn. Ogẹn y'e gi kin ndị nwụnhụnnị ikpe e rugụọ. Ogẹn y'e gi kụ idibo i ụgwọ e rugụọ nwan — idibo i ndị-amụma — lẹ ndị-nsọ lẹ ndị a tụ egun i — kẹ ndị uku kẹ ndị nta. Ogẹn y'e gi tikpọ ndị rị e tikpọ ụwa e rugụọzị!”

¹⁹ Ya kẹ Ụlọ-NSỌ Osolobuẹ nọ gụnpụ imẹ elu-igwee: e lee Ẹkpẹti-nkwerigbama Osolobuẹ ebẹhụ. Amụma nọ besọnmẹ, igwere nọ dẹnsọnmẹ, akpara nọ hansọnmẹ; alị nọ zinzin, ẹkwan-igwere nọ dan ọda-ọda.