Rẹvẹleshọnụ 10 - Ika

Isi Nke Iri Mmọn ozi Hụ Gi Ẹkụkwọ

¹ Ya m nọ hụn mmọn-ozi ọzọ kin akwanran k'ọ gha elu-igwee hidanla. Orukpu fụhunmẹ ẹ; ekọn-lẹ-ogugu rị ibe isi ẹ; ihun ẹ nọ kẹ ẹnyanwụn. Ụkụ a rị kẹ adansụn ẹbụọ wẹ gi ọkụn mẹmẹ.

² O gihụ ẹkụkwọ mẹ ẹkẹrẹ wẹ shịapụ. Ọ nọ bu ụkụ ẹka-nni ẹ che elu ohimin, bu ụkụ ẹka-ekpẹn ẹ tọ akpakalị.

³ Ọ nọ gi okẹn olu nọ kẹ olu ẹwọrọ rị e dẹnni, yi oro. Ogẹn o gi yi oro, akpara (akpabọ) ẹsa nọ han.

⁴ Akpara ẹsa ahụn a hangụ, m te nọ chọ nị m demẹ, kanị m nọ nụ olu gha elu-igwee sị, “Zuemẹ ihiẹn akpara ẹsa hụ ku, edetulẹ ẹ!”

⁵ Ya kẹ mmọn-ozi hụ m hụn turu elu ohimin lẹ akpakalị nọ weshi ẹka-nni ẹ elu zinmẹ elu-igwee,

⁶ kun ẹfan Onyẹ hụ rị ndụn jẹnrin ejẹn hụn ke elu-igwee lẹ ihiẹn ile rịn'a, ụwa lẹ ihiẹn ile rịn'a lẹ ohimin lẹ ihiẹn ile rịn'a, sị, “Ebiekọzị wẹ, kaka;

⁷ mmọn-ozi nke ẹsa gbuọlẹ opi ẹ, ihiẹn ahụn Osolobuẹ zuemẹ sikọ d'e mẹchanrịn k'o dọn gwa ndị idibo ẹ ndị-amụma.”

⁸ Olu hụ gha elu-igwee gwa m oku nọzị sị m, “Jẹn d'e weri ẹkụkwọ ahụn wẹ shịapụ hụn rị ẹka mmọn-ozi hụ ụkụ a ohu rị elu ohimin, ụkụ a ohu hụ akpakalị.”

⁹ Ya m nọ jẹn d'e kunrun mmọn-ozi hụ, sị a ye m ẹhụhụọ hụ mẹ ẹkẹrẹ. Ọ nọ sị m, “Weri ẹ ri. Ọ k'a sụọ ị ụsụọ ọnụ kẹ mirin-ẹnwụn, kanị, o k'a rụrụ ị ẹfọ.”

¹⁰ Ya m nọ narịn mmọn-ozi hụ ẹkụkwọ hụ mẹ ẹkẹrẹ ri, ọ nọ sụọ m ụsụọ ọnụ kẹ mirin-ẹnwụn, kanị, e rigụ m'a, ẹfọ nọ rụrụ m.

¹¹ Ya wẹ nọzị sị m, “I k'e buzi amụma banyeni ndị bu ọda, alị bu ọda, ndị asụsụ ichẹn-ichẹn bu ọda lẹ ndị-nze bu ọda.”