Pita Nke Ẹbụọ 3 - Ika

Isi Nke Ẹtọ Nkwa Ọbịbịa Di-nwọnni-ẹnyi

¹ Ndị nke m, ọnwan wụ ẹkụkwọ-ozi nke ẹbụọ m dejẹnni ụnụ kẹni m nyanhannị ụnụ ihiẹn, gi ẹ kpasu ezigbo iroro ụnụ,

² sị ụnụ nyanhankwọ oku ndị-amụma nsọ Osolobuẹ ku ogẹn mbụ lẹ iwu Di-nwọnni-ẹnyi wụ Onyẹ-nzụọpụha ẹnyi ye ghahanị ndị-ozi pụ-ichẹn o zihẹni ụnụ.

Ẹlẹni Di-nwọnni-ẹnyi Rị E Bie Mbie

³ Nke ibuzọ, ghọta nị nị ndị-nlelịa hụn e bi k'ọ sụọ wẹ k'a pụha ogẹn ikpanzụụn, a mụ ẹmụ,

⁴ a sị, “Elebe kẹ nkwa nwẹn o kwe n'ọ lala alala rị? Ndị nẹdi ẹnyi wẹ e bigụọ nwụnhụn kete-ele-mgbe; ihiẹn ile nọhụ kẹ wẹ rị kete wẹ kelẹ ụwa!!”

⁵ A kpachanpụgụọ wẹ ẹnya zọ nị oku-ọnụ Osolobuẹ k'o gi ke igwere hụ rị mbụ-mbụ; nị oku-ọnụ k'o gizi gha mirin mẹmẹ akpakalị, gha imẹ mirin wepụha a;

⁶ ọ nọ gizi oku-ọnụ a mẹmẹ mirin, okẹn mirin, tikpọ ụwa mbụ hụ la iwi.

⁷ Nke igwere lẹ ụwa rị ogẹnni, Osolobuẹ e gigụọzị oku-ọnụ a hụ bu wẹ dọnmẹ n'o k'a dụn wẹ ọkụn; ọ rị e che Ụhụọhịn ahụn o k'e kin ndị-njọ ikpe, tikpọ wẹ.

Di-nwọnni-ẹnyi Rị E Che Nị Ịhịan Wanahịn

⁸ Ka azọkwọlẹ ni ihiẹn ohuni, ezigbo umunẹ m: nị akpọhịn ohu nọkẹ ahụa nnụ-uku ẹnya Di-nwọnni-ẹnyi, ahụa nnụ-uku nọzị a kẹ akpọhịn ohu.

⁹ Ẹlẹni Di-nwọnni-ẹnyi rị e bie mbie imẹzu nkwa a kẹ ndị hụ dọn a ghọha ibie-mbie; mba, o gi ndidin e sọn ụnụ. Onwọnni onyẹ ọ chọ n'ọ la iwi, kama, ọ chọkọ nị ịhịan ile rogharị.

Ụhụọhịn Di-nwọnni-ẹnyi Lala

¹⁰ Kanị Ụhụọhịn Di-nwọnni-ẹnyi lala idẹnmizi nọkẹ ohin. O ru, igwere sikọ d'e gi okẹn ụzụn fopụ, ọkụn a rịnranpụ ihiẹn ile; ụwa lẹ ihiẹn ile ịhịan nọ imẹ ẹ mẹ a pụha ifọn.

¹¹ Ebe o mẹ ni wẹ k'e tikpọpụ ihiẹn ndịnị ile ẹnịna, o furu nị ụnụ e bi obibi rị nsọ, e gi egun Osolobuẹ e bi,

¹² e che Ụhụọhịn Osolobuẹ, e mẹ ẹ n'ọ bịakẹnrin, Ụhụọhịn hụ o k'a mụ ọkụn ye igwere, o dẹnpụ, ihiẹn ile a rịnranpụ.

¹³ Kanị, ẹnyi rị a tụ ẹnya igwere ọhụn lẹ ụwa ọhụn Osolobuẹ kwe nkwa a — ebe ihiẹn ile rị ọchan jẹnkọ d'e bi.

¹⁴ Ezi umunẹ m, ebe o mẹni ụnụ rị a tụ ẹnya ihiẹn ndịnị, lịlịma nị nwan nị ụnụ wụrụ ndị nwọnlẹni nkọrịanị mọbụ ebe wẹ nọ rụ ẹnya a, ndị ẹgbata ya lẹ wẹ rị mma.

¹⁵ Weri n'ẹ nị ndidin Di-nwọnni-ẹnyi wụ oghere ịhịan e gi nwọnrin nzụọpụha — kẹ ezi nwẹnẹ ẹnyi wụ Pọlụ dọnzi dejẹnni ụnụ ghahanị amamihiẹn Osolobuẹ ye ẹ.

¹⁶ Pọlụ e kusọnmẹ oku ihiẹnni imẹ ẹkụkwọ-ozi ẹ ile. O nwọnghọ ihiẹn ndị a fụ ọrụn ọghọta imẹ wẹ, hụn ndị marịnlẹni ẹnya wẹ lẹ ndị wuzolẹni ọhụnma a fịhutọ kẹ w'a fịhutọzị ihiẹn ndị ọzọ rị Ẹkụkwọ-nsọ, e gi ẹ e sehẹni enwẹn wẹ ntikpọ.

¹⁷ Ezi umunẹ m, ụnụ a marịngụọ ihiẹn ndịnị. Dọnrin ni nwan ẹnya, amamgbe mmẹfie ndị e bi k'ọ sụọ wẹ e dufie ụnụ, mẹ ụnụ ewuzozilẹ kẹ ụnụ dọn nwan wuzo.

¹⁸ Kama, gi ni ẹfọma Jesu Kristi wụ Di-nwọnni-ẹnyi lẹ Onyẹ-nzụọpụha ẹnyi e suewaye imẹ okukwe; a marịnwayezi ni Di-nwọnni-ẹnyi. Ọghọ ya rịn'a ogẹnni, rịzịkwọn'a jẹnrin ejẹn, d'e ru ụhụọhịn ikpanzụụn! Isẹẹ.