Pita Nke Ẹbụọ 2 - Ika

Isi Nke Ẹbụọ Ndị amụma-ntụ Lẹ Ndị nkuzi-ntụ

¹ Kanị o nwọnzighọ ndị amụma-ntụ rị imẹ igunrun ndị Izrẹlụ ogẹn mbụ hụ. Ẹrịra kẹ ndị nkuzi-ntụ jẹnkọ d'a rịzị imẹ ụnụ. Wẹ k'e gi nzuzue webanhansọnmẹ nkuzi-ntụ e buhẹ ntikpọ, jụdẹ Di-nwọnni-ẹnyi hụn ṅọnni wẹ, gi ẹ buhẹkẹnrinni enwẹn wẹ ntikpọ.

² Ndị bu ọda jẹnkọ d'e sọn wẹ bimẹ eje-obibi ifẹnrẹn ahụn wẹ rị e bi, ịhịan e gi ufiri wẹ kujama oku Ụzọ-ezioku.

³ Wẹ k'a gha e gi ọnụ-ọma a tụnarịn ụnụ ihiẹn ụnụ yeni ẹnya-uku wẹ. Ikpe-ọmụma lẹ afụnfụn wẹ butọnị wẹ ẹdẹi hụ a — ọ lakọ wẹ tọ; ntikpọ Osolobuẹ jẹnkọ d'e tikpọ wẹ aranhịnnị!

Osolobuẹ Ma E Ye Onyẹ-onyẹ Ihiẹn Wẹ Chọ

⁴ Ebe o mẹ ni Osolobuẹ ahatuni ndị mmọn-ozi ahụn ogẹn wẹ gi mẹ njọ, kama, ọ tụ wẹ ye ọkụn-mmọn, kpọma wẹ tọ mgbugbu rịsọnmẹ imẹ ishi ka ishi d'e ru Ụhụọhịn okinkin-ikpe;

⁵ omẹni Osolobuẹ ahatuzikwọnị ụwa mbụ ye, ogẹn hụ o gi zihẹ okẹn mirin d'e tikpọ ụwa ndị-njọ hụ, kanị ọ zụọpụha Nụa hụn a gwa wẹ bi ọhụnma lẹ madụ ẹsa ndị ọzọ;

⁶ omẹni ọ maghọ alị Sodọm lẹ alị Gomora ikpe, dụn wẹ ọkụn, e họnrin wẹ ntụn, o gi wẹ ghọsị ihiẹn jẹnkọ d'e mẹ ndị jụ oku Osolobuẹ;

⁷ omẹni Di-nwọnni-ẹnyi a zụọpụhaghọ Lọtụ onyẹ ezi-omumẹ, hụn eje-obibi ifẹnrẹn wẹ rị a fụ ọda-ọda,

⁸ makẹni hụn ahụn onyẹ ezi-omumẹ ahụn bi imẹ igunrun wẹ ụhụọhịn ile, eje-obibi wẹ ọ rị a hụn lẹ hụn ọ rị a nụ hụ a fụ imẹ obi ẹ hụn rị ọchan —

⁹ wẹ ile ghọsị nị Di-nwọnni-ẹnyi ma gbapụha ndị e fen'ẹ imẹ ọnwụnwan, e bu ndị-njọ e che imẹ afụnfụn d'e ru Ụhụọhịn okinkin-ikpe,

¹⁰ tụmadụ ndị hụn e mẹ ihiẹn ụrụ a gụnnị wẹ lẹ ndị e legberi ọkịkị. Obi ndị nkuzi-ntụ ndịnị e zekẹ, ihiẹn obi wẹ ye wẹ kẹ w'e mẹ; egun anịdẹ wẹ e kuja oku eje-mmọn.

W'e Legberi Ọkịkị, E Kuja Oku Ihiẹn Wẹ Ghọtalẹni

¹¹ Kanị, ọsụọn'a nị ndị mmọn-ozi ka e ze, ka ikẹn e nwọn, w'a ra kuja oku eje-mmọn ihun Di-nwọnni-ẹnyi.

¹² Kanị ndịnị nọ kẹ anụ-ọfịa nwọnlẹni uche, anụmanụ ghalẹni e leban ihiẹn ẹnya — hụn wẹ mụhụ nị wẹ nwụnrụn gbu. W'e kuja oku ihiẹn wẹ ghọtalẹni. Wẹ k'a la ntikpọ kẹ anụ-ọfịa dọn a la ntikpọ —

¹³ eje-ihiẹn e kunrun wẹ yeni eje-ihiẹn wẹ rị e mẹ! Ọ sụọdẹ wẹ nị w'e mẹ ihiẹn-ifẹnrẹn ebe eki rị elu. Unyin lẹ nkarụ kẹ wẹ wụ, wẹ gha e sọn ụnụ e ri Oriri, wẹ hụkwọ e mẹ ihiẹn-ifẹnrẹn wẹ ahụn.

Ihiẹn A Gụn Ẹhụ Wẹ Kẹ W'e Mẹ

¹⁴ Ughẹrẹ jun wẹ ẹnya; ẹfọ njọ ara jun wẹ. W'a rẹrẹrị ndị kelẹni wuzo ọhụnma e ye imẹ njọ. E gigụọ wẹ ẹnya-uku zụn obi wẹ. Ndị wẹ bụ ọnụ kẹ wẹ wụ!

A Kpahugụọ Wẹ

¹⁵ A latọgụọ wẹ Ụzọ rị mma kpahu, ghasọnmẹ ụzọ Balaam nwa Bioru hụn erere eje-ihiẹn a sụọ,

¹⁶ kanị Osolobuẹ nọ jụgbọ a yeni njọ a: ebe jaki ghalẹni e ku oku nọ gi olu ịhịan ku oku, hụn wẹ gi kụsị ẹra ahụn rị a pụ onyẹ-amụma ahụn.

¹⁷ Ndị nkuzi-ntụ ndịnị wụ isi-mirin tahịnị; igirigi ufere bukọ; uwẹ kẹ wẹ dọnmẹni ishi ka ishi.

A Rịzịọlẹ Wẹ Ẹgbụn

¹⁸ Ị nụ oku-ọnụ wẹ, y'e gbuni wẹ osekpu! Kanị oku wẹ enwẹn isi. W'e gi ihiẹn a la ẹnya a dọrị ndị hụnhụ isi gbapụha imẹ ndị-mmẹfie.

¹⁹ W'e kwe wẹ nkwa nị wẹ k'e weri enwẹn wẹ, kanị wẹ nwẹn wụkwọ igbọn ihiẹn rụnị: makẹni ihiẹn hụn karị ịhịan ẹka k'ọ wụ igbọn ẹ.

²⁰ Ẹghẹẹ, makẹni, wẹ gigụ ịmarịn Jesu Kristi wụ Di-nwọnni-ẹnyi lẹ Onyẹ-nzụọpụha ẹnyi wanahịngụ ihiẹn ndị e mẹrụ ịhịan ụwanị, nị a nịzị wẹ ihiẹn ndị hụ kịma wẹ, ọnọdị ikpanzụụn wẹ a kagụọ njọ karị nke ibuzọ.

²¹ O te ka wẹ mma nị amarịntudẹni wẹ Ụzọ hụ rị ọchan karị nị a marịngụ w'a, a gbakịtọ wẹ oku lẹ iwu hụ rị nsọ wẹ ye wẹ azụụn.

²² Ilu hụ wụ ezioku e mẹgụọ nwan ebe wẹ rị, “Nkitẹ e kinzi d'e ri ẹgbọ a.” Ọzọzị, “Ezin wụgụhụ ọ la ịkpọtọ d'e gu.”