Pita Nke Ẹbụọ 1 - Ika

Isi Nke Ohu

¹ Mmẹ, Simiọnụ wụ Pita, de ẹkụkwọ-ozini. M wụ igbọn Jizọsị Kraịstị; m wụzịkwọ onyẹ-ozi ẹ pụ-ichẹn. M rị e dejẹnni ndị Osolobuẹ ye ẹnyi lẹ wẹ okukwe ohu ahụn rị okẹn mkpa ghahanị ezi-omumẹ Jesu Kristi hụn wụ Osolobuẹ ẹnyi lẹ Onyẹ-nzụọpụha ẹnyi.

² Ẹfọma lẹ udọn ya rịnị ụnụ mmagi-mmagi, ebe ụnụ rị a marịnwaye Osolobuẹ lẹ Jizọsị Kraịstị wụ Onyẹ-nwọnni-ẹnyi.

Ghọsị Nị Nị Osolobuẹ Kpọ Ụnụ

³ Makẹni, o gigụọ ikẹn o gi wụ Chuku ye ẹnyi ihiẹn ile ẹnyi e gi bi elu lẹ hụn ẹnyi e gi fe Osolobuẹ. Ẹnyi e nwọnhẹn ihiẹn ndịnị ghahanị ọmarịn ẹnyi marịn Jesu hụn kpọ ẹnyi d'e sọn ẹ nwọnrin ihiẹn ile o nwọn, sọn ẹ rị ọchan.

⁴ Ihiẹn ahụn ile o nwọn lẹ ọchan ọ rị k'o gha nwan kwe ẹnyi nkwa okẹn ihiẹn rị ichẹn-ichẹn w'a chọ achọ, kẹni ụnụ gi wẹ bịa d'a rị kẹ Osolobuẹ, ebe ụnụ nọ wanahịngụ ụrụ rị imẹ ụwa lẹ ihiẹn ọlịlẹnya hụn e buhẹn'ẹ.

⁵ Ufiri ẹ, lịlịma nị nwan ụzọ ile nị ụnụ we ịrị-mma cheni okukwe ụnụ; ụnụ e we ịmarịn-ihiẹn cheni ịrị-mma ụnụ.

⁶ Wezi ni ikwọndọn-enwẹn ịhịan cheni ịmarịn-ihiẹn. E we ni ezigbo ndidin e cheni ikwọndọn-enwẹn ịhịan; ụnụ e we ibini Osolobuẹ e cheni ezigbo ndidin.

⁷ We ni obi-nwẹnẹ e cheni ibini Osolobuẹ. E nwọnzi ni ihiẹn-ọsụsụọ nwọnlẹni ihiẹn o tu e cheni obi-nwẹnẹ.

⁸ Makẹni, omẹni ụnụ hụ e nwọnwaye ihiẹn ndịnị ile imẹ ndụn ụnụ, ụnụ awụkọ ndị kwerini Onyẹ-nwọnni-ẹnyi wụ Jesu Kristi bụ onwọnni ihiẹn w'a rụnn'a, onwọnni mkpụrụ w'a mịn'a.

⁹ Nke onyẹ nwọnlẹni ihiẹn ndịnị, ẹnya e kpuọl'a ishi, ọ rịzị e legha ụzọ ọhụnma. Ọ zọgụọ nị wẹ chanpụ a njọ ndị hụn o mẹ ogẹn mbụ.

¹⁰ Umunẹ m, lịlịma nị nwan kẹni ụnụ wụsọnmẹ ndị Osolobuẹ kpọ lẹ ndị ọ họrị d'e ru isi ẹ. Makẹni, ụnụ gha e mẹ ẹrịra onwọnni ogẹn ụnụ e gi dan!

¹¹ Ụnụ jẹnkọ d'e gi ẹ ru ogo ndị wẹ k'a nabanhan ọhụnma-ọhụnma imẹ Alị-eze itẹbitẹ Jesu Kristi, Di-nwọnni-ẹnyi lẹ Onyẹ-nzụọpụha ẹnyi.

Pita Wẹ Gi Ẹnya Hụn Ọghọ Kraịstị

¹² Ya wụ, m chọ nwan nị m'a nyanhannị ụnụ ihiẹn ndịnị ogẹn ile, ọsụọn'a nị ụnụ a marịngụọlẹ wẹ; ọsụọn'a nị ụnụ e turugụọ ọhụnma imẹ ezioku hụ wẹ wẹhẹni ụnụ.

¹³ E roghọ m'a n'ọ hụghọ mma nị m'a nyanhan nị ụnụ ihiẹn ndịnị wẹ, e gi wẹ a kpọtiẹn ụnụ, hụnnị m rịkwọ ndụn imẹ ẹhụnị.

¹⁴ Makẹni, a marịngụọ m nị ogẹn m'e gi nwụnhụn gbụpụ ẹhụnị, a rịgụọ nsue, rịkẹ kẹ Di-nwọnni-ẹnyi wụ Jesu Kristi dọn ghọsị m.

¹⁵ Ẹghẹẹ, m k'a lịlịma ụzọ ile gi hụn a nị ụnụ a nyanhanzị ihiẹn ndịnị m ghagụ ụwanị pụ.

¹⁶ Makẹni ẹlẹ akịkọ ndị ma kọ akịkọ mẹmẹ kẹ ẹnyi sọnkọ ogẹn ẹnyi gi gwa ụnụ oku ikẹn hụn Osolobuẹ ẹnyi wụ Jizọsị Kraịstị gi bịa ụwanị. Mba; ẹnyi gi ẹnya ẹnyi hụn ọghọ a.

¹⁷ Chuku-Nẹdi ye Jizọsị ọghọ lẹ ikpẹn ogẹn hụ Chuku-Nẹdi gi gha elu-igwee gi olu ẹ ku oku. Olu ahụn nwọn Ọghọ ahụn Kachanrịnnị hụn sị, “Ọnwan wụ ezi Nwa m; ihiẹn ẹ a sụọka m!”

¹⁸ Ẹnyi lẹ enwẹn ẹnyi gi ntịn ẹnyi nụ kẹ oluni gha elu-igwee bịa kẹ ẹnyi lẹ ịya rị elu ugu nsọ hụ.

Kẹ Ihiẹn Rị Imẹ Ẹkụkwọ-nsọ Dọn Bịa

¹⁹ Ẹnyi gi ẹ nwan marịn nị ihiẹn ndị-amụma ku imẹ Ẹkụkwọ-nsọ furu wẹ gi e dọn ẹnya. Ọ ka ụnụ mma nị ụnụ gi wẹ e dọn, nọkẹ ukpẹ ẹka rị e nwun imẹ ishi, d'e ru ni eki e fọn, Onyẹ ahụn wụ Kokisẹ-ụtụntụn e timẹ imẹ obi ụnụ.

²⁰ Ka ghọtakwọ nị ihiẹn ohuni: nị onwọnni ihiẹn wẹ ku mọbụ de imẹ Ẹkụkwọ-nsọ hụn wẹ gi uche ịhịan ku mọbụ a kọwa;

²¹ makẹni, onwọnni ihiẹn rị imẹ Ẹkụkwọ-nsọ gha uche ịhịan pụha. Kama, Mmọn-nsọ nu ndị kuni, wẹ nọ ku ihiẹn gha ebe Osolobuẹ rị bịa.