Pita Ibuzọ 4 - Ika

Isi Nke Ẹnọ Obibi Ndị Rogharịgụnị

¹ Ebe o mẹni Jizọsị ta afụnfụn elu-ụwanị, bu n'ẹ nwan obi nị ụnụ nwẹn jẹnkọ d'a ta afụnfụn. Makẹni, onyẹ gi ẹhụ a a tanị Kraịstị afụnfụn imẹ ndụnnị a jụgụọ njọ.

² Ara bizi k'ọ rị a; kama, o bi ndụn a họdụnị elu-ụwa n'o mẹ uche Osolobuẹ.

³ Ẹghẹẹ, nị ụnụ e tuhuọlẹ ogẹn ọda-ọda ogẹn ụnụ gi rị e bi kẹ ndị ghalẹni e fe Chuku, e bi obibi ifẹnrẹn, adụdụ eje-ihiẹn hụ a dụ ụnụ, ụnụ hụ a ra manya a tụ, e mẹ eje-mmẹmmẹ, e jẹn ọgbọ manya, a rụa mmọn ụnụ a marịnzị hụn ụnụ rụakọ.

⁴ Ọ tụka wẹ nwan ẹnya nị ụnụ arịzị e sọn wẹ e bi obibi ahụn la iwi; wẹ rị nwan e gi ẹ e kuja oku ụnụ.

⁵ Kanị wẹ jẹnkọ d'a gwa Osolobuẹ kẹ wẹ jẹn, Osolobuẹ hụn rị nwan e che n'o kin ndị rị ndụn lẹ ndị nwụnhụnnị ikpe.

⁶ Ọnwan haịn wẹ gi zidẹ ndị nwụnhụnnị oziọma, kẹni wẹ hụn ụzọ rịnị Osolobuẹ ndụn imẹ-mmọn, ọsụọn'a nị a narịngụọ wẹ ikpe-ọmụma, nwụnhụn kẹ ịhịan.

Kẹ Wẹ Dọn A Rụn Ọrụn Osolobuẹ

⁷ Ihiẹn ile e d'e bi. E kwọndọn ni nwan enwẹn ụnụ, e dọnrin ẹnya makẹ ọdakin gha a rị ekpere ụnụ.

⁸ Hụn kachanrịn mkpa, e nwọn ni ihiẹn-ọsụsụọ ibe ụnụ ọda-ọda, makẹni ihiẹn-ọsụsụọ e kpumẹ njọ bu ọda.

⁹ A nabanhan nị ibe ụnụ iwe ụnụ, endẹnwịnwịnlẹ ni.

¹⁰ Onyẹ-onyẹ imẹ ụnụ ya gi oyiye Osolobuẹ ye ẹ e yeni ibe ẹ ẹka, rịkẹ ndị ma kwọndọn oyiye ichẹn-ichẹn Osolobuẹ ye.

¹¹ Onyẹ e kuni, ya ku kẹ onyẹ Osolobuẹ gi ẹ e ku; onyẹ e jẹn ozi ya mẹ ẹ kẹ onyẹ Osolobuẹ rị e ye ikẹn: kẹni wẹ e gi ihiẹn ile e ye Osolobuẹ ọghọ ghahanị Jesu Kristi. Ọghọ lẹ ikẹn ile wụ nke ẹ jẹnrin ejẹn. Isẹẹ.

Ịta-afụnfụn Nọkẹ Onyẹ Nke Kraịstị

¹² Ndị rị m obi, anịkwọlẹ ni okẹn afụnfụnnị wẹ gi rị e lele ụnụ tụ ụnụ ẹnya nọkẹ sị ihiẹn mẹtulẹni rị e mẹ ụnụ.

¹³ Ka ghọghọma nị, makẹni ụnụ rị e sọn Kraịstị a ta afụnfụn a; kẹni ụnụ hụn ụzọ ghọghọ, ghọghọ ọhụnma-ọhụnma, mgbe ọghọ a k'a pụhachanrịn ifọn.

¹⁴ Wẹ kpari ụnụ makẹni ụnụ rị a za ẹfan Kraịstị, ngọzi rọ: ya wụ nị ọghọ Mmọn nsọ Osolobuẹ rị ụnụ ẹhụ.

¹⁵ Ka emẹkwọlẹ ni ndị rịhụ a ta afụnfụn eje-ihiẹn wẹ mẹ — nọkẹ ndị e gbu ọchụn mọbụ ndị ohin mọbụ eje-ịhịan mọbụ ndị a chọ “ẹnya-m-ru”.

¹⁶ O mẹ nwan nị ị ta afụnfụn makẹ Kraịstị, y'e mẹlẹ i ifẹnrẹn, ka ja Osolobuẹ mma n'ị rị a za ẹfan Kraịstị.

¹⁷ Makẹni, o ruọlẹ ogẹn okinkin-ikpe e gi bidọn imẹ ụlọ Osolobuẹ. Omẹni ọ gha ẹka ẹnyi bidọn, kịnị k'e mẹ ndị nupụ isi okpuru oziọma Osolobuẹ?

¹⁸ Ọzọzị, “Omẹni nzụọpụha fụ ndị ezi-omumẹ ọrụn, kị k'e mẹ ndị ghalẹni e fe Osolobuẹ lẹ ndị-njọ?”

¹⁹ Ya wụ, ndị rị a ta afụnfụn makẹni wẹ rị e mẹ uche Osolobuẹ, wẹ mẹsọnmẹ nwan mma, we enwẹn wẹ che ẹka Onyẹ-okike hụn furu wẹ gi dọn ẹnya.