Pita Ibuzọ 3 - Ika

Isi Nke Ẹtọ Di Lẹ Nwunyẹ

¹ Nwunyẹ, mẹzikwọ ẹrịra. E humẹni di i isi, kẹni, omẹdẹni di ekwerini oku Osolobuẹ, ezigbo omumẹ nwunyẹ ẹ a dọbanhan a imẹ Osolobuẹ bụ onwọnni oku wẹ gwa a;

² makẹni ọ hụ a hụn kẹ i dọn rị e bi obibi rị nsọ, e gi egun Osolobuẹ e bi.

³ Anịlẹ ni mma ụnụ wụrụ nke ẹhụ, mma ịchọ ntutu mma lẹ iyi goru lẹ iyi ẹkwa ma mma.

⁴ Ka nị nị mma ụnụ wụrụ mma imẹ obi, mma ahụn ghalẹni a fapụ, mma imẹ-jụụ lẹ ịwụ-ọmẹhẹn, hụn rị mkpa ọda-ọda ẹnya Osolobuẹ.

⁵ Ẹnịna kẹ ikpoho rị nsọ gi Osolobuẹ dọn ẹnya dọn chọ enwẹn wẹ mma mbụ-mbụ, e humẹni di wẹ isi.

⁶ Ẹrịra kẹ Sẹra dọn gbaye Ebraham, a kpọ a “nna m.” Ụmụ a ikpoho kẹ ụnụ wụ omẹni ụnụ e mẹsọnmẹ ihiẹn rị mma, nị ụnụ anịnị egun mẹri ụnụ.

⁷ Di, ẹrịra kẹ i k'e gizi uche e sọn nwunyẹ i nọkẹ onyẹ marịn nị ikpoho ka alụlụa a rị; e ye ẹ ọghọ makẹni o nwọnzikwọ ndụn ọhụn ahụn Osolobuẹ e ye ọfẹ kẹ yụ nwẹn. E mẹ ni ẹnịna makẹ ọdakin gha a rị ekpere ụnụ.

Ịta-afụnfụn Makẹni I Mẹ Ihiẹn Rị Mma

⁸ Nke ikpanzụụn, ụnụ ile, e gi ni obi ohu e bi; e ro ni k'ọ rị ibe ụnụ; a nị nị ihiẹn ibe ụnụ a sụọ ụnụ kẹ umunẹ; e mẹni omikẹn ibe ụnụ; e welụa nị enwẹn ụnụ alị.

⁹ Emẹgwarịkwọlẹ ni ịhịan eje-ihiẹn mọbụ kpọgwarị wẹ iyi. Kama, gọzi ni wẹ, makẹni ngọzi kẹ Osolobuẹ kpọ ụnụ d'e weri.

¹⁰ Makẹni Ẹkụkwọ-nsọ sị, “Onyẹ chọ ndụn, onyẹ chọ nị elu ẹ rị mma, ya wepụ eje-oku ire ẹ; ya wepụzịkwọ oku e dufieni ụgb'ọnụ a.

¹¹ Ya gbakịtọ eje-ihiẹn azụụn — mẹmẹ ihiẹn rị mma; ya chọma udọn, chụsọnmẹ ẹ.

¹² Makẹni, ẹnya rị mma kẹ Di-nwọnni-ẹnyi e lee ndị e mẹ ihiẹn ọ chọ, ntịn a rịzịkwọ ekpere wẹ. Kanị, eje-ẹnya k'o lee ndị e mẹ eje-ihiẹn.”

¹³ Onyẹ k'a sa ẹka mẹ ụnụ ihiẹn ọwụlẹ omẹni ụnụ wụ ndị ihiẹn rị mma a dụ omumẹ?

¹⁴ Ọsụọn'a nị ụnụ ta afụnfụn makẹ ezi-omumẹ, ya wụ nị ndị Osolobuẹ gọzi kẹ ụnụ wụ. Atụlẹ ni nwan egun wẹ; emẹhunmẹlẹ ni.

¹⁵ Ka yechanrịn nị Kraịstị ọnọdị a imẹ obi ụnụ nọkẹ Di-nwọnni ụnụ, ụnụ a kwademẹ ogẹn ile nị ụnụ a za onyẹ ọwụlẹ jụ ụnụ oku olilẹnya ụnụ.

¹⁶ Ka e gi ni nwayọ lẹ mgbaye e mẹ ẹ. E dọnmẹ ni obi ụnụ ọchan, kẹni ifẹnrẹn mẹ ndị hụn e kuja ihiẹn rị mma ụnụ rị e mẹ imẹ Kraịstị.

¹⁷ Ọ ka mma nị ịhịan mẹ ezi-omumẹ, ta afụnfụn omẹni uche Osolobuẹ rọ, karị nị ịhịan mẹ eje-ihiẹn.

¹⁸ Makẹni, Kraịstị gi ufiri njọ tazịkwọ afụnfụn, nwụn, (mgbe ohu k'ọ nwụn, ọ nwụnkọzị), Onyẹ rị ọchan hụn nwụnnị ndị njọ ọnwụn — kẹni ọ hụn ụzọ wẹhẹ ẹnyi ile ebe Osolobuẹ rị. Wẹ gbu ẹ, ọ nwụnhụn kẹ ịhịan, kanị Chuku nọ mẹ mmọn a rị ndụn,

¹⁹ ọ nọ jẹn d'e zi ndị-mmọn rị ngan alị-mmọn ozi ọma —

²⁰ ndị hụn gilẹni oku-Chuku wẹ gwa wẹ dọn ogẹn mbụ, ogẹn mbụ ahụn Osolobuẹ gi rị e din ndidin e che; ogẹn hụ Nụa gi rị a tụn ụgbọ-mirin hụ pụ-ichẹn, hụn wẹ gi zụọpụha ndị bulẹni ọda — madụ ẹsatọ kẹ wẹ zụọpụha, wepụha imẹ mirin ahụn.

²¹ Wẹ gi ọnwan gwatọ ẹnyi kẹ mirin-Chuku dọn nwan a zụọpụha ịhịan kikẹnni: ẹlẹ wẹ rị e gi mirin-Chuku a wụpụ unyin rị ịhịan ẹhụ, kama, ịhịan gi ẹ a ghọsị Osolobuẹ n'o gi obi ẹ ile bịa d'e kunrun ẹ, ghahanị olihi Jesu Kristi gha ọnwụn lihi.

²² Jesu rị nwan ẹka-nni Osolobuẹ imẹ elu-igwee ebe ọ lashi; ndị mmọn-ozi ile lẹ ọkịkị ile lẹ ikẹn ile rị nwan okpuru ẹ.