Pita Ibuzọ 2 - Ika

Isi Nke Ẹbụọ Ọmụma Hụ Rị Ndụn Lẹ Ebọn Hụ Rị Nsọ

¹ Latọ nị nwan ịchọ-njọ ile, ẹro ile, ihunnaị, iwe-ẹnya lẹ ikuja oku ịhịan.

² Nọkẹ ụmụ wẹ mụ nke ọhụn, a chọshi ni mirin-ẹran imẹ-mmọn ahụn rị nsọ ikẹn — kẹni ụnụ e gi ẹ e sueru ogo nzụọpụha,

³ hụnnị ụnụ danmịngụ Di-nwọnni-ẹnyi, hụn a nị Di-nwọnni-ẹnyi a rịka mma.

⁴ Ụnụ a bịagụọ nwan d'e kunrun ẹ: ọmụma ahụn rị ndụn, hụn ịhịan jụ; kanị ẹnya Osolobuẹ, ọmụma ọ họrị hụn rị okẹn mkpa k'ọ wụ.

⁵ Imẹ ẹ, ụnụ nwẹn wụzị ọmụma rị ndụn hụn wẹ rị e gi a tụn ụlọ imẹ-mmọn, kẹni ụnụ hụn ụzọ wụrụ ndị nchụn-ẹjan rị nsọ, ndị gha ẹka Jizọsị Kraịstị a chụn ẹjan imẹ-mmọn hụn a sụọ Osolobuẹ.

⁶ Makẹni, Ẹkụkwọ-nsọ e kugụ a, sị, “Lee n'ẹ, m rị e butọ ọmụma imẹ obodo Zayọnụ, ọmụma gin'ẹ; ọmụma m họrị ahọrị, hụn rịgbu enwẹn ẹ mkpa. Ifẹnrẹn emẹkọ onyẹ kwerinin'ẹ.”

⁷ Ya wụ, ọmụma ahụn rị ụnụ nwẹn kwerini mkpa ọda-ọda; kanị nke ndị hụn kwerilẹni — “Ọmụma ndị rị a tụn ụlọ jụ, a wụrụọlẹ hụn gi ụlọ!”

⁸ Ọ wụrụgụọzị “Ọmụma w'a kpọgburu; nkumẹ a han wẹ a dan.” Agbayeni wẹ oku hụ haịn wẹ gi kpọgburu kẹ wẹ dọn detọnị wẹ ya.

⁹ Kanị, ụnụ nwẹn wụ agbọ wẹ họrị ahọrị; ndị nchụn-ẹjan Eze; ebọn rị nsọ; ndị nke Osolobuẹ kẹti-kẹti, kẹni ụnụ a ghọsị ẹka-ọrụn Onyẹ hụn kpọpụha ụnụ imẹ ishi bu ụnụ che imẹ ukpẹ ẹ rịgbu enwẹn ẹ mma.

¹⁰ Ogẹn mbụ, ụnụ “ẹlẹ ndị nke Osolobuẹ”, kanị, ụnụ a wụrụọlẹ nwan ndị nke ẹ; “omikẹn ẹ ete runi ụnụ ẹka mbụ”, kanị omikẹn ẹ e rugụọ nwan ụnụ ẹka.

Ẹnyi Wụ Igbọn Osolobuẹ

¹¹ Ezigbo umunẹ m, m rị a rịọ ụnụ nọkẹ ndị wụ abịamabịa lẹ ndị rịlẹni alị wẹ, gbanị nị eje-ẹgụn a lụsọn umẹ-ndụn ụnụ agha ọsọ.

¹² E bi ni ọhụnma imẹ ndị alị ọzọ kwerilẹni; kẹni, wẹ gha e kuja oku ụnụ nị ụnụ rị e mẹ eje-ihiẹn, wẹ hụ a hụn ihiẹn rị mma ụnụ rị e mẹ, kẹni wẹ gi ẹ ja Osolobuẹ mma Ụhụọhịn hụ o k'a bịa.

A Gbaye Ni Ndị Rị A Kịnị

¹³ Gi ni ufiri Di-nwọnni-ẹnyi e humẹni ndị-ọkịkị ile isi: humẹni ni eze isi nị ya wụ onyẹ-isi ọkịkị,

¹⁴ ụnụ e humẹni ndị Gọvanọ isi nị wẹ wụ ndị eze tumẹ d'e ye ndị e mẹ eje-ihiẹn afụnfụn, a ja ndị e mẹ ihiẹn rị mma mma.

¹⁵ Ẹrịra kẹ Osolobuẹ chọ a, nị ụnụ gi imẹ-mma kpukin ndị-nzuzu rị e ku ihiẹn wẹ marịnlẹni ọnụ;

¹⁶ e gi ni agụngụn ndị nwọn enwọn wẹ e mẹ ẹ — kanị ẹlẹkwọ hụn wẹ gi e kpumẹ eje-obibi, kama, obibi ndị wụ igbọn Osolobuẹ.

¹⁷ A gbaye ni ịhịan ile; e nwọn ni ihiẹn-ọsụsụọ ndị Itu-Kraịstị ibe ụnụ; a tụ nị egun Osolobuẹ; a gbaye ni eze.

E Leri Ni Afụnfụn Kraịstị Ta

¹⁸ Ndị rị okpuru ịhịan, e humẹni ni ndị ụnụ rị okpuru wẹ isi, a gbayechanrịn wẹ, ẹlẹ ndị-ẹfọma lẹ ndị ẹka-alụlụa sụọ, kanị kẹ ndị ẹfọ rịlẹni mma.

¹⁹ Ọghọ rọ nị ịhịan rị e dingbu afụnfụn furulẹni makẹni ọ rị e ro Osolobuẹ.

²⁰ Kị wụ erere i omẹni afụnfụn eje-ihiẹn i mẹ k'i dingbu? Kanị, omẹni mma i mẹ kẹ wẹ gbuni i ili, nị y'e digbu ẹ, ọghọ rọ ẹnya Osolobuẹ.

²¹ Ịya kẹ wẹ kpọnị ụnụ, makẹni Kraịstị tazịkwọnị ụnụ afụnfụn, latọ nị ụnụ ihiẹn ụnụ e leri, kẹni ụnụ hụn ụzọ e sọn nzọmụkụ a.

²² O mẹni njọ; onwọnni ntụ wẹ nụ ọnụ a.

²³ A kpari w'ẹ, ọ kparigwarịnị; k'ọ rị a ta afụnfụn, ọ nyannịnị wẹ isi. Kama, o we enwẹn ẹ kwanị Osolobuẹ, onyẹ hụn a han ezigbo eṅẹn.

²⁴ Kraịstị lẹ enwẹn ẹ gi ẹhụ a buru njọ ẹnyi, bu ẹ shi elu osisi ahụn, kẹni ẹnyi wụrụ ndị nwụnnahịn njọ, gi ndụn ẹnyi mẹmẹ ihiẹn Osolobuẹ chọ. Ẹhụ wẹ rụsọnmẹ ẹ kẹ ẹnyi gi dịnhịn.

²⁵ Ụnụ te rị a kpahu kẹ atụnrụn, kanị ụnụ e kinhẹngụọ nwan d'e kunrun onyẹ hụn e du ụnụ kẹ atụnrụn, onyẹ hụn e lepụ umẹ-ndụn ụnụ ẹnya.