Ọrụn Ndị-ozi 9 - Ika

Isi Nke Itenẹi Kẹ Sọlụ Dọn Gbehutọ Sọnmẹ Ụzọ Jesu

¹ Kanị Sọlụ nkẹ hụkwọ a ban mban n'o k'e gbuchanrịn ndị ile e sọn Ụzọ Di-nwọnni-ẹnyi. O jẹnburu onyẹ-isi nchụn-ẹjan,

² sị a deye ẹ ẹkụkwọ-ozi jẹnni ụlọ-ofufe ndị Ju ile rịkwọrị Damaskọsụ, kẹni, ọ hụn onyẹ ọwụlẹ rị e sọn Ụzọ-Jesu ebẹhụ, o kẹnmẹhẹn wẹ Jerusalẹm, ọsụọn'a okẹnnyẹ mọbụ okpoho.

³ Ogẹn o gi nwan jẹnkọ, nọchimẹmẹ Damaskọsụ, idẹnmizi, ukpẹ nọ gha elu-igwee nwunkpu ẹ.

⁴ Ọ nọ dan; ọ nọ nụ olu hụn sị a, “Sọlụ, Sọlụ, k'ị rị e kpokponi m?”

⁵ Ọ nọ sị, “Di-nwọnni m, onyẹ k'ị wụ?” Olu hụ nọ sị, “Mmẹ wụ Jizọsị ị rị e kpokpo.

⁶ Ka lihi nwan n'ị banye imẹ obodo; wẹ k'a gwa ị ihiẹn i k'e mẹ.”

⁷ Ikẹnnyẹ ya lẹ wẹ wị turuhụ ebẹhụ, o ri wẹ ọnụ, makẹni wẹ hụ a nụ olu hụ bụ ahụnnị wẹ onyẹ ọwụlẹ.

⁸ Ya Sọlụ nọ lihi ọtọ: ẹnya a hụkwọ e ti, kanị ọ rịzị e legha ụzọ. Wẹ nọ kwọndọn ẹ ẹka, we ẹ ban obodo Damaskọsụ.

⁹ O leghanị ụzọ, o rini, ọ ranị, ọrọgbọ akpọhịn ẹtọ.

¹⁰ Imẹ Damaskọsụ, o nwọn onyẹ nsọnmazụụn Kraịstị w'a kpọ Ananayasị. Ọ nọ hụn ọhụn ebe Di-nwọnni-ẹnyi nọ kpọ a, “Ananayasị!” ya nwẹn nọ za, sị, “Di-nwọnni-ẹnyi, e lee m.”

¹¹ Di-nwọnni-ẹnyi nọ sị a, “Lihi n'i jẹn Ọgbara-ogbe ahụn w'a kpọ Streti. I ru iwe Judasị, y'a jụ ukwere onyẹ Tasọsụ ẹfan a wụ Sọlụ. Ọ rị e mẹ ekpere kikẹnni,

¹² ọ hụnghọlẹ ọhụn ebe okẹnnyẹ ohu ẹfan a wụ Ananayasị banhan, bu ẹka kwasị a, kẹni ọ leghamazị ụzọ.”

¹³ Kanị Ananayasị nọ za, sị, “Di-nwọnni-ẹnyi, ndị bu ọda a gwaọlẹ m oku okẹnnyẹni lẹ eje-ihiẹn ile o mẹ ndị-nsọ ị rị Jerusalẹm.

¹⁴ Ọ rị nwan ebeni makẹni onyẹ-isi nchụn-ẹjan e yegụọ a ikẹn n'o gi nwụnrụn ndị ile a kpọku ẹfan ị.”

¹⁵ Kanị Di-nwọnni-ẹnyi nọ sị a, “Jẹnmẹ, makẹni okẹnnyẹni kẹ m họrị n'ọ wụrụ ihiẹn-ọrụn m hụn k'e we ẹfan m jẹnni alị ndị ọzọ lẹ ndị-nze lẹ ndị Izrẹlụ;

¹⁶ mmẹ lẹ enwẹn m jẹnkọ d'a ghọsị a okẹn afụnfụn ẹfan m k'e buhẹn'ẹ.”

¹⁷ Ananayasị nọ jẹnmẹ. O ru ebẹhụ, ọ nọ banye imẹ ụlọ ahụn, bụ ẹka kwasị Sọlụ, sị a, “Sọlụ nwẹnẹ m, Di-nwọnni-ẹnyi wụ Jesu hụn ị hụn ụzọ k'i lala zihẹ m kẹni i leghamazị ụzọ lẹni Mmọn-nsọ jun imẹ i.”

¹⁸ Ozigbo hụ, ihiẹn nọkẹ okpukpu-azụn nọ gha Sọlụ ẹnya danpụha, ọ nọ leghamazị ụzọ. Ya ọ nọ lihi, wẹ nọ mẹ ẹ mirin-Chuku.

¹⁹ O ri ihiẹn-oriri, ndụn nọ ban a. Ya lẹ ndị nsọnmazụụn Kraịstị rị Damaskọsụ nọ nọdị akpọhịn ole-lẹ-ole.

Sọlụ E Kumẹ Oku-Chuku Imẹ Damaskọsụ

²⁰ Ozigbo, ọ nọ kumẹ oku Jesu imẹ ụlọ-ofufe ndị Ju rịsọnmẹ ebẹhụ, a sị wẹ, “Ịya wụ Nwa Osolobuẹ!”

²¹ Ọ tụ wẹ ile nụn'a ẹnya, wẹ hụ a sị, “Ọnwan ẹlẹ okẹnnyẹnẹi te rị e kpokpo ndị a kpọku ẹfannị imẹ Jerusalẹm? Ẹlẹ ya k'ọ bịanị nwan ebeni, kẹni ọ kẹnmẹnrin wẹ jẹnni ndị-isi nchụn-ẹjan?”

²² Kanị ẹka Sọlụ hụ e zewaye, ndị Ju bi Damaskọsụ asanị ẹka gburi ọnụ a, makẹni ọ hụ a ghọsịchanrịn nị Jizọsị wẹ rị e ku oku ẹ wụ Kraịstị Onyẹ ahụn Osolobuẹ tumẹ.

Sọlụ A Wanahịn

²³ Ọ nọbe, ndị Ju nọ zun'ẹ umẹ nị wẹ gbu ẹ.

²⁴ Kanị Sọlụ nọ nụ ihiẹn wẹ romẹ. Wẹ hụ e che nche ọnụ-mgbọn rịsọnmẹ obodo hụ uhinhin lẹ efinnaị nị wẹ gbu ẹ.

²⁵ Kanị ndị kweri oku ẹ rị e sọnn'ẹ nọ gi imẹ uhinhin bu ẹ che imẹ ụkpalị, gha oghe rị mgbọn obodo hụ dọtu ẹ alị.

Sọlụ A Bịa Jerusalẹm

²⁶ Ogẹn o gi ru Jerusalẹm, o te chọ n'ọ banyeni ndị nsọnmazụụn Jesu, kanị egun ẹ rị a tụ wẹ ile makẹni ekwerini wẹ n'o họnringụọ onyẹ nsọnmazụụn Jesu.

²⁷ Ya kẹ Banabasị nọ we Sọlụ jẹnni ndị-ozi ahụn pụ-ichẹn, kọwanị wẹ kẹ Sọlụ dọn hụn Di-nwọnni-ẹnyi ụzọ, kọwazịnị wẹ nị Di-nwọnni-ẹnyi a gwagụọ Sọlụ oku; ọ gwazị wẹ kẹ Sọlụ dọn ku oku ẹfan Jizọsị imẹ Damaskọsụ, e ku ẹ e kushi ẹ ikẹn.

²⁸ Ya Sọlụ nọ bannị wẹ, e sọn wẹ e bi imẹ Jerusalẹm. Ọ hụ e ku oku Di-nwọnni-ẹnyi, e kushi ẹ ikẹn.

²⁹ Ọ hụzị e sọn ndị Ju gha obodo ebo lụaha e ku, e sọn wẹ a dọ ndọndọ; kanị wẹ hụ a chọ nị wẹ gbu ẹ.

³⁰ Ogẹn ndị kwerini Kraịstị gi marịn nị wẹ rị a chọ nị wẹ gbu ẹ, wẹ nọ we ẹ shi Sizaria, sị a lashi Tasọsụ.

³¹ Ya kẹ ndị ụka rị Judia lẹ Galili lẹ Sameria ogẹn hụ nọ zu ikẹn ukpokpo wẹ rị e kpokpo wẹ. Wẹ hụ e zekẹnmẹ, e gi egun Di-nwọnni-ẹnyi e bi, Mmọn-nsọ hụ e yeni wẹ ẹka e buwaye ọda.

Kẹ Pita Dọn Zụọ Ẹnasị Imẹ Lida

³² Ogẹn Pita gi rị e jẹnhunmẹ d'a hụn ndị ile kwerini, ọ nọ jẹn d'a hụn ndị-nsọ, ndị itu-Kraịstị, bi obodo Lida.

³³ Ebẹhụ k'ọ nọ hụn okẹnnyẹ ohu ẹfan a wụ Ẹnasị hụn dinẹ kete ahụa ẹsatọ ịnwaịn, makẹni ọrọ kinmin ẹ.

³⁴ Pita nọ sị a, “Ẹnasị, Jesu Kristi a zụọgụọ ị; lihi, heri ute i!” Ya ọ nọ lihi ọtọ ozigbo!

³⁵ Ndị ile bi Lida lẹ Sharọnụ a hụn Ẹnasị n'o lihigụọ, wẹ nọ rogharị, sọnmẹ Di-nwọnni-ẹnyi.

Kẹ Pita Dọn Weli Dọkasị Nwụnhụnnị

³⁶ Imẹ Jọpa, o nwọn okpoho ohu ẹfan a wụ Tabita hụn wụ onyẹ nsọnmazụụn Jesu (Asụsụ Griki, Tabita wụ Dọkasị hụn wụ Ele). Tabita e mẹ ọghọ ọda-ọda, o yeni ndị igbẹnnyẹ ẹka ọhụnma-ọhụnma.

³⁷ Emu a kụma a, ọ nọ nwụnhụn. A wụgụ w'a ẹhụ, wẹ nọ bu ẹ dinẹ mmughẹ rị ibe elu.

³⁸ Lida nọkunmẹ Jọpa; ndị nsọnmazụụn Jesu a nụ nị Pita rị Lida, wẹ nọ zi ikẹnnyẹ ẹbụọ d'a rịọ a, sị, “Dodo, bịa obodo ẹnyi ozigbo!”

³⁹ Ya Pita nọ lihi, sọnmẹ wẹ. E ru w'ẹ, wẹ nọ w'ẹ shi mmughẹ hụ rị ibe elu. Ikpoho ile di wẹ nwụnhụn e fihunmẹ Pita, a kwan ẹkwan, a ghọsị a ẹwuru tueni lẹ ẹkwa ndị ọzọ Dọkasị kpa k'ọ rị ndụn.

⁴⁰ Pita nọ sị wẹ ile pụ; ọ nọ gbu osekpu, mẹ ekpere. Ya ọ nọ gbehutọ, bu ihun zimẹ ozun hụ, sị, “Tabita, lihi.” Ya Tabita nọ shịapụ ẹnya; ọ hụn Pita, ọ nọ nọdị alị.

⁴¹ Pita nọ kwọndọn ẹ ẹka, weli ẹ. Ya Pita nọ kpọ ndị itu-Kraịstị lẹ ikpoho ndị ahụn di wẹ nwụnhụn, we Tabita ghọsị wẹ, wẹ nọ hụn a n'ọ rịzị ndụn.

⁴² Ya ihiẹnni nọ kpọgbarị Jọpa ile, ndị bu ọda nọ kwerini Di-nwọnni-ẹnyi.

⁴³ Pita nọ nọdị Jọpa akpọhịn ole-lẹ-ole iwe onyẹ w'a kpọ Saịmọnụ, hụn a rụn ọrụn akpụkpọ.