Ọrụn Ndị-ozi 8 - Ika

Isi Nke Ẹsatọ Kẹ Sọlụ Dọn Kpokpo Ndị Ụka

¹ Sọlụ a kwadọnghọ wẹ kẹ wẹ rị e gbu Stivini. Gha ụhụọhịn hụ jẹnmẹ, wẹ nọ kpokpomẹ ndị ụka rị Jerusalẹm ọda-ọda. Wẹ ile nọ gbayịya, gbashisọnmẹ ẹgbẹrẹ Judia lẹ Sameria — wezụka ndị-ozi hụ pụ-ichẹn.

² Ogẹn wẹ gi magbu Stivini, ikẹnnyẹ e feshi Osolobuẹ ikẹn nọ bịa d'e buru ozun ẹ d'e li; wẹ nọ kwan ọda-ọda kwanshi elu nị Stivini a nwụnhụn.

³ Kanị Sọlụ nkẹ hụ a lụ nọ kụsị ụka Jesu, a gha ụlọ-ụlọ a dọkpụnpụha ikẹnnyẹ lẹ ikpoho kweri ni Jesu, e bu wẹ e che ụlọ-ngan.

Ụka E Bidọn Imẹ Alị Sameria

⁴ Ogẹn hụ, ndị hụn gbayịyanị hụ e zi oziọma ebe-lẹ-ebe wẹ ru.

⁵ Filipu nkẹ nọ jẹn isi-obodo Sameria, gwa wẹ oku Kraịstị.

⁶ Ogẹn igunrun rịsọnmẹ ebẹhụ gi nụ ihiẹn Filipu rị e ku, hụnzị ọrụn-atụmẹnya ọ rị a rụn, wẹ ile nọ gọn ẹ ntịn,

⁷ makẹni eje-mmọn rị imẹ ndị bu ọda hụ a gha imẹ wẹ a pụha, yikọ oro; ndị ọrọ lẹ ndị ngụrọ bu ọda hụ a dịnhịn,

⁸ okẹn ịghọghọ e jun obodo hụ.

Saịmọnụ Ogbomẹ

⁹ Ogẹn ahụn, okẹnnyẹ ohu ẹfan a wụ Saịmọnụ bi obodo hụ. O gi ọgụn e mẹ ihiẹn a tụ ndị Sameria ile ẹnya; ọ hụ a kpọ enwẹn ẹ okẹn ịhịan.

¹⁰ Wẹ ile e gọn ẹ ntịn, kẹ onyẹ uku kẹ onyẹ-nta, a sị, “Okẹnnyẹni ya gi Ikẹn Osolobuẹ ahụn w'a kpọ ‘Okẹn-ikẹn.’ ”

¹¹ Wẹ hụ e gọn ẹ ntịn makẹni o tekẹmẹkẹ o gi ọgụn e mẹ ihiẹn a tụ wẹ ẹnya.

¹² Ogẹn wẹ gi kweri oziọma Alị-eze Osolobuẹ lẹ ẹfan Jizọs Kraịstị hụn Filipu rị e zi, wẹ nọ mẹ wẹ mirin-Chuku, kẹ ikẹnnyẹ kẹ ikpoho.

¹³ Saịmọnụ lẹ nwẹn ẹ nọ kwerizidẹ; e mẹgụ w'a mirin-Chuku, ọ nọ sọnhunmẹmẹ Filipu; okẹn ọrụn-atụmẹnya lẹ ihiẹn-nghọsị ọ rị a hụn Filipu rị a rụn hụ a tụ a ẹnya ọda-ọda.

¹⁴ Ogẹn ndị-ozi hụ pụ-ichẹn hụn rị Jerusalẹm gi nwan nụ nị ndị Sameria a nabanhangụọ oku Osolobuẹ, wẹ nọ zijẹnni wẹ Pita lẹ Jọnụ.

¹⁵ Ogẹn wẹ gi ru ebẹhụ, wẹ nọ mẹni ndị kwerini ekpere nị wẹ nwọnhẹn Mmọn-nsọ —

¹⁶ (makẹni imẹ wẹ ile o ke nwọn hụn Mmọn-nsọ hidankwasị, wẹ gihụ ẹfan Di-nwọnni-ẹnyi wụ Jizọsị mẹ wẹ mirin-Chuku.)

¹⁷ Ya Pita lẹ Jọnụ nọ bu ẹka kwasị wẹ, wẹ nọ nwọnhẹn Mmọn-nsọ.

¹⁸ Ogẹn Saịmọnụ gi hụn nị Ndị-ozi hụ pụ-ichẹn buhụ ẹka kwasị wẹ, e nwọnhẹn wẹ Mmọn-nsọ, ọ nọ wẹhẹ egho n'o ye wẹ:

¹⁹ ọ sị, “Yezi ni mmẹ nwẹn ikẹnni, kẹni, m buhụ ẹka kwasị ịhịan, o nwọnhẹn Mmọn-nsọ.”

²⁰ Pita nọ sị a, “Ịyụ lẹ egho i la iwi! Makẹni i ro n'ị k'a saẹka gi egho ṅọnrin oyiye Osolobuẹ!

²¹ Y'a rị imẹ ihiẹnni, onwọnzikwọnị ihiẹn runi i imẹ ẹ, makẹni obi i ezinrinni ẹnya Osolobuẹ.

²² Rogharịkwọ nwan eje-ihiẹnni i mẹ, y'e mẹ ekpere, rịọ Di-nwọnni-ẹnyi; ikẹnkwọ ọ gbagharị ị iroroni.

²³ Makẹni a hụnọlẹ m nị eje ẹnya-ụfụ gi i, nị njọ kẹnzikwọ ị ẹgbụn.”

²⁴ Saịmọnụ nọ sị Pita lẹ Jọnụ, “Dodo ni, mẹ ni ni m ekpere, rịọ Di-nwọnni-ẹnyi, makẹ ihiẹnni ụnụ ku gha e mẹ m.”

²⁵ Ogẹn Pita lẹ Jọnụ gi shịagụnị Di-nwọnni-ẹnyi ẹri, zigụ ozi Di-nwọnni-ẹnyi, wẹ nọ lakin Jerusalẹm, zikọ oziọma imẹ obodo mẹsọnmẹ ẹkẹrẹ-ẹkẹrẹ bu ọda rị alị Sameria.

Filipu Lẹ Okẹn-ịhịan Alị Ẹtiopịa

²⁶ Ya mmọn-ozi Di-nwọnni-ẹnyi nọ sị Filipu, “Lihi, shi ụzọ hụ rị ẹbamịn ndịdan-mirin hụn gha Jerusalẹm pụ Gaza.” (W'a ra ghaka ụzọnị.)

²⁷ Ya ọ nọ lihi, jẹnmẹ. Ọ nọ kunrun onyẹ Ẹtiopịa. Okẹnnyẹni wẹ wara wụ iho-aza hụn e dọnmẹ egho lẹ ihiẹn ile okpoho wụ Kandesi eze Ẹtiopịa nwọn. Ọ bịa Jerusalẹm d'e fe ofufe.

²⁸ Ọ lakọ nwan alakọ; ọ nọdị alị imẹ ụgbọ-anyịnyan a, gụnkọ Ẹkụkwọ Azaya onyẹ-amụma.

²⁹ Mmọn-nsọ nọ sị Filipu, “Jẹn d'a nọkunmẹchanrịn ụgbọ-anyịnyan hụ.”

³⁰ Ya Filipu nọ gbakunrun ụgbọ-anyịnyan hụ, nụ kẹ okẹnnyẹ hụ rị a gụn Ẹkụkwọ Azaya onyẹ-amụma. Ọ nọ jụ a, sị, “Ị hụ nwan a ghọta ihiẹn ị rị a gụn?”

³¹ Okẹnnyẹ hụ nọ za, sị, “Nanị m'e dọn ghọta omẹni a kọwanịnị wẹ m'a?” Ọ nọ rịọ Filipu n'o nyinhẹn d'e du ẹ nọdị imẹ ụgbọ-anyịnyan hụ.

³² Ọ rị a gụn ebẹhụ Ẹkụkwọ-nsọ nọ sị, “Wẹ nọ duru ẹ nọkẹ atụnrụn wẹ dukọ d'e gbu; ọ gba wẹ nkịtịn kẹ atụnrụn wẹ rị a kọ ẹṅẹnrẹn dọn a gba nkịtịn.

³³ Wẹ nọ kpari ẹ; wẹ nọ ma a ikpe — bụ onwọnni ihiẹn o mẹ. Onyẹ jẹnkọ d'e kuzi oku ụmụ a, ebe o mẹni wẹ gbuchu ẹ egbuchu elu ụwa?”

³⁴ Okẹn-okporo hụ nọ sị Filipu, “Dodo, gwa m, onyẹ kẹ onyẹ-amụmanị rị e ku oku ẹ? Ya lẹ enwẹn ẹ ra onyẹ ọzọ?”

³⁵ Ya kẹ Filipu nọ gha ebẹhụ okẹnnyẹ hụ rị a gụn zimẹ ẹ oziọma banyeni Jizọsị.

³⁶ E jẹnbe wẹ, wẹ nọ hụn mirin; okẹn-okporo hụ nọ sị, “Lee mirin ebeni! Kị k'a han m emẹlẹ mirin-Chuku?”

³⁷ [Filipu nọ sị a, “Omẹni y'e gighọ obi i ile kweri, nị wẹ mẹghọ ị mirin-Chuku.” Ọ nọ za, sị, “E kwerighọ m nị Jesu Kristi wụ Nwa Osolobuẹ.”]

³⁸ Ya okẹn-okporo nọ sị onyẹ rị a nyann'a ụgbọ-anyịnyan hụ kụsị; okẹn-okporo lẹ Filipu nọ banye imẹ mirin, Filipu nọ mẹ ẹ mirin-Chuku.

³⁹ Ogẹn wẹ gi gha imẹ mirin pụha, idẹnmizi, Mmọn-nsọ Di-nwọnni-ẹnyi nọ jụrụ Filipu; okẹn-okporo hụ ahụnzịn'a, ya okẹn-okporo hụ nọ gi ịghọghọ jẹnmẹ ebe o jẹnkọ.

⁴⁰ Ebe Filipu nkẹ nọzị hụn enwẹn ẹ wụ Azọtusu. Ọ nọ jẹnsọnmẹ, zikọ oziọma imẹ obodo ile rị ẹgbẹrẹ hụ d'e ru n'ọ pụha Sizaria.