Ọrụn Ndị-ozi 7 - Ika

Isi Nke Ẹsa Oku Stivini Gwa Ndị-isi

¹ Onyẹ-isi nchụn-ẹjan nọ jụma Stivini sị, “Ihiẹn ndịnị wụdẹ nwan ezioku ra?”

² Stivini nọ za, sị, “Umunẹ m lẹ ndị nẹdi ẹnyi, gọn nị m ntịn! Osolobuẹ hụn nwọn ọghọ bịa d'e kunrun nẹdi ẹnyi kanị wụ Ebraham imẹ alị Mẹsopotemịa. Ebraham eke jẹn alị Haranị d'e biri ogẹn ahụn.

³ Ọ nọ sị a, ‘Latọ alị ị lẹ ebọn ụnụ, n'i shi alị m jẹnkọ d'a ghọsị ị.’

⁴ Ya k'ọ nọ la alị ndị Kal'di tọ, jẹn d'e biri alị Haranị. Ogẹn nẹdi ẹ gi nwụnhụn, Osolobuẹ nọ zihẹ ẹ alịnị ụnụ bi nwan —

⁵ bụ o yen'ẹ alị ọwụlẹ imẹ ẹ — kẹ hụn handẹ kẹ amụkụ ohu; o kwe ẹ nkwa n'o jẹnkọ d'e ye ya lẹ ụmụ a ya ọsụọn'a n'o ke mụ nwa ogẹn hụ.

⁶ Osolobuẹ nọ sịzị a, ‘Ụmụ ị jẹnkọ d'a wụ itumunyẹ imẹ alị ọzọ; wẹ k'e gi wẹ họnrin igbọn, mẹja wẹ, ọrọgbọ ahụa nnụ.

⁷ Kanị m k'e ye alị hụ gi wẹ họnrin igbọn afụnfụn. Omẹgụ, ụmụ ị k'a pụha d'e fe m ebeni. Ya kẹ Chuku ku.’

⁸ Chuku nọ tumẹ nkwerigbama hụn ahịma a wụ ịkwa-ugun, gi ẹ kwọngbama ya lẹ Ebraham. Ebraham a mụ Aziki, nke akpọhịn ẹsatọ, ọ kwa a ugun. Aziki a mụ Jekọpụ, Jekọpụ a mụ ndị nẹdi ẹnyi mmẹbụọ.

⁹ “Ndị nẹdi ẹnyi nọ gi ẹnya-ụfụ re nwẹnẹ wẹ wụ Josẹfụ ye ndị hụ w'ẹ shi Ijiptu. Kanị Osolobuẹ nọ nọyen'ẹ,

¹⁰ zụọpụha a imẹ nsọngbu ẹ ile. Ọ nọ mẹ ihiẹn ẹ sụọ Fẹro eze Ijiptu, yezikwọ Josẹfụ amamihiẹn pụ-ichẹn ogẹn o gi pụha ihun Fẹro, nke wụ nị Fẹro nọ tumẹ ẹ n'ọ kị alị Ijiptu lẹ obi-eze Fẹro ile.

¹¹ “Omẹgụ, okẹn ụnwụn nọ mụgbarị alị Ijiptu lẹ Kenaanị, buhẹ okẹn afụnfụn, d'e ru nị ndị nẹdi ẹnyi wẹ ahụnzịnị ihiẹn-oriri.

¹² Ogẹn Jekọpụ nẹdi wẹ gi nụ nị ihiẹn-oriri rị alị Ijiptu, ọ nọ zi ndị nẹdi ẹnyi wẹ ebẹhụ d'e ṅọnlụa ihiẹn-oriri. Ọnwan wụ nke ibuzọ wẹ jẹn Ijiptu.

¹³ Ogẹn umunẹ ẹ gi bịa Ijiptu hụn mẹ ẹ nke mgbe ẹbụọ, Josẹfụ nọ nwan mẹ wẹ marịn nị ịya rọ, ogẹn hụ kẹ Fẹro gizi marịn ndị nke Josẹfụ.

¹⁴ Ya Josẹfụ nọ zi ozi, e wẹhẹ wẹ nẹdi ẹ lẹ ebọn wẹ ile bịa alị Ijiptu. Wẹ ile bịanị wụ madụ isẹn arịa ọgụn-ẹnọ.

¹⁵ Ẹrịra kẹ Jekọpụ gi jẹn alị Ijiptu. Omẹgụ, ọ nọ nwụntọ ebẹhụ, ya lẹ ndị nẹdi ẹnyi kanị.

¹⁶ Omẹgụ, wẹ nọ bukin wẹ ile obodo Shẹkẹm, li wẹ ye imẹ ili ahụn rị Shẹkẹm hụn Ebraham gi egho ṅọnnarịn ụmụ Hamọ.

¹⁷ “Ogẹn e rumẹ hụn Osolobuẹ e gi mẹzu nkwa o kwe Ebraham, ndị nke ẹnyi nọ bakẹnmẹ ụba imẹ alị Ijiptu

¹⁸ d'e ru ogẹn Fẹro ọzọ marịnlẹni Josẹfụ gi kịma Ijiptu.

¹⁹ Ezeni wụ hụn gi aghịghọ sọn ndị nke ẹnyi, mẹjama ndị nẹdi ẹnyi wẹ, mẹ wẹ latọ ụmụ wẹ mụ nke ọhụn, kẹni ọnwụn gbu wẹ.

²⁰ Ogẹnni kẹ wẹ gi mụ Mozizi. Mozizi pu okorọbịa ọda-ọda. Ndị mụn'a nọ gi nzuzue zụn a iwe wẹ ifọn ẹtọ.

²¹ Ogẹn wẹ gi nwan we ẹ che ogbe, nwa-okpoho Fẹro nọ mụnrụn a, zụn a kẹ nwa ẹfọ a.

²² Wẹ nọ zụn Mozizi ọzụnzụn ndị Ijiptu, kuzi ẹ ihiẹn ile wẹ marịn, ọ nọ wụrụ okẹn ịhịan — kẹ oku-ọnụ kẹ ọrụn.

²³ “Ogẹn o gi rị nwa ahụa ọgụnnaị, ọ nọ ban a obi n'o d'a hụn ndị nke wẹ, ndị Izrẹlụ.

²⁴ Ọ hụn kẹ onyẹ Ijiptu rị e mẹja onyẹ ohu imẹ wẹ, ọ nọ nọ onyẹ wẹ rị e mẹja ye azụụn, mẹgwarịn'a, gbu onyẹ Ijiptu hụ rị e mẹjan'a.

²⁵ O te ro ni umunẹ ẹ k'a ghọta nị Osolobuẹ rị e gi ẹ a zụọpụha wẹ, kanị aghọtanị wẹ.

²⁶ Eki e fọn, Mozizi nọ hụn ndị Izrẹlụ ẹbụọ kẹ wẹ rị a lụ ọgụn. Ọ chọ n'o gbọn wẹ: ọ nọ sị, ‘Ikẹnnyẹ, ụnụ wụ umunẹ, kị ụnụ rị e mẹni ibe ụnụ eje-ihiẹn?’

²⁷ Kanị hụn chọ oku nọ kwan a ye ụsụọ, sị, ‘Onyẹ tumẹ i n'i kịma ẹnyi? Onyẹ sị ị hannị ẹnyi eṅẹn?

²⁸ Ị chọ n'i gbu m k'i dọn gbu onyẹ Ijiptu ahụn ụnyanhụn?’

²⁹ Mozizi a nụ ihiẹnni, ọ nọ gbashi alị Midianị d'e biri, o họnrin abịamabịa, nọ ebẹhụ mụ ikẹnnyẹ ẹbụọ.

³⁰ “Ahụa ọgụnnaị a ghafegụ, mmọn-ozi nọ bịa d'e kunrun ẹ imẹ atụ nọkunmẹ Ugu Saịnaị; imẹ ọkụn rị e nwun imẹ akụ-ọfịa.

³¹ Ogẹn Mozizi gi hụn ihiẹnni, ọ tụ a ẹnya, ọ nọkunmẹ ẹ n'o legha a ọhụnma, ya ọ nọ nụ olu Di-nwọnni-ẹnyi k'ọ gha ebẹhụ sị a,

³² ‘Mmẹ wụ Chuku ndị nẹdi i: Chuku Ebraham lẹ Aziki lẹ Jekọpụ.’ Ẹhụ nọ mama Mozizi nni, egun anịn'a lee ẹnya.

³³ Di-nwọnni-ẹnyi nọ sị a, ‘Gbụpụ akpụkụ ị, makẹni alị i turu rị nsọ.

³⁴ Gọn ntịn: a hụnchanrịngụọ m eje-afụnfụn ndị nke m rị a ta imẹ Ijiptu; a nụọlẹ m udẹn wẹ rị a sụn; a bịaọlẹ m nwan d'a zụọpụha wẹ. Bịa nwan nị m zijẹn i Ijiptu.’

³⁵ “Mozizi nwẹn wẹ jụ; onyẹ nwẹn wẹ sị, ‘Onyẹ tumẹ i n'ị kịma ẹnyi? Onyẹ sị ị hannị ẹnyi eṅẹn?’ Ịya kẹ Osolobuẹ zi nwan d'a wụrụ onyẹ-ọkịkị lẹ onyẹ-nzụọpụha. O zi ẹ ghahanị mmọn-ozi hụ ọ hụn imẹ akụ-ọfịa hụ.

³⁶ Mozizi nọ gha alị Ijiptu wepụha wẹ, rụnkọ ọrụn-atụmẹnya lẹ ihiẹn-nghọsị imẹ alị Ijiptu lẹ Ohimin ufie lẹ imẹ atụ, ọrọgbọ ahụa ọgụnnaị.

³⁷ Mozizini wụ hụn sị ụmụ Izrẹlụ, ‘Osolobuẹ k'a gha imẹ umunẹ ụnụ wepụhanị ụnụ onyẹ-amụma k'o dọn wepụha m.’

³⁸ Mozizi wụ onyẹ hụn kị ndị nke Osolobuẹ imẹ atụ ogẹn ahụn, ya lẹ Mmọn-ozi ahụn gwa a oku elu Ugu Saịnaị; ịya du ndị nẹdi ẹnyi kanị; ịya nahan Osolobuẹ oku ndị ahụn e ye ndụn o ye ẹ ye ẹnyi.

³⁹ “Kanị ndị nẹdi ẹnyi kanị a jụ n'e humẹkọnị w'a isi; a jụ w'a ọjụjụ ụya, lakin alị Ijiptu imẹ obi wẹ,

⁴⁰ a sị wẹ Ẹrọnụ, ‘Mẹmẹni ẹnyi mmọn nị wẹ dumẹ ẹnyi, ni ẹnyi amarịnzị ihiẹn mẹ Mozizini wepụha ẹnyi alị Ijiptu.’

⁴¹ Ogẹn hụ kẹ wẹ gi kpụ nwa-efin, chụnyen'ẹ ẹjan; wẹ nọ rimẹni ihiẹn ẹka wẹ mẹmẹ oriri.

⁴² Ya kẹ Osolobuẹ nọ gbakitọ wẹ azụụn, ha wẹ ye nị wẹ femẹ ihiẹn ndị rị igwere. Ya kẹ ndị-amụma de, sị, ‘Heuu, ikpụlọ Izrẹlụ! Ẹlẹkwọ mmẹ kẹ ụnụ gbuni anụ ndị ahụn; ẹlẹ mmẹ kẹ ụnụ chụnyesọnmẹni ẹjan ndị ahụn imẹ atụ ọrọgbọ ahụa ọgụnnaị.

⁴³ Ụnụ e buru ụlọ-mmọn Molẹkị lẹ okokisẹ mmọn ụnụ wụ Refanị, mmọn ndị ụnụ kpụ nị ụnụ hụn ụzọ e fe wẹ; m k'e gi ufiri ẹ chụ ụnụ shikwọrị Babilọnụ.’

⁴⁴ “Ogẹn ahụn wẹ gi rị a ghahunmẹ imẹ atụ hụ, ndị nẹdi ẹnyi bu Ọdụ Ashịa-ẹri hụ hụn a ghọsị nị wẹ lẹ Osolobuẹ rị. Wẹ rụn a kẹ Osolobuẹ dọn gwa Mozizi ogẹn o gi sị a rụn a kẹ hụn ọ ghọsị a.

⁴⁵ Ọdụ hụ e ru ẹka ndị nẹdi ẹnyi hụn rị ogẹn Joshụa, wẹ nọ bubanhan a imẹ alị hụ Osolobuẹ kwe wẹ nkwa a. Ọhụn mẹ kẹ wẹ banhan d'a napụ ndị Chuku chụpụnị wẹ alị. Ọdụ hụ rị imẹ igunrun wẹ d'e ru ogẹn Defidi.

⁴⁶ Chuku gi ẹnya rị mma lee Defidi: o mẹ ekpere, rịọ Chuku n'ọ nị a tụnnị Chuku, Chuku Jekọpụ, ebe obibi.

⁴⁷ Solomọnụ tụnnị nwan Osolobuẹ ụlọ hụ.

⁴⁸ “Kanị Onyẹ Hụ Kachanrịnnị ara bi ụlọ wẹ gi ẹka tụn. Ịya kẹ onyẹ-amụma gi sị,

⁴⁹ ‘Osolobuẹ sị, “Elu-igwee wụ ukpo m; ụwa wụ ebe m'a gbakwasị ụkụ. Elee ụlọ k'i k'a tụnnị m nwan, elebe kẹ m'a nọ zu ikẹn?

⁵⁰ Ẹlẹ mmẹ mẹmẹ ihiẹn ndịnị ile?” ’

Ihiẹn Stivini Rị E Ku

⁵¹ “Ndị isi-ikẹn! Ndị kwalẹni ugun imẹ obi lẹ ntịn! Ogẹn ile kẹ ụnụ gi e gbọndọn Mmọn-nsọ, e mẹ kẹ ndị nẹdi ụnụ!

⁵² Elee onyẹ-amụma kẹ ndị nẹdi ụnụ kpokpolẹni? Uwẹ gbu ndị hụn ku oku ọbịbịa Kraịstị Onyẹ Ezi-omumẹ, ụnụ nwẹn wụ nwan ndị ren'ẹ lẹ ndị gbun'ẹ!

⁵³ Ndị Osolobuẹ ye Iwu ghahanị ndị mmọn-ozi, kanị emẹni wẹ ẹ!”

E Gi Wẹ Ọmụma Magbu Stivini

⁵⁴ Ogẹn wẹ gi nụ ihiẹnni Stivini rị e ku, okẹn ọnụma nọ bịa wẹ, wẹ nọ gi iwe tan'a ẹka eze.

⁵⁵ Kanị Stivini Mmọn-nsọ jun imẹ ẹ nọ lee ẹnya elu-igwee, hụn ọghọ Osolobuẹ, hụnzị Jesu k'o turu ẹka-nni Osolobuẹ.

⁵⁶ Ọ nọ sị, “Lee ni! M rị a hụn elu-igwee k'o kpupụ: m rịzị a hụn Nwa nke Ịhịan ebe o turu ẹka-nni Osolobuẹ!”

⁵⁷ Kanị, wẹ nọ gi ẹka kụkin ntịn, dọ oro ye ọnụ, zụnburu ẹ.

⁵⁸ Wẹ nọ gha imẹ obodo dọkpụnpụha a; ya wẹ nọ mama a ọmụma. Ndị ọshẹri hụ wẹhẹn'ẹ a gbụpụsọnmẹọlẹ ẹkwa wẹ yọtọ ụkụ okorọbịa ohu ẹfan a wụ Sọlụ n'o lepụ ẹnya.

⁵⁹ Ogẹn wẹ gi rị a ma Stivini ọmụma, ọ nọ mẹ ekpere, sị, “Di-nwọnni-ẹnyi wụ Jesu, dodo nabanhan mmọn m!”

⁶⁰ Ya ọ nọ gbu osekpu, weshi olu elu, yi, “Di-nwọnni-ẹnyi, agụnkwọlẹ njọnị yeni wẹ!” O kugụ a, ọ nọ nwụnhụn.