Ọrụn Ndị-ozi 6 - Ika

Isi Nke Isin Ndị Eyemẹka Ẹsa

¹ Ogẹn ndị rị e sọn Kraịstị gi rị e buwaye ọda, ndị Ju gha obodo ebo lụaha hụn rị imẹ igunrun wẹ nọ kpemẹ nị ndị rị ụlọ arị e keye ikpoho wẹ di wẹ nwụnhụn ihiẹn-oriri w'e ke ụhụọhịn-ụhụọhịn.

² Ya ndị-ozi pụ-ichẹn mmẹbụọ hụ nọ kpọzu ndị ile kwerini, sị wẹ, “O furuni nị ẹnyi latọ oku-Chuku d'e kemẹ ihiẹn-oriri.

³ Umunẹ, lehunmẹ ni nwan ẹnya imẹ igunrun ụnụ, nị ụnụ họpụha mmadụ ẹsa: ndị w'e ku oku wẹ ọhụnma, ndị Mmọn-nsọ jun imẹ wẹ, ndị marịn ihiẹn ọhụnma-ọhụnma, kẹni ẹnyi ye wẹ ọrụnnị;

⁴ ẹnyi nwẹn jẹnkọ d'e bu enwẹn ẹnyi che ekpere lẹ iku oku-Chuku.”

⁵ Okuni sụọ ndị ụka ile ụsụọ; wẹ nọ họpụha Stivini, okẹnnyẹ hụn nwọn okukwe ọda-ọda, Mmọn-nsọ jun imẹ ẹ; ịya lẹ Filipu lẹ Prokorọsụ lẹ Nikanọ lẹ Timọnụ lẹ Pamẹnasị lẹ Nikọlasị onyẹ Antịọkụ, onyẹ alị ọzọ te e fe ofufe ndị Ju.

⁶ Ya wẹ nọ wepụha ndịnị ihun Ndị-ozi ahụn pụ-ichẹn, Ndị-ozi ahụn pụ-ichẹn nọ mẹ ni wẹ ekpere, bu ẹka kwasị wẹ.

⁷ Oku-Chuku hụkwọ a ghagbarị, e ru ndị bu ọda ẹka, ndị kwerini hụ e buwaye ọda imẹ Jerusalẹm; ndị nchụn-ẹjan bu ọda nọ gbehutọ sọnmẹ Ụzọ Jesu.

A Nwụnrụn Wẹ Stivini

⁸ Stivini e nwọnkẹ eyemẹka Osolobuẹ lẹ ikẹn ẹ. Ọ hụ a rụn okẹn ọrụn-atụmẹnya lẹ ihiẹn-nghọsị imẹ igunrun ndị alị.

⁹ Kanị ụfọdụ ndị Ju, ndị ụlọ-ofufe w'a kpọ “Ụlọ-ofufe ndị Ju werigụ enwẹn wẹ”, nọ lihi, sọn Stivini dọma ndọndọ. Ndịnị wụ ndị Ju ghasọnmẹ Saịrini lẹ Alẹzandrịa lẹ ndị ghazị ẹgbẹrẹ Silisia lẹ Eshịa bịa.

¹⁰ Kanị asanị wẹ ẹka sọn amamihiẹn lẹ Mmọn-nsọ hụn Stivini gi e ku oku dọ.

¹¹ Wẹ nọ gha azụụn rịọ ndị wẹ rịọ d'e buokin Stivini ọnụ, sị, “Ẹnyi nụ kẹ Stivini rị e kuja oku Mozizi lẹ Osolobuẹ.”

¹² Wẹ nọ kpasu ndị alị lẹ ndị-isi lẹ ndị nkuzi-Iwu, wẹ nọ jẹnburu Stivini, nwụnrụn a, wẹhẹ ẹ Ọgwa Ndị-isi Nkịkwama.

¹³ Wẹ nọ kpọpụha ndị ọshẹri-ntụ, ndị ọshẹri-ntụ hụ nọ sị, “Okẹnnyẹni ara kujabehi oku Ụlọ-nsọnị lẹ Iwu Mozizi.

¹⁴ Ẹnyi a nụọlẹ k'ọ sị nị Jesu onyẹ Nazarẹtịnị jẹnkọ d'e tikpọ ebeni, gbehutọ ọdịnalị ndị Mozizi tumẹni ẹnyi.”

¹⁵ Wẹ ile rị Ọgwa hụ nọ bu ẹnya zinmẹ Stivini, wẹ nọ hụn nị ihun ẹ nọ kẹ ihun mmọn-ozi.