Ọrụn Ndị-ozi 5 - Ika

Isi Nke Isẹn Ntụ Ananayasị Lẹ Safaira Nwunyẹ Ẹ Tụ

¹ Okẹnnyẹ ohu ẹfan a wụ Ananayasị e rezighọ alị, ya lẹ Safaira nwunyẹ ẹ.

² Ọ nọ bu mgbube egho o re ẹ tọ, wẹhẹni Ndị-ozi ahụn pụ-ichẹn hụn họdụnị; ya lẹ nwunyẹ ẹ kwerigbama mẹ ẹ.

³ Kanị Pita nọ sị, “Ananayasị, kị Ekwensụ nun'i tụ Mmọn-nsọ ntụ, mẹ i bu mgbube egho i re alị hụ tọ?

⁴ N'ị d'e re ẹ, ẹlẹ yụ nwọn ẹ? K'i regụ a, ẹlẹ yụ nwọn egho ẹ? K'i roni eje-ihiẹn nọ ẹnịna? Ẹlẹkwọ ịhịan k'ị tụ ntụnị, kanị Osolobuẹ!”

⁵ Ananayasị a nụ hụ ihiẹnni, ọ nọ dan alị, nwụnhụn. Okẹn egun tụ ndị ile nụn'a.

⁶ Ananayasị a nwụnhụn, ikorọbịa nọ pụha, kwama ozun ẹ, buru ẹ pụ d'e li.

⁷ Ihiẹn nọ kẹ mgbahunmẹ ọkụrọkụ ẹtọ a ghafegụ, nwunyẹ ẹ nọ banhan, o ke marịn ihiẹn mẹni.

⁸ Pita nọ jụ a, sị, “Ọnụ eghoni kẹ yụ lẹ di i re alị hụ?” Ọ nọ sị, “Ẹghẹẹ, ya rọ.”

⁹ Ya Pita nọ sị a, “Kị haịn ụnụ gi kweri nị ụnụ d'a chọ ihiẹn rị Mmọn-nsọ Di-nwọnni-ẹnyi ọnụ? Lee ẹ, ikorọbịa li di i lala: ụkụ wẹ e rugụọdẹ ọnụmụzọ; wẹ jẹnkọ d'e bupụzị yụ nwẹn!”

¹⁰ Ọ nọ dan alị ụkụ Pita ozigbo, nwụnhụn. Ikorọbịa ahụn a banhan, hụn a n'ọ nwụnhụngụọ, ya wẹ nọ buru ẹ pụ d'e li ẹ nọkunmẹ di ẹ.

¹¹ Ya kẹ okẹn egun nọ tụma ndị ụka Kraịstị ile lẹ ndị ile nụ ihiẹn ndịnị.

Kẹ Ndị-ozi Pụ-ichẹn Dọn Zụọ Ndị Bụ Ọda Emu

¹² Ogẹn hụ, Ndị-ozi ahụn pụ-ichẹn hụ a rụn ọrụn-atụmẹnya lẹ ihiẹn-nghọsị ichẹn-ichẹn imẹ igunrun ndị alị. Ndị ile kwerini hụ e zu Ẹtu-ụlọ Solomọnụ rị Ụlọ-nsọ.

¹³ Onwọnni onyẹ kwerilẹni egun nị tụ ẹhụ d'a bannị wẹ, ọsụọn'a nị ịhịan ile rị e ku oku wẹ ọhụnma.

¹⁴ Ndị bu ọda hụ e kwerini Di-nwọnni-ẹnyi nke-esi, a bannị wẹ, kẹ ikẹnnyẹ kẹ ikpoho.

¹⁵ Wẹ e bupụha ndị emu rị a kụ ọkpụzọ, e bu wẹ a tọ elu ute lẹ ihiẹn ndị ọzọ ịhịan gi e dinẹ, kẹni onyinyọn Pita kunrun ndị o k'e kunrun ọ ghafekọnị.

¹⁶ Igunrun ịhịan hụ a gha alị ndị nọhunmẹ Jerusalẹm a bịa, e wẹhẹ ndị emu rị a kụ lẹ ndị eje-mmọn rị e ye nsọngbu. Wẹ ile hụ a dịnhịn.

A Nwụnrụn Wẹ Ndị-ozi Pụ-ichẹn

¹⁷ Ya kẹ onyẹ-isi nchụn-ẹjan nọ sị ọ gbakọ nkịtịn, ya lẹ ndị ile rị e sọnn'ẹ, ndị itu Sadusi ibe ẹ; wẹ nọ gi ẹnya-ụfụ sọn wẹ:

¹⁸ wẹ nọ nwụnrụn ndị-ozi ahụn pụ-ichẹn tụye imẹ ngan ịhịan ile.

¹⁹ Kanị, uhinhin hụ, mmọn-ozi Di-nwọnni-ẹnyi nọ kpọpụ ụzọ ụlọ-ngan, dupụha wẹ, sị wẹ,

²⁰ “Jẹn ni Ụlọ-nsọ, ụnụ e wuzo ebẹhụ gwachanrịn ịhịan ile oku ndụn ọhụnnị.”

²¹ A nụ wẹ ihiẹnni, eki e fọnhụ, wẹ nọ banye Ụlọ-nsọ d'a kuzimẹ. Ogẹnni, onyẹ-isi nchụn-ẹjan nkẹ lẹ ndị ya lẹ wẹ wị a bịagụọ, kpọ Ọgwa Sahẹdrini, Ndị-isi Nkịkwama alị Izrẹlụ. Ya wẹ nọ zi ịhịan ụlọ-ngan d'e wẹhẹ Ndị-ozi hụ pụ-ichẹn.

²² Kanị, ogẹn ndị e lepụ Ụlọ-nsọ ẹnya wẹ zijẹn gi ru ebẹhụ, ahụnnị wẹ ndị-ozi hụ pụ-ichẹn imẹ ụlọ-ngan, wẹ nọ kinhẹn d'a gwa ndị-isi, sị,

²³ “Kẹ ẹnyi ru ẹ, wẹ kpọkin ụlọ-ngan ọhụnma-ọhụnma; ndị nche turuhụ ọnụmụzọ, kanị ogẹn ẹnyi gi kpọpụ ụzọ, onwọnni onyẹ rị imẹ ẹ.”

²⁴ Onyẹ-isi ndị e lepụ Ụlọ-nsọ ẹnya lẹ Ndị-isi nchụn-ẹjan a nụ ihiẹnni, ọ gba wẹ ngharị-ẹnya, wẹ hụ a jụ enwẹn wẹ ihiẹn rị e mẹni.

²⁵ Ya onyẹ ohu nọ bịa d'a gwa wẹ, sị, “Lee n'ẹ, ndị ụnụ buche imẹ ụlọ-ngan turu imẹ Ụlọ-nsọ a kuzi wẹ!”

²⁶ Ya kẹ onyẹ-isi nlepụ-ẹnya Ụlọ-nsọ lẹ ndị ọ kị nọ jẹnmẹ d'e wẹhẹ wẹ, kanị egun ndị rị ebẹhụ anịnị wẹ gi ikẹn mẹ ẹ, amamgbe w'e gi ọmụma magbu wẹ.

²⁷ E wẹhẹ wẹ wẹ ọgwa, wẹ nọ bu wẹ tumẹ ihun Ndị-isi Nkịkwama ahụn zuni. Ya Onyẹ-isi nchụn-ẹjan nọ jụma wẹ ụtaa,

²⁸ sị, “Ẹnyi a gbagụọnị ụnụ mkpịnsịn-ẹka ẹnya, sị ụnụ egizilẹ ẹfan onyẹni a kuzi? Lee n'ẹ nwan, ụnụ a kuzigbarịgụọ Jerusalẹm ile ihiẹnni, a chọ nị ụnụ bu ẹdeke okẹnnyẹni che ẹnyi isi.”

²⁹ Pita lẹ Ndị-ozi ahụn pụ-ichẹn ibe ẹ nọ za wẹ, sị, “Chuku kẹ ẹnyi jẹnkọ d'e humẹni isi, ẹlẹ ịhịan.

³⁰ Chuku ndị nẹdi ẹnyi kanị weli Jesu hụn ụnụ gbu ghahanị ihogbu ẹ elu osisi.

³¹ Osolobuẹ e weshigụọ a nwan elu, bu ẹ che ẹka-nni ẹ, ebẹhụ ọghọ rị, mẹmẹ ẹ Onyẹ-ndu lẹ Onyẹ-nzụọpụha, kẹni ndị Izrẹlụ gha ẹka a rogharị nwọnhẹn mgbagharị njọ wẹ.

³² Ẹnyi rị nwan a shịa ẹri ihiẹn ndịnị, ẹnyi lẹ Mmọn-nsọ hụn Osolobuẹ ye ndị e humẹn'ẹ isi.”

Ọdụn Gamaliẹlụ Dụn Ndị-isi

³³ Kẹ wẹ nụ ihiẹnni, ize ze wẹ ọda-ọda, wẹ nọ chọ nị wẹ gbu wẹ.

³⁴ Kanị onyẹ ohu imẹ wẹ ẹfan a wụ Gamaliẹlụ, hụn rị Itu-Farisi, nọ lihi ọtọ; onyẹ-nkuzi Iwu Mozizi k'ọ wụ; ịhịan ile a gbaye ẹ. Ọ nọ sị wẹ wepụgụ ndị-ozi ahụn pụ-ichẹn ezi ẹkẹrẹ.

³⁵ Ya ọ nọ sị Ndị-isi Nkịkwama ibe ẹ, “Ikẹnnyẹ Izrẹlụ, lebankwọ nị ihiẹn ụnụ chọ nị ụnụ mẹ ikẹnnyẹ ndịnị ẹnya ọhụnma.

³⁶ Ogẹn mbụ, onyẹ ohu w'a kpọ Tiodasị pụha, kpọ enwẹn ẹ ịhịan, ihiẹn nọ kẹ madụ nnụ nọ sọnmẹ ẹ. Kanị e gbu wẹ ẹ, ndị hụ sọnn'ẹ nọ gbayịya; ọhụn a gụ.

³⁷ Ọhụn e mẹgụ, Judasị onyẹ Galili nọ pụha ogẹn hụ wẹ gi gụn ịhịan, ndị bu ọda nọzị sọnmẹ ẹ. E gbuzikwọ w'a, ndị rị e sọnn'ẹ a gbayịya.

³⁸ “Imẹ okuni rị nwan alị, ndụnmọdụn m jẹnkọ d'e ye ụnụ wụ ọnwan: la nị ndịnị tọ! Hatu nị wẹ! Makẹni, omẹni ihiẹn wẹ bu obi mọbụ ihiẹn wẹ rị e mẹ gha ẹka ịhịan bịa, o k'a dan.

³⁹ Kanị, omẹni ẹka Osolobuẹ k'ọ gha bịa, ụnụ asakọ ẹka kụsị wẹ; o ru ẹ tan, ọ wụrụ nị ụnụ rị a lụsọn Osolobuẹ ọgụn!” Ya wẹ nọ weri ndụnmọdụn a.

⁴⁰ A kpọbanhan wẹ ndị-ozi ahụn pụ-ichẹn, fịan wẹ mkpịnsịn, gba wẹ mkpịnsịn-ẹka ẹnya, sị wẹ ekuzilẹ ihiẹn wẹ rị e gi ẹfan Jesu e ku; ya wẹ nọ hatu wẹ.

⁴¹ Ya kẹ ndị-ozi ahụn pụ-ichẹn nọ gha Ọgwa Ndị-isi Nkịkwama hụ pụha, a ghọghọ nị Osolobuẹ weri wẹ kẹ ndị furuni ebe ọ nọ nị wẹ narịn ifẹnrẹn makẹ Ẹfan Jesu.

⁴² Ụhụọhịn ile, kẹ imẹ Ụlọ-nsọ kẹ ụlọ-ụlọ, wẹ hụ a kuzi, e zi ozi nị Jesu wụ Onyẹ Hụ Osolobuẹ Tumẹ, akụsịnị wẹ kaka akpohu!