Ọrụn Ndị-ozi 4 - Ika

Isi Nke Ẹnọ A Kpọ Wẹ Pita Lẹ Jọnụ Ọgwa Ndị-isi Nkịkwama

¹ Ogẹn Pita lẹ Jọnụ gi rị a gwa ndị alị oku, ndị nchụn-ẹjan lẹ onyẹ-isi ndị e lepụ Ụlọ-nsọ ẹnya lẹ ụfọdụ ndị itu-Sadusi nọ bịa d'e kunrun wẹ.

² Ize hụ e ze wẹ ọda-ọda makẹni wẹ rị e gi oku Jesu a gwa wẹ nị ndị nwụnnị jẹnkọ d'e lihi.

³ Wẹ nọ nwụnrụn Pita lẹ Jọnụ butọgụ ụlọ-ngan d'e ru mgbe eki fọn, makẹni eki e gigụọ.

⁴ Kanị ndị bu ọda nụ ozi Pita wẹ kweri, ya ndị kwerini nọ ru ikẹnnyẹ nnụ-uku isẹn (5,000).

⁵ Eki e fọn, ndị-isi nkịkwama ile nọ zu imẹ Jerusalẹm: kẹ ndị-isi kẹ ndị nkuzi-Iwu

⁶ kẹ Anasị wụ onyẹ-isi nchụn-ẹjan lẹ Kayafasị lẹ Jọnụ lẹ Alẹzanda lẹ ndị ọzọ rị ebọn onyẹ-isi nchụn-ẹjan.

⁷ Wẹ nọ wepụha Pita lẹ Jọnụ ihun wẹ, jụma wẹ, sị, “Elee ikẹn mọbụ ẹfan kẹ ụnụ gi mẹ ihiẹnni?”

⁸ Ya kẹ Pita hụn Mmọn-nsọ jun imẹ ẹ nọ za wẹ, sị, “Ndị-ndu lẹ ndị-isi,

⁹ omẹni ihiẹn rị mma wẹ mẹni onyẹ ngụrọ kẹ wẹ rị a jụnị ẹnyi ụtaa tannị, a jụ kẹ nanị k'o dọn dịnhịn,

¹⁰ ụnụ lẹ ndị Izrẹlụ ile, marịn nị nwan nị ẹfan Jesu Kristi onyẹ Nazarẹtị, onyẹ ụnụ kpọgbu elu-obe, onyẹ Osolobuẹ gha ọnwụn weli, mẹ ẹ ẹhụ gi rị okẹnnyẹni wuzo ihun ụnụ ikẹn.

¹¹ Jesuni wụ ‘Ọmụma hụ’ ụnụ ‘ndị rị a tụn ụlọ jụ’, hụn ‘wụrụ nwan ọmụma gi ụlọ.’

¹² Onwọnni onyẹ ọzọ nzụọpụha gha ẹka a a bịa, makẹni onwọnni ẹfan ọzọ rị okpuru elu-igwee hụn Osolobuẹ ye ịhịan n'o gi nwọn nzụọpụha karị ẹfan Jesu.”

¹³ A hụn wẹ kẹ Pita lẹ Jọnụ dọn rị e ku, e kushi ẹ ikẹn, bụ a marịngụọ wẹ nị ejẹnni wẹ ụlọ-ẹkụkwọ, ejẹnni wẹ ọzụnzụn, ọ tụ wẹ ẹnya; ya wẹ nọ ghọta nị wẹ lẹ Jesu a wịọlẹ haịn.

¹⁴ Kanị ebe o mẹ ni okẹnnyẹ hụ dịnhịnnị turuyeni wẹ ebẹhụ, asanị wẹ ẹka sị wẹ ihiẹn ọwụlẹ.

¹⁵ Ya wẹ nọ sị Pita lẹ Jọnụ yeni wẹ efe ẹkẹrẹ, wẹ ile nọ tụgbama iroro, sị,

¹⁶ “Kị ẹnyi k'e gi ndịnị mẹ? O wegụọ ịhịan ile bi Jerusalẹm ẹnya n'a rụngụọ wẹ ọrụn atụmẹnya pụ-ichẹn — ẹnyi as'ẹka sị o mẹni.

¹⁷ Kanị, amamgbe okuni a kpọkarị ẹnịna, nị ẹnyi dọ wẹ ẹka-ntịn, sị wẹ ezizilẹ ozini wẹ rị e gi ẹfannị e zi.”

¹⁸ Ya wẹ nọ kpọbanhanzị wẹ, gba wẹ mkpịnsịn ẹka ẹnya ọhụnma-ọhụnma wẹ egizilẹ ẹfan Jesu ku oku mọbụ kuzi ihiẹn ọwụlẹ!

¹⁹ Kanị Pita lẹ Jọnụ nọ shịarị wẹ, sị, “Ku ni nwan o mẹni ọ hụghọ mma ẹnya Osolobuẹ nị ẹnyi gọn ụnụ ntịn karị Osolobuẹ;

²⁰ kanị, ẹnyi nwẹn ekubehikọ ihiẹn ẹnyi hụn lẹ ihiẹn ẹnyi nụ.”

²¹ Ogẹn wẹ gi rọngụzị Pita lẹ Jọnụ egun, wẹ nọ hapụ wẹ, ebe o mẹni ahụnnị wẹ ihiẹn wẹ e kwọndọn ẹka ye wẹ afụnfụn, makẹni ịhịan ile rị a ja Osolobuẹ mma yeni ihiẹn mẹni,

²² makẹni okẹnnyẹ hụ wẹ gi ọrụn-atụmẹnyanị zụọ karị nwa ahụa ọgụnnaị.

Ndị Kwerini A Rịọ Osolobuẹ N'o Wepụ Wẹ Egun Ẹnya

²³ Ogẹn wẹ gi hatugụ wẹ, wẹ nọ laburu ndị itu-Kraịstị ibe wẹ. Wẹ nọ gwa wẹ ihiẹn ile ndị-isi nchụn-ẹjan lẹ ndị-isi gwa wẹ.

²⁴ Ogẹn wẹ gi nụ ihiẹnni, wẹ ile nọ gi obi ohu kpọku Osolobuẹ, sị, “Di nwọnni ẹnyi, onyẹ hụn ihiẹn ile rị okpuru ẹ, Onyẹ hụn ke elu-igwere lẹ ụwa lẹ ohimin lẹ ihiẹn ile rị imẹ wẹ,

²⁵ ịyụ gi Mmọn-nsọ ku oku ghahanị ọnụ nẹdi ẹnyi kanị wụ Defidi, hụn wụ odibo i, sị, ‘Kị ndị alị ọzọ rị e buni olulu? Kị ndị alị ichẹn-ichẹn rị e zuni umẹ la iwi?

²⁶ Ndị-nze ụwa e kọnrinsọnmẹ agha; ndị rị a kịnị e zu d'e bunụmanị Di-nwọnni-ẹnyi lẹ Onyẹ hụn o tumẹ.’

²⁷ Ezioku-ezioku, Hẹrọdụ lẹ Pọntius Paịleti lẹ ndị alị ndị ọzọ lẹ ndị Izrẹlụ e zughọ imẹ obodoni, bunụmanị odibo-nsọ ị wụ Jizọsị hụn ị tumẹ.

²⁸ Ya kẹ ihiẹn i kwademẹtọ nọ gha ẹka wẹ bụn.

²⁹ Di-nwọnni-ẹnyi, lee nwan egun wẹ rị e rọn ndị idibo i; dodo ye idibo i obi kushi oku i ikẹn,

³⁰ y'a tịnpụ ẹka zụọ ndị emu rị a kụ, rụn ihiẹn-nghọsị lẹ ọrụn-atụmẹnya ghahanị ẹfan odibo-nsọ ị wụ Jesu.”

³¹ E mẹgụ wẹ ekpereni, ebẹhụ wẹ nọ zu nọ mẹhunmẹ, Mmọn-nsọ nọ jun wẹ ile, wẹ hụ e kushi oku Osolobuẹ ikẹn.

Ndị Ile Kwerini Nwọn Obi Ohu

³² Ndị ile kwerini hụ e gi obi ohu e bi, e ro ihiẹn ohu; onwọnni onyẹ kpọ ihiẹn o nwọn nke ẹ, kama, wẹ weri ẹ nị wẹ ile gba nwọn ihiẹn ile.

³³ Ndị-ozi hụ pụ-ichẹn hụ a rụn okẹn ihiẹn wẹ gi a ghọsịchanrịn nị Di-nwọnni-ẹnyi wụ Jesu a ghagụọ ọnwụn lihi nke-esi; Osolobuẹ hụ e yeni wẹ ẹka ọhụnma-ọhụnma.

³⁴ Onwọnni onyẹ ihiẹn a kọ imẹ wẹ. Makẹni, ndị nwọn alị mọbụ ụlọ hụ e re wẹ, e wẹhẹ egho,

³⁵ e bu a tọnị ndị-ozi ahụn pụ-ichẹn. Ndị-ozi ahụn pụ-ichẹn hụ e ye onyẹ-onyẹ kẹ mkpa a han.

³⁶ Josẹfụ hụn ndị-ozi ahụn pụ-ichẹn tu “Banabasị” (hụn wụ, “Onyẹ nkasị-obi”) e mẹghọ ẹrịra. Josẹfụ wụ onyẹ ebọn Livaị alị Izrẹlụ, kanị alị Saịprọsụ kẹ wẹ nọ mụ a.

³⁷ O repụ alị a, wẹhẹni ndị-ozi ahụn pụ-ichẹn egho o re ẹ.