Ọrụn Ndị-ozi 28 - Ika

Isi Nke Ẹsatọ-kwasị-ọgụn Ihiẹn Pọlụ Mẹ Imẹ Alị Mọl'ta

¹ Ẹnyi a hụngụ isi pụha, ẹnyi nọ chọpụha nị ẹfan alị hụ mirin nọhunmẹ wụ Mọl'ta.

² Ndị alị-ọfịa hụ mirin nọhunmẹ nọ mẹni ẹnyi ẹfọma pụ-ichẹn: a fiyeni wẹ ẹnyi ọkụn nyan makẹ mirin rị e zueni lẹ oyi rị a tụnị, e lee wẹ ẹnyi ọbịa.

³ Pọlụ e kpọnrin nkụn bu ọda, e bu wẹ e che ọkụn, ya kẹ uwowo ọkụn nọ chụpụha agwọ, agwọ hụ nọ fịfịrị Pọlụ ẹka.

⁴ Ndị alị hụ a hụn agwọ hụ k'o kọnrin ẹ ẹka, wẹ nọ sị ibe wẹ, “Eziẹ-eziẹ, okẹnnyẹni wụ izighẹ. Ọsụọn'a n'ọ wanahịngụọ ohimin, eje-ihiẹn o mẹ anịkọ a rị ndụn.”

⁵ Kanị Pọlụ nọ fe agwọ hụ ye imẹ ọkụn, onwọnni ihiẹn mẹ Pọlụ.

⁶ A tọ wẹ e che nị ẹhụ Pọlụ fun mọbụ n'ọ dan idẹnmizi, nwụnhụn. E che wẹ, che-che-che, onwọnni ihiẹn mẹn'ẹ, wẹ nọ kuhutọ ọnụ, sị Pọlụ wụ mmọn.

⁷ Onyẹ-isi alị hụ wụ okẹnnyẹ ohu w'a kpọ Pọbliọsụ. Ịya nwọn alị ndị nọkunmẹ ebahụn ẹnyi rị. Ọ nabanhan ẹnyi, lee ẹnyi ọbịa akpọhịn ẹtọ.

⁸ Ogẹn ahụn, nẹdi Pọbliọsụ dinẹ edinẹ yeni ẹhụ-ọkụn, ọ hụ a nyụn ẹdeke. Pọlụ nọ jẹn d'a hụn a, mẹn'ẹ ekpere, bu ẹka kwasị a, ọ nọ dịnhịn.

⁹ Omẹgụ, ndị ọzọ emu rị a kụ imẹ alị hụ nọ bịama, Pọlụ a zụọ wẹ.

¹⁰ Wẹ nọ mẹsọnmẹ ihiẹn bu ọda gi ye ẹnyi ọghọ. E buzịghọ wẹ ihiẹn ile rị ẹnyi mkpa cheni ẹnyi imẹ ụgbọ-mirin ogẹn ẹnyi gi lakọ.

Ẹnyi A Gha Mọl'ta Shi Rom

¹¹ Ogẹn ifọn ẹtọ gi ghafegụ kẹ ẹnyi gi nwan gha ebẹhụ buli. Ụgbọ-mirin ohu hụn nọdị alị hụ ogẹn oyi lẹ mirin hụ kẹ ẹnyi gi buli. Ụgbọnị gha Alẹzandrịa bịa, ẹfan wẹ deye ẹ wụ “Ejimẹ.”

¹² Ẹnyi nọ kụban obodo Sirakusu, nọdị ebẹhụ akpọhịn ẹtọ.

¹³ Ẹnyi nọ bulizi, gha ebẹhụ shi Regiọm. Eki e fọn, ufere nọ gha ẹbamịn ndịdan-mirin fehẹmẹ, bushimẹ ẹnyi ihun; hụn mẹ ẹ akpọhịn ẹtọ, ẹnyi nọ ru obodo Putioli, ẹhụ Rom.

¹⁴ Ẹnyi nọ hụn ndị kwerini Jesu ebẹhụ. Wẹ nọ sị ẹnyi du wẹ nọdị izuka. Ẹnịna kẹ ẹnyi dọn ru Rom.

¹⁵ Ogẹn ndị kwerini Jesu imẹ Rom gi nụ nị ẹnyi bịa abịa, wẹ nọ ghakwọrị imẹ Rom d'e kunrun ẹnyi: kẹ ndị ru Afịa Apiọsụ kẹ ndị kụsị Ọdụ ndị-ijẹn Ẹtọ. Ogẹn Pọlụ gi hụn wẹ, ọ kpanmịnma Osolobuẹ, ndụn a ban a o gi hụn wẹ.

Ihiẹn Pọlụ Mẹ Imẹ Rom

¹⁶ Ogẹn ẹnyi gi ru Rom, wẹ nọ nị Pọlụ biri nke ẹ, ya lẹ onyẹ-agha e chen'ẹ.

¹⁷ Hụn m'ẹ akpọhịn ẹtọ, ọ nọ kpọ ndị rị e du ndị Ju rị ebẹhụ. A bịagụ wẹ, ọ nọ sị wẹ, “Umunẹ m, onwọnni ihiẹn m mẹ ndị nke ẹnyi: adannị m omẹnalị ndị nẹdi ẹnyi, kanị a nwụnrụnkwọ wẹ m imẹ Jerusalẹm, we m ye ndị Rom.

¹⁸ Ndị Rom a jụgụ m ajụjụ, wẹ nọ chọ nị wẹ hatu m, makẹni onwọnni ihiẹn m mẹ w'e gi ma m ikpe ọnwụn.

¹⁹ Kanị ndị Ju a jụ, ya m nọ gwarị sị wẹ we oku m jẹnni eze-kanị wụ Siza — ẹlẹni m rị e kpe ndị nke ẹnyi.

²⁰ Ya haịn m gi sị nị m hụn ụnụ gwa ụnụ oku, makẹni oku ihiẹn ahụn Izrẹlụ ile rị e lee ẹnya a kẹ m gi rị ẹgannị.”

²¹ Ya wẹ nọ sị Pọlụ, “Ndị rị Judia edehẹtunini ẹnyi ẹhụhụọ-ozi banyeni i; onwọnni onyẹ nke ẹnyi gha ebẹhụ bịa hụn kujatu oku i.

²² Kanị, ẹnyi chọ nị ẹnyi nụ ọnụ ị, makẹni, o mẹ nke itu Jizọsị onyẹ Nazarẹtịnị, ihiẹn ẹnyi marịn wụ nị wẹ rị e kuja oku ẹ ụzọ ile.”

²³ Ya wẹ nọ kaye ụhụọhịn. O ru ụhụọhịn hụ, e ruhẹ wẹ ebẹhụ ọ rị. Gha ụtụntụn d'e ru ẹnyasị ọ hụ a gwa wẹ oku Alị-eze Osolobuẹ, a kọwa, e gi Iwu Mozizi lẹ ihiẹn ndị-amụma ku a lịlịma n'o mẹ wẹ kwerini Jesu.

²⁴ Ụfọdụ nọ kweri ihiẹn o ku, kanị ụfọdụ ekwerini.

²⁵ Wẹ wẹ dọkọ ndọndọ lakọ. Nị wẹ d'a lama, Pọlụ nọ ku oku ohuni: “Ezioku kẹ Mmọn-nsọ ku ogẹn o gi gwa ndị nẹdi ụnụ kanị oku ghahanị ọnụ onyẹ-amụma wụ Azaya, sị,

²⁶ ‘D'e kunrun ndịnị, sị wẹ, “Ụnụ k'a nụ, kanị ụnụ aghọtakọ; ụnụ k'e lee ile, kanị ụnụ ahụnkọ ihiẹn ụnụ rị e lee.”

²⁷ Makẹni obi ndịnị arịzị a ghọta; ntịn wẹ e kinhingụọ; a nyụnmagụọ wẹ ẹnya, amamgbe w'e gi ẹnya wẹ legha ụzọ, gi ntịn wẹ nụ ihiẹn, gi obi wẹ ghọta, gbehutọ, a zụọ m wẹ.’

²⁸ Marịn nị nwan n'e zigụọ wẹ ndị alị ọzọ ozi nzụọpụhanị gha ẹka Osolobuẹ bịa: nị wẹ gọnghọ ntịn!”

²⁹ Ogẹn o gi kugụ ihiẹnni kẹ ndị Ju hụ gi lama, dọkọ ndọndọ.

³⁰ Pọlụ bi nke ẹ ebẹhụ ọrọgbọ ahụa ẹbụọ; ọ hụ a hụn ndị ile rị a chọhan'a;

³¹ ọ hụ e zi ozi Alị-eze Osolobuẹ, a kuzi banyeni Di-nwọnni-ẹnyi wụ Jesu Kristi, e ku ẹ, e kushi ẹ ikẹn, onwọnni onyẹ gbọndọnn'ẹ.