Ọrụn Ndị-ozi 27 - Ika

Isi Nke Ẹsa-kwasị-ọgụn E Gi Wẹ Ụgbọ-mirin Buru Pọlụ Jẹnmẹ Rom

¹ Ogẹn wẹ gi kubepụ a nị ẹnyi k'e jẹn Itali, wẹ nọ bu Pọlụ lẹ ụfọdụ ndị-ngan che ẹka onyẹ-isi agha nta w'a kpọ Juliọsụ, hụn a kị ndị-agha ọgụn-isẹn imẹ itu-agha uku, “Itu-agha Siza”.

² Ẹnyi ile nọ banye ụgbọ-mirin gha Adramitum bịa, hụn rị a kwademẹ n'o jẹn alị rị ichẹn-ichẹn rị mkpẹnrẹn Ohimin imẹ Ẹgbẹrẹ Eshịa hụn wẹ nọ a banye ụgbọ-mirin. Ụgbọ hụ nọ buru ẹnyi. Ẹnyi lẹ Arịstakusu onyẹ Tẹsalonika Ẹgbẹrẹ Masẹdonia wị.

³ Eki e fọn, ẹnyi nọ ru Sidọnụ. Juliọsụ nọ gi ẹka rị mma sọn Pọlụ, nị a jẹn d'a hụn ndị ọwụ a kẹni wẹ yen'ẹ ẹka.

⁴ Ẹnyi nọ gha ebẹhụ buli, ghasọnmẹ mkpẹnrẹn alị Saịprọsụ makẹni ufere ẹnyi kunrun rị e bukin ẹnyi azụụn, ọ nịnị ẹnyi gbasọnmẹ ahanmahan ohimin.

⁵ Ogẹn ẹnyi gi ghafegụ ẹhụ alị Silisia lẹ Pamfilia, ẹnyi nọ nwan fetu pụha Mira hụn rị Ẹgbẹrẹ Lisia.

⁶ Ebẹhụ kẹ onyẹ-isi ndị agha hụ nọ hụn ụgbọ-mirin gha Alẹzandrịa jẹnkọ Itali, ya ọ nọ bu ẹnyi ile che imẹ ẹ.

Kẹ Ụgbọ mirin Dọn Sụkpọ Ijẹn A Fụma Ọrụn

⁷ Ẹnyi nọ gbama ẹkẹrẹ-ẹkẹrẹ akpọhịn ole-lẹ-ole. Ọ fụkẹnmẹkẹ ẹnyi ọrụn nị ẹnyi d'e rudẹ Nidọsụ. Ogẹn ufere gilẹni nị ẹnyi jẹnshi ihun ibẹka ahụn, ẹnyi nọ ghasọnmẹ mkpẹnrẹn Samonẹ hụn rị alị Kriti. Ohimin nọhunmẹ alị Kriti.

⁸ Ẹnyi hụ a gha mkpẹnrẹn-mkpẹnrẹn, kanị ọ fụ ẹnyi ọrụn ọda nị ẹnyi d'e ru ebe w'a kpọ “Ebe-rị-ụgbọ-mma”, hụn nọchimẹ Lasịa.

⁹ Ogẹn a gharịọlẹ ọda-ọda: ndị Ju e bugụọdẹ ọnụ wẹ. Ya wụ, ogẹn eje-ẹbi gi a kpọ ohimin hụ e rugụọ. Ufiri ẹ, Pọlụ nọ dụn wẹ ọdụn: ọ sị wẹ,

¹⁰ “Ekele m ụnụ ile! A hụngụọ m'a nị ihiẹn bu ọda jẹnkọ d'e wiwi, tuhudẹ, omẹni ẹnyi sị nị ẹnyi gbasọnmẹ, ẹlẹdẹ ibu lẹ ụgbọ sụọ, kanị ndụn ẹnyi zị.”

¹¹ Kanị onyẹ-isi agha nta gi ihiẹn onyẹ-isi ụgbọ lẹ onyẹ nwọn ụgbọ ku dọn karị oku Pọlụ.

¹² Ebe o mẹ ni ebeni ụgbọ-mirin a nọdị arị mma ogẹn okẹn oyini mirin a kpụkpụrụnị gi e ziẹn, ndị ka ọda nọ kweri n'ọ ka mma nị ẹnyi jẹnmẹ, nị ikẹnkwọ ọ nị wẹ ru Finisi hụn ụgbọ e ziẹntọzị alị Kriti d'a nọdịgụ, makẹni Finisi bu ihun ohu zinmẹ ẹgbata ẹbamịn ọdịdan-ẹnyanwụn lẹ ẹbamịn-ugu, bu ihun ohu zinmẹ ẹgbata ẹbamịn ọdịdan-ẹnyanwụn ahụn lẹ ẹbamịn ndịdan-mirin.

Eje-ẹbi A Kpọma

¹³ Ogẹn ufere rẹbẹrẹbẹ hụn a gha ẹbamịn ndịdan-mirin a bịa gi femẹ, wẹ ro ni a hụn wẹ ihiẹn wẹ chọ; wẹ nọ tọpụ ụgbọ ebe wẹ limẹ ẹ, gbama mkpẹnrẹn Kriti.

¹⁴ Kanị o ke mẹ emẹ, okẹn ufere jọgbu enwẹn ẹ w'a kpọ “Ọ gha ẹbamịn-ugu e shi ọwụwa-ẹnyanwụn” nọ gha Kriti kpọha.

¹⁵ Ọ nọ kpọma ụgbọ hụ ọda-ọda, ọ nịzịnị wẹ hutọ ụgbọ hụ zinmẹ ẹ. Ya ẹnyi nọ la ụgbọ tọnị ufere, ufere e buru ẹnyi jẹnmẹ!

¹⁶ Ẹnyi e ru alị ohu mẹ ẹkẹrẹ w'a kpọ Kọda, hụn gbọndọnni ẹnyi ufere ẹkẹrẹ, wẹ nọ lịlịma dọzụnhanchanrịn ụgbọ-nta wẹ limẹye ụgbọ hụ.

¹⁷ Ya wẹ nọ dọbanhan ụgbọ-nta hụ imẹ ụgbọ. Wẹ nọ tụ eriri ye ihun ụgbọ hụ, we ẹ gha a okpuru, gi ẹ kẹnkẹnmẹ ẹ. Makẹni egun rị a tụ wẹ amamgbe w'a sụnkunmẹ ẹjan ubom-ohimin rị mkpẹnrẹn Sẹtisi; amamgbe ụgbọ ghazị a gbakẹnrin, wẹ nọ tọlụa ẹkwa wẹ tanma ufere gi e bu ụgbọ hụ. Kanị ufere hụkwọ e bu ụgbọ.

¹⁸ Makẹni ẹbi hụ a kpọkẹnmẹkẹ ẹnyi, ogẹn eki gi fọn, wẹ nọ tụma ibu e ye imẹ mirin.

¹⁹ Hụn m'ẹ akpọhịn ẹtọ, wẹ nọ gidẹ ẹka wẹ kpọn ihiẹn wẹ gi e dọnzi ụgbọ-mirin ye imẹ ohimin.

²⁰ Ẹnyi nọlẹni hụn kẹ ẹnyanwụn kẹ kokisẹ akpọhịn ole-lẹ-ole, bụ ẹbi hụkwọ a kpọ ẹnyi ọda-ọda, ẹnyi erozini nị ẹnyi jẹnkọ d'a hụn isi pụha kaka.

Pọlụ A Nọ Imẹ Nsọngbu Hụ Kasị Wẹ Obi

²¹ Makẹni ẹfọ kpakin wẹ kete-ele-mgbe, Pọlụ nọ turu ọtọ imẹ igunrun wẹ, sị, “Ikẹnnyẹ, nkẹ ụnụ e gọn m ntịn nọdị Kriti. Omẹni ụnụ te gọn m ntịn, iwini ile eke ti nwan.

²² Kanị, m rị nwan a rịọ ụnụ, kwọndọn ni obi ụnụ makẹni onwọnni onyẹ jẹnkọ d'a nwụn imẹ ụnụ — ụgbọnị sụọ jẹnkọ d'a la iwi.

²³ Makẹni mmọn-ozi hụn Chuku nwọnni m m rị a rụnnị ọrụn zihẹ a bịaghọ hụn uhinhin d'e kunrun m.

²⁴ Ọ sị m, ‘Pọlụ! Atụlẹ egun, i k'e tururịrị ihun eze-kanị wụ Siza. Ọzọzị, Osolobuẹ e yegụọ ị ndụn ndị yụ lẹ wẹ rị imẹ ụgbọ: anwụnkọ wẹ.’

²⁵ Kwọnkẹnmẹ ni nwan obi ụnụ, ikẹnnyẹ, makẹni m gi Osolobuẹ dọn ẹnya n'o jẹnkọ d'a rị k'o dọn gwa m,

²⁶ kanị ụgbọnị apụhakọ, o k'a sụnkunmẹrịrị ẹjan.”

²⁷ Imẹ uhinhin hụn m'ẹ akpọhịn mmẹnọ, ogẹn ẹbiri-mirin hụ gi bukọ ụgbọ ẹnyi elu Ohimin Adrịa, o ru ihiẹn nọkẹ etintinnaị abalị, ndị a rụn imẹ ụgbọ nọ kumẹ n'ọ nọ kẹ sị alị rị nsue.

²⁸ Ya wẹ nọ gi eriri wẹ kẹnmẹye igwe lele kẹ mirin mihan, wẹ nọ hụn a n'o k'e luepụ ogwe-nkụ ẹnọ; a gbaberi wẹ, wẹ nọ lelezi ẹ, wẹ nọ hụn a n'o miruzini ẹrịra, n'o k'e luepụ ogwe-nkụ ẹtọ sụọ.

²⁹ Ya egun nọ tụma wẹ nị ẹnyi jẹnkọ d'e ti ọmụma, wẹ nọ shi ibe azụụn, gbatọpụ eriri ihiẹn igwe ẹnọ ọnụ wẹ mẹ suẹn-suẹn-suẹn wẹ gi e limẹ ụgbọ, nị, ikẹnkwọ o zudọn alị, wẹ nọ rịọma nị eki fọn.

³⁰ Kanị, ndị ahụn a rụn ọrụn imẹ ụgbọ nọ wetu ụgbọ-nta ye imẹ mirin, chọma nị wẹ gepụ, gi ụgbọ-nta ahụn gbapụ; wẹ hụ e mẹ nọ kẹ sị wẹ rị a gbatọpụ ihiẹn wẹ gi e limẹ ụgbọ hụn rị ihun.

³¹ Ya kẹ Pọlụ nọ sị onyẹ-isi agha nta lẹ ndị-agha a, “Mmanị ikẹnnyẹni nọdị imẹ ụgbọnị, ụnụ ile k'a nwụn.”

³² Ya kẹ ndị-agha hụ nọ bepụ eriri wẹ gi kwọndọn ụgbọ-nta hụ.

³³ Ụzụtụntụn biribiri, Pọlụ nọ rịọ wẹ ri ihiẹn-oriri, ọ sị, “Tannị mẹ ẹ akpọhịn mmẹnọ obi kọnrin ụnụ elu ẹnịna, ẹfọ kpakin ụnụ, ụnụ erini ihiẹn-anaị.

³⁴ Dodo ni nwan, ri ni ihiẹn-oriri, n'o yeghọnị ụnụ ẹka rị ndụn, onwọnni akpụ ntutu ohu rị ụnụ isi k'e tuhuni.”

³⁵ O kugụ, ọ nọ weri brẹdi, ye Osolobuẹ ekele idẹnya wẹ ile, beri, rimẹ.

³⁶ Ya ndụn nọ ban wẹ ile, wẹ nwẹn nọ rimẹ ihiẹn-oriri.

³⁷ (Ẹnyi ile rị ụgbọ hụ rị madụ mmisin kwasị ọgụn-mmẹtọ — 276.)

³⁸ Ogẹn wẹ ile gi rijunchanrịngụ ẹfọ, wẹ nọ tụ ọka-witi họdụ imẹ ụgbọ ye imẹ mirin makẹ ụgbọ gha a nyịnzị.

Ụgbọ Hụ E Tikpọchanrịn

³⁹ Eki e fọn, wẹ nọ legha alị wẹ marịnlẹni, hụnzịkwọ ngugu-mirin ẹjan rị mkpẹnrẹn alị hụ. Ya wẹ nọ sị wẹ k'a nyanban ụgbọ ebẹhụ, omẹni o k'a nị wẹ mẹ.

⁴⁰ Wẹ nọ tọpụ igwe ndị hụ e zudọn alị ye imẹ mirin, a tọlụlụa wẹ eriri ndị hụn kwọndọnsọnmẹ amaran wẹ gi a nyan ụgbọ ahụn, e seshi wẹ ẹkwa rị ibe ihun ufere gi e bu ụgbọ elu buzinmẹchanrịn ufere n'o bushikẹnmẹdẹ ụgbọ ihun, ụgbọ-mirin hụ nọ dọn ihun ngugu-mirin.

⁴¹ Kanị ẹnyi nọ sụnkunmẹ ẹjan nọ kẹ mgbọn. Ibe ihun a tọ ebẹhụ, ọ rịzị e mẹhunmẹ, ẹbiri-mirin hụ a kpụkpọpụ ibe azụụn.

⁴² Ndị-agha hụ te nọ chọ nị wẹ gbukwama ndị-ngan hụ, amamgbe w'e gu mirin gbapụ.

Onwọnni Onyẹ Nwụnnị

⁴³ Kanị, makẹni onyẹ-isi wẹ achọnị nị ihiẹn mẹ Pọlụ, ọ nịnị wẹ mẹ ihiẹn wẹ chọ. Ọ sị ndị ma gu mirin wẹ bu ụzọ pụ, wẹ tụban imẹ mirin gushi akpakalị,

⁴⁴ ndị họdụnị e kwọndọnsọnmẹ ibe-osisi lẹ ibe ihiẹn ichẹn-ichẹn tikpọpụ imẹ ụgbọ hụ hụn ru wẹ ẹka, gi shiẹnrin elu mirin pụha. Ẹrịra kẹ wẹ ile mẹ ru akpakalị; onwọnni onyẹ nwụnhụnnị.