Ọrụn Ndị-ozi 26 - Ika

Isi Nke Isin-kwasị-ọgụn Pọlụ E Kin Ọnụ A Ihun Agripa

¹ Agripa nọ sị Pọlụ, “Kin nwan ọnụ ị.” Ya Pọlụ nọ tịnpụ ẹka, kinmẹ:

² “Agụ!! M weri ẹ nị Chuku a gọzikẹ m ebe o mẹ ni ihun i kẹ m jẹnkọ d'a nọ kinrin ọnụ m tannị imẹ ihiẹn ile ndị Ju rị e ku nị ya kẹ m mẹ —

³ makẹni y'a marịngụọ ọdịnalị ndị Ju ile lẹ oku ile w'a dọ, marịn a ru alị. Dodo, nwọn nwan ndidin gọn m ntịn.

⁴ “Ndị Ju ile a marịnghọ kẹ m dọn bi gha alị lala, kẹ imẹ alị wẹ nọ mụ m kẹ imẹ Jerusalẹm.

⁵ Omẹni wẹ te k'e ku ezioku, a marịngụọ wẹ ketekete nị m te wụ onyẹ itu-Farisi, itu kachanrịn e ze imẹ ofufe ẹnyi lẹni m'e bi obibi ndị Itu-Farisi.

⁶ Kanị wẹ rị nwan ebeni e kpe m ikpe makẹni m rị e lee ẹnya ihiẹn Osolobuẹ kwe ndị nẹdi ẹnyi wẹ kanị nkwa;

⁷ ihiẹn hụ ikpụlọ mmẹbụọ ndị nke ẹnyi rị e lee ẹnya a, e gi ufiri ẹ e feshi Osolobuẹ ikẹn ukinkin lẹ efinnaị. Eze, olilẹnyanị m nwọn wụ eje-ihiẹn hụ ndị Ju sịkwọ nị ya kẹ m mẹ!

⁸ Kị haịn o gi a fụ ụnụ ọrụn ikweri nị Osolobuẹ e weli ndị nwụnnị?

⁹ “Ezioku-ezioku, mmẹ nwẹn e te roghọ n'o furu ni m mẹ ihiẹn ile m'e gi gbọndọn ẹfan Jizọsị onyẹ Nazarẹtị.

¹⁰ E mẹghọ m'a imẹ Jerusalẹm. M'a narịndẹ ndị-isi nchụn-ẹjan ikẹn ogẹn hụ, a tụ ndị kwerini Jesu ngan; ẹlẹdẹ ọhụn sụọ, wẹ ma wẹ ikpe-ọnwụn, e biye m ẹka.

¹¹ M'a ghasọnmẹ ụlọ-ofufe ile, e ye wẹ afụnfụn, e mẹ wẹ e kuja oku Jesu. Olulu wẹ bu m ọda-ọda, nke wụ nị m'e jẹndẹ obodo ndị ọzọ d'e kpokpo wẹ.

Pọlụ A Kọwa K'o Dọn Gbehutọ

¹² “E kpokpo m wẹ d'e ru ebe m nọ narịn ndị-isi nchụn-ẹjan ikẹn lẹ ẹkụkwọ jẹnmẹ Damaskọsụ.

¹³ “Eze, kẹ m rị ụzọ ogẹn anwụn gi a rị isi, ya m nọ hụn kẹ ukpẹ nwunnahịn ẹnyanwụn gha elu-igwee nwunkpu mmẹ lẹ ndị mmẹ lẹ wẹ wị.

¹⁴ Ẹnyi ile nọ dan. Ya m nọ nụ olu gi asụsụ Hibru sị m, ‘Sọlụ, Sọlụ, k'ị rị e kpokponi m? Ị rị a rụhụ enwẹn i ẹhụ nọkẹ okẹn-efin rị a gba ẹgbe di-nwọnn'ẹ ụkụ.’

¹⁵ M nọ sị, ‘Di-nwọnni m, onyẹ k'ị wụ?’ Ya Di-nwọnni-ẹnyi nọ shịarị m, ‘Mmẹ wụ Jesu hụn ị rị e kpokpo.

¹⁶ Lihi nwan turu ọtọ. M we enwẹn m ghọsị ị kẹni m tumẹ i odibo m lẹ ọshẹri hụn k'a gwa ndị ọzọ ihiẹn ndị ị hụn lẹ ihiẹn ndị m jẹnkọ d'a ghọsị ị.

¹⁷ M k'a gbapụha ị ẹka ndị nke ụnụ, ndị Izrẹlụ, gbapụha ị ẹka ndị alị ọzọ m zikọ ị d'e kunrun.

¹⁸ M zikọ ị d'a shịapụ wẹ ẹnya, kẹni wẹ pụha imẹ ishi shi imẹ ukpẹ, pụha okpuru Ekwensụ buru Osolobuẹ, kẹni Osolobuẹ gbagharị wẹ njọ, ye wẹ ọnọdị imẹ ndị wẹ gi okweri wẹ kwerini m dọn nsọ.’

Pọlụ E ku Oku Ọrụn A

¹⁹ “Agụ, enupụnị m nwan isi ihiẹn m hụn imẹ ọhụn hụ gha elu-igwee bịa.

²⁰ Kama, e zimẹ m ozi hụ imẹ Damaskọsụ ebẹhụ. E zigụ m ndị rị Damaskọsụ ozi hụ, m nọzị zi ẹ imẹ Jerusalẹm lẹ ẹgbẹrẹ Judia ile, zizikwọ ndị alị ndị ọzọ ya, a sị wẹ rogharị buru Osolobuẹ, bimẹ kẹ ndị rogharịnị.

²¹ Ihiẹnni kẹ ndị Ju gi kwọndọn m imẹ Ụlọ-nsọ, a chọ nị wẹ gbu m.

²² Kanị Osolobuẹ hụ e yeni m ẹka d'e rukwọ nwan tannị; ya kẹ m gi wuzo ebeni a shịa ẹri, a gwa kẹ onyẹ uku kẹ onyẹ-nta okuni. Arị m e ku ihiẹn ọzọ karị ihiẹn ndị-amụma lẹ Mozizi ku n'o jẹnkọ d'e mẹ:

²³ nị Kraịstị k'a tarịrị afụnfụn; n'o k'a wụrụ onyẹ ibuzọ gha ọnwụn lihi; n'o k'e wẹhẹni kẹ ndị alị ẹnyi kẹ alị ndị ọzọ ozi ukpẹ.”

²⁴ Ebe Pọlụ ri e kin ọnụ a, Fẹstọsụ nọ weshi olu elu, yi, “Ẹra rị a pụ ị, Pọlụ! Okẹn-ẹkụkwọ rị a pụ ị ẹra!”

²⁵ Kanị Pọlụ nọ sị, “Ezi Gọvanọ wụ Fẹstọsụ, ẹra arị a pụ m! Ezioku we ẹnya kẹ m rị e ku.

²⁶ Eze wụ Agripa lẹ enwẹn ẹ a marịngụọ ihiẹn ndịnị, ya haịn m gi a gwapụ a ya ẹnịna. E gighọ m'a dọn n'o nwọnni ihiẹn w'a kọn'a imẹ ihiẹn ndịnị, makẹni emẹni wẹ nzuzue.

²⁷ Agripa Agụ, y'e kwerighọ ihiẹn ndị-amụma ku? A marịnghọ m nị y'e kwerighọ.”

²⁸ Agripa nọ sị Pọlụ, “Ị chọ n'i mẹ m wụrụ onyẹ nke Kraịstị ozigbo-ozigbo?”

²⁹ Pọlụ nọ shịarị, sị, “Ihiẹn m rị a rịọ Osolobuẹ wụ nị ẹlẹdẹ yụ sụọ, kanị, kẹ ịyụ kẹ ndị ọzọ ile rị e gọn m ntịn tannị rị kẹ mmẹ — wezụka ẹgan ndịnị wẹ kpọma m, k'o mẹ ẹgwa, k'o mẹni ẹgwa!”

³⁰ Ebẹhụ kẹ eze lẹ Gọvanọ wụ Fẹstọsụ lẹ Bẹnaịsị lẹ ndị ọzọ wẹ lẹ wẹ gba nọdị alị nọ lihi ọtọ.

³¹ Wẹ pụkọ, wẹ hụ a sị ibe wẹ, “Onwọnni ihiẹn okẹnnyẹni rị e mẹ hụn w'e gi gbu ẹ mọbụ tụ a ngan.”

³² Agripa nọ sị Fẹstọsụ, “Nkẹ w'a hatu okẹnnyẹni ye omẹni ẹlẹ hụn ọ sị wẹ we oku ẹ jẹnni eze-kanị wụ Siza.”