Ọrụn Ndị-ozi 25 - Ika

Isi Nke Isẹn Kwasị Ọgụn Pọlụ Sị Wẹ Bu Oku Ẹ Jẹnni Eze-kanị

¹ Hụn mẹ ẹ akpọhịn ẹtọ Fẹstọsụ bịa d'a kịma Ẹgbẹrẹ hụ, ọ nọ gha Sizaria jẹn Jerusalẹm.

² Ya kẹ ndị-isi nchụn-ẹjan lẹ ndị-isi ndị Ju nọ kpe Pọlụ ẹka Fẹstọsụ, rịọ a

³ n'o mẹ ọhụnma zihẹni wẹ Pọlụ Jerusalẹm. E zugụọ wẹ eje-umẹ wẹ e gi gbu Pọlụ ụzọ ọ lalanị.

⁴ Fẹstọsụ nọ za wẹ, sị, “Sizaria kẹ wẹ butọ Pọlụ; m kinkọ ebẹhụ ẹgwa.

⁵ Ndị isi ụnụ wẹ sọnjẹn m nwan Sizaria, nị wẹ d'e kpe okẹnnyẹ hụ ebẹhụ, omẹni o nwọn eje-ihiẹn o mẹ.”

⁶ Fẹstọsụ anọkarịnị akpọhịn ẹsatọ mọbụ iri imẹ igunrun wẹ, ọ nọ lakin Sizaria. Eki e fọn, wẹ nọ bịa ọgwa a. Ọ nọ nọdị elu Oche Okinkin-ikpe, zi wẹ d'e wẹhẹ Pọlụ.

⁷ Ogẹn Pọlụ gi pụha, ndị Ju hụ gha Jerusalẹm bịa nọ fihunmẹ ẹ, kinmẹ eje-ihiẹn bu ọda jọgbu enwẹn ẹ wẹ sị nị ya k'o mẹ, bụ asanị wẹ ẹka ghọsị nị ezioku rọ.

⁸ Kanị Pọlụ nọ kin ọnụ a, sị, “Adannị m iwu ndị Ju mọbụ iwu Ụlọ-nsọ mọbụ iwu eze-kanị wụ Siza.”

⁹ Kanị Fẹstọsụ chọ n'o channị ndị Ju ẹnya, ya ọ nọ jụ Pọlụ, “Y'a chọghọ n'ị jẹn Jerusalẹm, nị m nọ ebẹhụ kin i ikpeni?”

¹⁰ Pọlụ nọ sị, “Ọgwa eze-kanị wụ Siza tumẹ kẹ m rị hụnnị, ebe furu wẹ k'a nọ kin m ikpe. Onwọnni eje-ihiẹn m mẹ ndị Ju kaka, yụ nwẹn a marịngụọ ọhụnma-ọhụnma.

¹¹ Omẹni m mẹ eje-ihiẹn hụn w'e gi gbu m, arị m a sị wẹ e gbulẹ m. Kanị, omẹni onwọnni hụn m mẹ imẹ ihiẹnni ile wẹ rị e kin, onwọnni onyẹ k'a saẹka bu m che wẹ ẹka. We ni m nwan jẹnni eze-kanị wụ Siza n'o gi ẹka a kin m ikpe!!”

¹² Fẹstọsụ lẹ ndị a dụn a ọdụn e kugụ, Fẹstọsụ nọ sị Pọlụ, “Y'a sịgụọ wẹ we i jẹnni eze-kanị wụ Siza; Siza ahụn k'i burukọ.”

E Wẹhẹ Wẹ Pọlụ Ihun Hẹrọdụ Eze Ndị Ju

¹³ Ọ nọbe, eze rị a kị ndị Ju wụ Agripa lẹ okpoho w'a kpọ Bẹnaịsị nọ bịa Sizaria d'a sị Fẹstọsụ alụa.

¹⁴ A nọpụ wẹ ebẹhụ akpọhịn ole-lẹ-ole, Fẹstọsụ nọ wepụhanị eze hụ oku Pọlụ, sị, “O nwọn okẹnnyẹ ohu Fẹlisi latọ ngan;

¹⁵ ogẹn m gi jẹn Jerusalẹm, ndị-isi nchụn-ẹjan lẹ ndị-isi ndị Ju nọ wepụha oku ẹ, sị m ma a ikpe.

¹⁶ Kanị, m nọ sị wẹ nị ẹnyi ndị Rom ara we ịhịan ye ndị kpen'ẹ ebe ya lẹ wẹ kelẹni kin elee-m elee-i, ọ hụn oghere kinringụ ọnụ a.

¹⁷ “Ogẹn wẹ gi nwan zu ebeni, egbuni m ogẹn: eki e fọn, m nọ kpọ ọgwa, a nọdị m alị Oche Okinkin-ikpe, zi wẹ wẹhẹ okẹnnyẹ hụ.

¹⁸ Ndị kpen'ẹ nọ kin, kanị ẹlẹ eje-ihiẹn m ro nị ya rị e se kẹ wẹ kin.

¹⁹ Kama, wẹ nọ kinsọnmẹ oku ofufe hụn wẹ lẹ Pọlụ rị a dọ lẹ oku okẹnnyẹ ohu w'a kpọ Jizọsị, hụn nwụnhụngụnị kanị Pọlụ hụ e ku ẹ e kushi ẹ ikẹn n'ọ rị ndụn.

²⁰ Amarịnzị m kẹ m'e mẹ chọpụha alị oku ndịnị, ya m nọ jụ Pọlụ k'ọ chọghọ n'o jẹn Jerusalẹm, nị m nọ ebẹhụ kin ẹ ikpeni.

²¹ Kanị ogẹn Pọlụ gi sị ẹnyi la a tọ ebeni d'e ru ni eze-kanị wụ Siza e gi ẹka a kin ikpeni, ya m nọ sị wẹ kwọndọn ẹ d'e ru mgbe m saẹka zi ẹ jẹnni Siza.”

²² Ya Agripa nọ sị Fẹstọsụ, “Nkẹ ọ sụọ m nị m gi ntịn m nụ ọnụ okẹnnyẹni.” Fẹstọsụ nọ sị a, “Ekile y'a nụ ọnụ a.”

²³ Eki e fọn nwan, Agripa lẹ Bẹnaịsị nọ gi okẹn ọghọ ndị-nze banhan ebẹhụ hi ogbe wẹ nọ e zu ọgwa, wẹ lẹ ndị-isi agha kanị lẹ ndị wẹ marịn amarịn imẹ obodo hụ. Fẹstọsụ nọ sị wẹ kpọha Pọlụ.

²⁴ Fẹstọsụ nọ sị, “Eze wụ Agripa lẹ ịhịan ile rị ebeni, lee ni okẹnnyẹni ndị Ju ile rị e kpe ẹka m, kẹ imẹ Jerusalẹm kẹ ebeni, e yi n'o furuzini n'ọ rị ndụn.

²⁵ Mmẹ nwẹn ahụnnị njọ o mẹ hụn wẹ e gi ma a ikpe ọnwụn. Kanị, hụnnị ọ sị ẹnyi we ẹ jẹnni eze-kanị wụ Siza, e kwerighọ m nị m jẹnkọ d'e zi ẹ jẹnn'ẹ.

²⁶ Bụ ahụnnị m nwan ihiẹn m'e kwọndọn ẹka dejẹnni nna m wụ Siza ẹkụkwọ. Agripa, ịya haịn m gi nwan wepụha a ebeni ụnụ ile rị, tụmadụ ebe yụ lẹ enwẹn i wụ eze rị, kẹni ẹnyi jụgụ a ajụjụ, ikẹnkwọ a hụn m ihiẹn m'e kwọndọn ẹka de ẹkụkwọ-ozi hụ.

²⁷ Makẹni, ọ jọgbu enwẹn ẹ nị m zi onyẹ-ngan jẹnni eze-kanị bụ onwọnni ihiẹn m kpọ ẹfan nị ịya k'o mẹ.”