Ọrụn Ndị-ozi 24 - Ika

Isi Nke Ẹnọ-kwasị-ọgụn Ihiẹn Rị E Seni ndị Ju Lẹ Pọlụ

¹ Hụn mẹ ẹ akpọhịn isẹn wẹ wẹhẹ Pọlụ ọgwa Gọvanọ imẹ Sizaria, Ananayasị onyẹ-isi nchụn-ẹjan lẹ ụfọdụ Ndị-isi lẹ ọka-iwu w'a kpọ Tẹtulọsụ nọ bịa ọgwa Gọvanọ d'e kpe Pọlụ ẹka Gọvanọ.

² A kpọpụha wẹ Pọlụ, ya Tẹtulọsụ nọ kinghọsị Gọvanọ, sị, “Onyẹ ikpẹn ile rịnị, ọkịkị ị e wẹhẹgụọnị ẹnyi udọn kete-ele-mgbe; ezigbo iroro y'a tụ hụ e dọnzini ndị alịnị ihiẹn.

³ Ogẹn ile lẹ ụzọ ile kẹ ẹfọ gi a sụọ ẹnyi ụsụọ ọda-ọda yeni ihiẹn ndịnị.

⁴ Amamgbe m'e rikẹ i ogẹn, dodo gọn ẹnyi ntịn ẹkẹrẹ k'i dọn e mẹ, nị m be oku nke-nke.

⁵ “Ẹnyi a hụngụọ a nị okẹnnyẹni e ye nsọngbu ọda-ọda. Isusu-isusu k'o seni ndị Ju rị elu ụwa ile. Ọ rị ndị-ndu itu Onyẹ Nazarẹtị ahụn.

⁶ O te rị nwan a chọ n'o mẹrụdẹ Ụlọ-nsọ, ya kẹ ẹnyi nọ nwụndọn ẹ. Nkẹ ẹnyi e te gi Iwu ẹnyi kin ẹ ikpe,

⁷ kanị Laịsịasị onyẹ-isi agha kanị nọ gi ikẹn bịa d'a napụ ẹnyi ya, sị ndị ikpe ẹ bịa d'e kunrun i.

⁸ Ị jụkpọ a, yụ lẹ enwẹn i k'a saẹka marịn ihiẹn ile ẹnyi rị e ku nị ya k'o mẹ.”

⁹ Ndị Ju ya lẹ wẹ wị nọ kwadọn Tẹtulọsụ, a sị ihiẹn ile o ku wụ ezioku.

Pọlụ E Kinrin Ọnụ A Ihun Fẹlisi

¹⁰ Ogẹn Gọvanọ gi fe ẹka gi sị Pọlụ ya ku nwan, ya Pọlụ nọ sị, “A marịngụọ m nị y'a hanọlẹ eṅẹn alịnị ahụa ole-lẹ-ole; ya wụ, ọsụọka m nị m rị e kinrin ọnụ m ọgwa ị.

¹¹ Ị k'a saẹka chọpụha n'ọ karịnị akpọhịn mmẹbụọ m jẹn Jerusalẹm d'e fe ofufe.

¹² Onwọnni onyẹ ọwụlẹ wẹ hụn mmẹ lẹ ịya rị a dọ ndọndọ imẹ Ụlọ-nsọ; onwọnni igunrun wẹ hụn m rị a kpasu — kẹ imẹ ụlọ-ofufe kẹ imẹ obodo hụ ile;

¹³ asakọ wẹ ẹka ghọsị nị m mẹ ihiẹnni ile wẹ rị e kin.

¹⁴ Kanị m k'a saẹka gwa ị nị Ụzọ hụ wẹ rị e ye eje-ẹfan kẹ m gha e fe Osolobuẹ ndị nẹdi ẹnyi kanị; m kweri ihiẹn ile Iwu Mozizi ku lẹ ihiẹn ile wẹ de imẹ ẹkụkwọ ndị-amụma.

¹⁵ Ihiẹn ohu hụ ndịnị rị e lee ẹnya a ẹka Osolobuẹ kẹ mmẹ nwẹn rịzị e lee ẹnya a: nị ndị nwụnhụnnị jẹnkọ d'e lihi, kẹ ndị ezi-omumẹ kẹ ndị njọ.

¹⁶ Ufiri ẹ kẹ m gi a lịlịma ogẹn ile, kẹni m hụn a nị obi m rị ọchan ebe Osolobuẹ lẹ ịhịan rị.

¹⁷ “M bịa nwan Jerusalẹm m bịalẹni kete ahụa ole-lẹ-ole d'e ye ndị igbẹnnyẹ ẹnyi ihiẹn lẹni m hụn ụzọ chụn ẹjan.

¹⁸ Ịya kẹ wẹ nọ nwan hụn m imẹ Ụlọ-nsọ kẹ m mẹgụ omẹnalị idọn-nsọ; onwọnni igunrun mmẹ lẹ wẹ wị; onwọnni isusu rịnị.

¹⁹ Kanị o te nwọnghọ ndị Ju gha Ẹgbẹrẹ Eshịa bịa rị ebẹhụ ụhụọhịn hụ, k'o furu wẹ lẹ enwẹn wẹ bịa nwan ebeni d'e ku ọnụ wẹ idẹnya ị, omẹni o nwọn ihiẹn m mẹ!

²⁰ “Omẹni ntụ rọ, jụdẹle ndịnị rị ebeni kẹ elee eje-ihiẹn kẹ wẹ chọpụha nị ya kẹ m mẹ kẹ m pụha Ọgwa Ndị-isi Nkịkwama,

²¹ mmanị oro ohuni m yi kẹ m wuzo ihun wẹ: ‘Ụnụ rị e kinkwọ m ikpe tannị makẹni m kweri nị ndị nwụnhụnnị jẹnkọ d'e lihi!’ ”

²² Kanị Gọvanọ wụ Fẹlisi nọ bu ikpe hụ shi ihun, makẹni ọ marịnghọ Ụzọ-Jesu ru alị: ọ sị wẹ, “Ụnụ jẹnkọ d'e cheri nị Laịsịasị onyẹ-isi agha kanị bịa m kebe hannị ụnụ eṅẹn.”

²³ Ọ nọ sị onyẹ-isi agha nta rị okpuru ẹ ya hụn a nị wẹ kwọndọn Pọlụ, ka wẹ e yen'ẹ efe ẹkẹrẹ, a nị ndị nke ẹ a bịa d'e yen'ẹ ẹka.

Pọlụ A Gwa Gọvanọ Lẹ Nwunyẹ Ẹ Oku-Chuku

²⁴ O mẹpụ akpọhịn ole, Fẹlisi lẹ nwunyẹ ẹ wụ Drusila nọ bịa. Drusila wụ onyẹ Ju. Fẹlisi nọ zi wẹ kpọ Pọlụ. Wẹ nọ gọnmẹ ẹ ntịn, ọ hụ a gwa wẹ oku ikweri ni Jesu Kristi.

²⁵ K'o dọn rị e ku oku ezi-omumẹ lẹ ikwọndọn-enwẹn ịhịan lẹ Okinkin-ikpe lalanị, egun nọ tụma Fẹlisi. Ọ nọ sị, “I k'e jẹnmẹgụ, m k'a chọ efe kpọzị ị.”

²⁶ Ọ hụzị a tụ ẹnya nị Pọlụ jẹnkọ d'e ye ẹ egho; ọ hụ e gi ufiri ẹ e zi wẹ a kpọ Pọlụ mbụ-lẹ-ẹbụọ, e sọn ẹ e ku.

²⁷ Ahụa ẹbụọ a ghafegụ, Pọshiọsụ wụ Fẹstọsụ nọ họnrin Gọvanọ, nọkin ẹnya Fẹlisi. Fẹlisi rị a chọ n'ọ channị ndị Ju ẹnya, ọ nọ la Pọlụ tọ imẹ ngan.