Ọrụn Ndị-ozi 23 - Ika

Isi Nke Ẹtọ-kwasị-ọgụn

¹ Pọlụ nọ bu ẹnya tụma Ndị-isi Nkịkwama hụ, sị, “Umunẹ m, e giọlẹ m obi rị ọchan bi elu m idẹnya Osolobuẹ d'e ru tannị.”

² Ya onyẹ-isi nchụn-ẹjan wụ Ananayasị nọ sị ndị nọkunmẹ Pọlụ fịan a ihiẹn ọnụ.

³ Ya Pọlụ nọ sị a, “Osolobuẹ k'a fịan yụ nwẹn ihiẹn, ụsụọ ẹjan rịlẹni mma wẹ te nzụn!! Ị gi nwan Iwu e kin m ikpe, bụ ị hụ a dan Iwu ebe ị nọ sị wẹ fịan m ihiẹn?!”

⁴ Ndị hụ nọchimẹ Pọlụ nọ sị a, “Egun a n'ị kpari onyẹ-isi nchụn-ẹjan Osolobuẹ?”

⁵ Pọlụ nọ sị, “Umunẹ m, amarịn m nị onyẹ-isi nchụn-ẹjan rọ; makẹni Ẹkụkwọ-nsọ sị, ‘Ekujalẹ oku onyẹ-ndu ụnụ.’ ”

Pọlụ E Gi Akọ Wanahịn

⁶ Ogẹn Pọlụ gi hụn a nị ụfọdụ Ndị-isi Nkịkwama hụ wụ ndị itu Sadusi, ụfọdụ wụ ndị Itu-Farisi, o weshi olu elu, sị, “Umunẹ, m wụ onyẹ Farisi maị, nwa onyẹ Farisi! Wẹ rị e kpe m ikpeni makẹ olilẹnya m nwọn nị ndị nwụnhụnnị jẹnkọ d'e lihi!”

⁷ Ogẹn o gi ku okuni, ndị itu-Farisi lẹ ndị itu-Sadusi rị imẹ Ndị-isi Nkịkwama hụ nọ dọma ndọndọ, ọgwa nọ kebe.

⁸ Makẹni ndị Sadusi kweri nị ndị nwụnhụnnị ara lihi, ndị mmọn-ozi arị, mmọn arị. Kanị, ndị Farisi kweri nị wẹ ẹtịtọ rị arị.

⁹ Ọgbaghara e jun ọgwa hụ: ụfọdụ ndị-nkuzi Iwu rị itu Farisi e lihi ọtọ, dọ okuni, dọshi ẹ ikẹn, a sị, “Ẹnyi ahụnnị eje-ihiẹn okẹnnyẹni mẹ. Onyẹ ma kẹ mmọn mọbụ mmọn-ozi gwa a oku?!”

¹⁰ Ogẹn isusu hụ gi kẹnrẹn, egun nọ bịa onyẹ-isi agha kanị nị w'e d'a dọkịka Pọlụ, ya ọ nọ sị ndị-agha a wẹ d'e gi ikẹn napụha wẹ Pọlụ, wekin ẹ idumu ndị-agha.

¹¹ Uhinhin hụ, Di-nwọnni-ẹnyi nọ pụha d'e wuzo ihun Pọlụ, sị a, “Kwọndọn obi i, n'o nwọnni ihiẹn k'a napụ ị ashịalẹni m ẹri imẹ Rom k'i dọn nwan shịanị m'a imẹ Jerusalẹm ebeni.”

E Zuni Wẹ Pọlụ Eje-umẹ Nị Wẹ Gbu Ẹ

¹² Eki e fọn ụtụntụn, ụfọdụ ndị Ju nọ zugbama, kun Osolobuẹ, sị erikọ wẹ, arakọ wẹ, d'e ru ni e gbugụ wẹ Pọlụ.

¹³ Wẹ karị madụ ọgụnnaị zu izuni.

¹⁴ Ya wẹ nọ jẹnburu Ndị-isi nchụn-ẹjan lẹ Ndị-isi, sị wẹ, “Ẹnyi e kungụọ Osolobuẹ kwe nkwa nị ẹnyi erikọ ihiẹn ọwụlẹ d'e ru ni ẹnyi e gbugụ Pọlụ.

¹⁵ Ụnụ lẹ Ndị-isi Nkịkwama, zi ni nwan ozi jẹnni onyẹ-isi agha kanị, n'o wẹhẹni ụnụ Pọlụ. Kun'ẹ nọkẹ sị ụnụ chọ nị ụnụ lebankẹnmẹ oku ẹ ẹnya; ẹnyi nwẹn a kwademẹgụọ nị ẹnyi gbu ẹ o gini d'e ru ebeni.”

Kẹ Pọlụ Dọn Wanahịn Ọnwụn Kẹ Eje-umẹ Wẹ Zuni Pọlụ Dọn Wa

¹⁶ Kanị okorọbịa ohu wụ nwa-nwẹnẹ Pọlụ okpoho a nụ oku eje-umẹni wẹ zu, ya ọ nọ shi idumu ndị-agha d'a gwa Pọlụ.

¹⁷ Pọlụ nọ kpọ onyẹ-isi agha nta ohu rị ebẹhụ, sị a, “We okorọbịanị jẹnni onyẹ-isi agha kanị, n'o nwọn ihiẹn o k'a gwa a.”

¹⁸ Onyẹ-isi agha nta hụ nọ weri okorọbịa hụ d'e kunrun onyẹ-isi agha kanị, sị, “Onyẹ-ngan wụ Pọlụ kpọ m, sị m wẹhẹn'i nwata-okẹnnyẹni n'o nwọn ihiẹn o k'a gwa ị.”

¹⁹ Onyẹ-isi agha hụn kanị nọ kwọndọn nwata hụ ẹka, we ẹ shi ụsụọ, jụma a, “K'i nwọn y'a gwa m?”

²⁰ Ọ nọ sị a, “Ndị-ndu ndị Ju e kwerigbamagụọ nị wẹ k'a sị ị wẹhẹ Pọlụ Ọgwa Ndị-isi Nkịkwama ekile, nọkẹ sị ndị-isi chọ nị wẹ lebankẹnmẹ oku ẹ ẹnya.

²¹ Kanị, egọnkwọlẹ wẹ ntịn, makẹni ikẹnnyẹ wẹ karị ọgụnnaị warị ọfịa e che ẹ. E kungụọ wẹ Osolobuẹ, nị erikọ wẹ, arakọ wẹ d'e ru mgbe wẹ gbugụ a; a kwademẹgụọ wẹ nwan e che n'i kweri wẹhẹ ẹ.”

²² Onyẹ-ndu agha kanị nọ sị a, “Agwakwọlẹ onyẹ ọwụlẹ nị y'a gwagụọ m.” Ya ọ nọ sị okorọbịa hụ lama.

Kẹ Ndị Agha Dọn Zụọpụha Pọlụ

²³ Ya onyẹ-isi agha kanị nọ kpọ ndị-isi agha nta ẹbụọ a kị ndị agha ọgụn-isẹn, ọgụn-isẹn, sị wẹ, “Kwademẹ ni nị ụnụ jẹn Sizaria: weri ni ndị-agha ọgụn-iri e gi ụkụ e jẹn, ndị-agha iri kwasị ọgụn-ẹtọ e gi ẹshin a lụ agha lẹzi ndị-agha ọgụn-iri e gi obo a lụ agha. Kwademẹ ni nị ụnụ gi ọkụrọkụ itenẹi ukinkinni jẹnmẹ;

²⁴ kwademẹ ni ni Pọlụ ẹshin o k'e nyin, ụnụ e du ẹ jẹnni Gọvanọ wụ Fẹlisi; anịkwọlẹ ni ihiẹn ọwụlẹ mẹ ẹ.”

²⁵ Ya onyẹ-isi agha kanị nọ de ẹkụkwọ-ozini:

²⁶ “Mmẹ, Klọdiọsụ wụ Laịsịasị rị e dejẹnni Gọvanọ wụ Fẹlisi; e kele m'i.

²⁷ Ndị Ju kwọndọn okẹnnyẹni, a chọ nị wẹ gbu ẹ. Ogẹn m gi marịn nị nwa-di-alị Rom rọ, ya m nọ weri ndị-agha d'a gbapụha a.

²⁸ Makẹni m chọ nị m marịn ihiẹn wẹ rị a man'a ikpe, m nọ we ẹ jẹn Ọgwa Ndị-isi Nkịkwama wẹ.

²⁹ A hụn m'a nị oku Iwu wẹ kẹ wẹ rị a man'a ikpe; n'o nwọnni ihiẹn o mẹ hụn w'e gi tụ a ngan mọbụ gbu ẹ.

³⁰ Ogẹn ozi gi ru m ntịn nị wẹ zun'ẹ eje-umẹ, m nọ sị nị m zihẹ n'i y'ẹ ozigbo. A gwagụọ m ndị-ikpe ẹ d'e kunrun i, nị wẹ nọ idẹnya ị ku ihiẹn wẹ sị nị ya k'o mẹ.”

Ọ Kẹrẹghọ Wẹ We Pọlụ Jẹnni Gọvanọ

³¹ Ya kẹ ndị-agha hụ nọ mẹ ihiẹn o ku, gi uhinhin we Pọlụ shikwọrị Antipatrisi,

³² eki e fọn, ndị gi ụkụ nọ lakin, hapụ ndị gi ẹshin nị wẹ lẹ Pọlụ wịrị.

³³ E ru wẹ Sizaria, wẹ nọ we ẹkụkwọ-ozi hụ ye Gọvanọ, we Pọlụ ye ẹ.

³⁴ Ọ gụngụ ẹkụkwọ-ozi hụ, ọ nọ jụ Pọlụ kẹ elee Ẹgbẹrẹ k'ọ wụ imẹ alị-eze Rom. Ogẹn o gi nụ nị onyẹ Ẹgbẹrẹ Silisia rọ,

³⁵ ọ nọ sị, “Ndị-ikpe i bịa, a nụ m ọnụ ị.” Ọ nọ sị ndị-agha kwọndọngụ a imẹ obi-eze Gọvanọ ebẹhụ, obi-eze ahụn Hẹrọdụ tụn ebẹhụ.