Ọrụn Ndị-ozi 22 - Ika

Isi Nke Ẹbụọ-kwasị-ọgụn

¹ Pọlụ sị wẹ, “Umunẹ m lẹ ndị nẹdi ẹnyi, gọn ni ntịn nị m kọwa!”

² Ogẹn wẹ gi nụ k'ọ rị a sụ asụsụ wẹ wụ Hibru, wẹ nọ gbakẹnmẹ nkịtịn. Ya Pọlụ nọ kumẹ:

³ “M wụ onyẹ Ju. Tasọsụ rị Ẹgbẹrẹ Silisia kẹ wẹ nọ mụ m, kanị imẹ Jerusalẹm ebeni kẹ wẹ nọ zụn m. Gamaliẹlụ zụn m. Wẹ zụn m ọzụnzụn Iwu ndị nẹdi ẹnyi kanị, zụnru m alị; m'e te dụnnị Osolobuẹ kẹ ọkụn kẹ ụnụ ile dọn rị a dụnn'a tannị.

⁴ E kpokpoghọ m ndị rị e sọn Ụzọnị, kpokpo wẹ ru ọnwụn. M'a kpọma kẹ ikẹnnyẹ kẹ ikpoho ẹgan, a tụ wẹ ngan.

⁵ Onyẹ-isi nchụn-ẹjan lẹ ndị-isi k'a saẹka shịanị m ẹri. A narịnghọdẹ m wẹ ẹkụkwọ m wekọnị ndị Ju rị Damaskọsụ kẹni m d'a kpọma ndị rị ebẹhụ rị e sọn Ụzọnị ẹgan, wẹhẹ wẹ Jerusalẹm d'e ye afụnfụn.

Pọlụ E Ku K'o Dọn Rogharị

⁶ “Ogẹn m gi jẹnkọ, e rumẹ m Damaskọsụ ogẹn anwụn gi e ru isi, ukpẹ ohu nwungbu enwẹn ẹ nọ gha elu-igwee nwunkpu m idẹnmizi.

⁷ A dan m, m nọ nụ olu sị m, ‘Sọlụ, Sọlụ, k'ị rị e kpokponi m?’

⁸ M nọ za, sị, ‘Onyẹ k'ị wụ, Di-nwọnni m?’ Ọ nọ sị m, ‘Mmẹ wụ Jesu onyẹ Nazarẹtị hụn ị rị e kpokpo.’

⁹ Ndị hụn mmẹ lẹ wẹ wị a hụnghọ ukpẹ hụ, kanị anụnị wẹ olu onyẹ hụn rị a gwa m oku.

¹⁰ Ya m nọ sị, ‘Di-nwọnni m, kị m'e mẹ nwan?’ Di-nwọnni-ẹnyi nọ sị m, ‘Lihi ọtọ n'ị shi Damaskọsụ — ebẹhụ kẹ wẹ k'a nọ gwa ị ihiẹn ile Osolobuẹ ketọn'ị i jẹnkọ d'e mẹ.’

¹¹ Ebe o mẹni asazịnị m ẹka legha ụzọ makẹni ukpẹ hụ e nwunkẹnmẹkẹ, ndị mmẹ lẹ wẹ wị nọ kwọndọn m ẹka, we m banye imẹ Damaskọsụ.

¹² “Imẹ Damaskọsụ, o nwọn okẹnnyẹ ohu w'a kpọ Ananayasị, hụn e fe ofufe Iwu Mozizi ọhụnma-ọhụnma. Ndị Ju ile bi ebẹhụ e ku oku ẹ ọhụnma.

¹³ Ọ nọ bịa d'e kunrun m, turu ihun m, sị, ‘Sọlụ nwẹnẹ m, leghamazị ụzọ!’ Ozigbo, m nọ leghamazị ụzọ, m nọ hụn a.

¹⁴ Ya ọ nọ sị, ‘Osolobuẹ ndị nẹdi ẹnyi a họrịgụọ ị n'ị marịn uche ẹ, n'ị hụn Onyẹ hụ Rị-ọchan, nụzịkwọ kẹ o gi olu ẹ gwa ị oku.

¹⁵ Makẹni i jẹnkọ d'a wụ ọshẹri ẹ, hụn k'e we ozi ẹ jẹnni ụwa ile, a gwa wẹ ihiẹn ị hụn lẹ ihiẹn ị nụ!

¹⁶ K'ị rị nwan e che?! Lihi nị wẹ mẹ i mirin-Chuku, kẹni wẹ chanchanpụ ị njọ ị ebe i nọ a kpọku ẹfan a.’

Kẹ Osolobuẹ Dọn Kpọ Pọlụ

¹⁷ “Ogẹn m gi lụagụ Jerusalẹm, ebe m rị imẹ Ụlọ-nsọ ụhụọhịn ohu e mẹ ekpere, idẹnmizi, ọ nọkẹ sị ụran buru m bụ ẹlẹ ụran,

¹⁸ m nọ hụn ọhụn. M nọ hụn Jesu k'ọ rị a sị m, ‘Mẹ nwan n'ị gha Jerusalẹm pụ ozigbo, makẹni, anabanhankọ wẹ ẹri i k'a shịanị m.’

¹⁹ Ya m nọ sị, ‘Di-nwọnni-ẹnyi, wẹ lẹ enwẹn wẹ a marịnghọ kẹ m dọn jẹnsọnmẹ ụlọ-ofufe ile, e gbu ndị kwerinin'i ili, a tụ wẹ ngan;

²⁰ a marịnzịghọ wẹ nị m wuzo ụsụọ ụhụọhịn hụ wẹ gbu ọshẹri i wụ Stivini, a kwadọn ndị rị e gbun'ẹ, lẹni mmẹ kwọndọnni ndị rị e gbun'ẹ ẹwuru wẹ.’

²¹ Ya ọ nọ sị m, ‘Jẹnmẹ! M zikọ ị ebe tegbu enwẹn ẹ d'e kunrun ndị alị ọzọ wụlẹni ndị Ju.’ ”

²² Igunrun ahụn hụ e gọn Pọlụ ntịn d'e ru ebe ọ nọ ku okuni, wẹ nọ yimẹ, “Wepụ nị onyẹ nọ ẹnịna imẹ ụwanị! O furuni onyẹ a rị ndụn!!”

²³ Wẹ hụ e yi, e fe ẹkwa wẹ, a bụọshi uzunzun elu.

²⁴ Ya onyẹ-isi agha kanị hụ nọ sị ndị-agha a weban nwan Pọlụ idumu ndị-agha wẹ wekọ a; sị wẹ fịan a mkpịnsịn n'ọ hụn ụzọ ku ihiẹn ndị Ju gi rị e yisọn ẹ oroni ile.

²⁵ Kanị ogẹn wẹ gi kẹnmẹ ẹ nị wẹ fịan a ihiẹn, Pọlụ nọ sị onyẹ-isi agha nta ohu turu ebẹhụ, “Iwu ndị Rom e kwerighọ nị ụnụ fịan nwa-di-alị Rom ihiẹn bụ ahangbuni w'ẹ eṅẹn?”

²⁶ Ogẹn onyẹ-isi agha nta hụ gi nụ ihiẹnni, ọ nọ jẹnburu onyẹ-isi agha kanị, sị a, “K'ị chọ n'i mẹ? Okẹnnyẹ hụ wụkwọ nwa-di-alị Rom!”

²⁷ Ya kẹ onyẹ-isi agha kanị nọ jẹn d'e kunrun Pọlụ, sị a, “Gwa m, ị wụ nwa-di-alị Rom?” Pọlụ nọ sị a, “Ẹghẹẹ.”

²⁸ Onyẹ-isi agha kanị nọ sị, “Ẹlẹkwọ ẹkẹrẹ egho kẹ m kụ wụrụ nwa-di-alị Rom!” Kanị Pọlụ nkẹ nọ sị a, “Mmẹ nwẹn, wẹ mụdẹ m nwa-di-alị Rom.”

²⁹ Ozigbo hụ, ndị ile te k'a fịan Pọlụ mkpịnsịn kẹn'o ku ihiẹn mẹni nọ seri isi wẹ; egun hụ a tụ onyẹ-isi agha kanị hụnnị ọ hụn n'ọ kpọmagụọ Pọlụ nwa-di-alị Rom ẹgan.

E Wejẹn Wẹ Pọlụ Ọgwa Ndị-isi Nkịkwama Izrẹlụ

³⁰ Ogẹn eki gi fọn, makẹni onyẹ-isi agha kanị chọkọ n'ọ marịn ihiẹn ndị Ju rị e kpeni Pọlụ, ọ nọ kpọpụ Pọlụ ẹgan, kpọzu ndị-isi nchụn-ẹjan lẹ ndị-isi ile. Ya ọ nọ wẹhẹ Pọlụ, bu ẹ tumẹ ihun wẹ.