Ọrụn Ndị-ozi 21 - Ika

Isi Nke Ohu-kwasị-ọgụn Pọlụ E Jẹnmẹ Jerusalẹm

¹ Ndị-isi ụka Ẹfẹsọsụ a hagụ ẹnyi ụla, ẹnyi nọ gi ụgbọ-mirin jẹnmẹ; ẹnyi nọ ghafe ozigbo shi Kọsụ; eki e fọn, ẹnyi nọ ru Rodisi; ẹnyi nọ gha ebẹhụ shi Patara.

² Ẹnyi a hụn ụgbọ-mirin jẹnkọ Finishịa, ẹnyi nọ banye, jẹnmẹ.

³ Ẹnyi e ru ebe ẹnyi nọ leghama alị Saịprọsụ, ẹnyi nọ nu ẹ ye azụụn ẹka-ekpẹn, nyanshi Ẹgbẹrẹ Siria; ẹnyi e ru ẹ, ẹnyi nọ kụsị imẹ alị Taya, makẹni ebẹhụ kẹ ụgbọ ahụn jẹnkọ d'a nọ butu ibu.

⁴ Ẹnyi nọ chọrị ndị rị e sọn Ụzọ-Jesu ebẹhụ, sọn wẹ nọdị izuka ohu. Ghahanị ikẹn Mmọn-nsọ wẹ nọ sị Pọlụ ya ejẹnlẹ Jerusalẹm.

⁵ Kanị, ogẹn ẹnyi lẹ wẹ gi nọgụ, ẹnyi nọ pụ, jẹnmẹzi ebe ẹnyi jẹnkọ. Wẹ ile lẹ inyẹnmẹ wẹ lẹ ụmụ wẹ nọ gha imẹ obodo hụ dupụha ẹnyi, durukwọrị ẹnyi mkpẹnrẹn ohimin. Ya ẹnyi ile nọ sekpu alị mkpẹnrẹn mirin ebẹhụ mẹ ekpere,

⁶ ẹnyi nọ sị ibe ẹnyi nọdị ọhụnma. Ẹnyi nọ banye ụgbọ-mirin jẹnmẹ, wẹ nwẹn nkẹ nọ lama.

⁷ Ẹnyi nọ gha Taya bulizi, pụha Tọlemaịsị; ẹnyi nọ kele umunẹ ẹnyi imẹ Kraịstị rị ebẹhụ, sọn wẹ nọdị akpọhịn ohu.

⁸ Eki e fọn ẹnyi e buli, ru Sizaria. Ya ẹnyi nọ shi iwe Filipu hụn e zisọnmẹ oziọma d'e sọn ẹ nọdị. Filipu rị imẹ Madụ Ẹsa hụ wẹ họpụha imẹ Jerusalẹm ogẹn mbụ.

⁹ Ụmụ Filipu ịgbagba ẹnọ e bu amụma.

¹⁰ Ẹnyi nọdị ebẹhụ akpọhịn ole-lẹ-ole. Ẹnyi rị ebẹhụ, onyẹ-amụma ohu w'a kpọ Agabusu nọ gha Judia bịa.

¹¹ Ọ nọ bịa d'e kunrun ẹnyi: o weri akpụkpọ-ukun Pọlụ, gi ẹ kẹnmẹ enwẹn ẹ ụkụ lẹ ẹka; ọ nọ sị, “Mmọn-nsọ sị, ‘Ẹnịna kẹ ndị Ju rị Jerusalẹm k'a dọn kẹnmẹ onyẹ nwọn akpụkpọ-ukunni, bu ẹ che ẹka ndị alị ọzọ.’ ”

¹² Ogẹn ẹnyi gi nụ ihiẹnni, ẹnyi lẹ ndị ọzọ rị ebẹhụ nọ rịọma Pọlụ y'e jẹnlẹ Jerusalẹm.

¹³ Ya kẹ Pọlụ nọ sị, “Kị ụnụ rị e mẹdẹ — a kwan ẹkwan, e tiwa m obi? A kwademẹgụọ m nị m jẹnkọ Jerusalẹm, ọsụọn'a nị wẹ k'e kẹn m ẹgbụn, ọ sụọdẹn'a nị m k'e gi ufiri ẹfan Di-nwọnni-ẹnyi wụ Jesu nwụnhụn ebẹhụ.”

¹⁴ O kwerini hụn ẹnyi ku, onwọnzini ihiẹn ẹnyi ku karị, “Uche Di-nwọnni-ẹnyi ya mẹ.”

¹⁵ Ẹnyi a nọbe ebẹhụ, ẹnyi nọ kwademẹ, shi Jerusalẹm.

¹⁶ O nwọn ndị rị e sọn Ụzọ-Jesu gha Sizaria sọnmẹ ẹnyi, we ẹnyi shi ebe ẹnyi jẹnkọ d'a nọdị, iwe Mnasịnị onyẹ Saịprọsụ, onyẹ ohu imẹ ndị ibuzọ kwerini.

Ihiẹn Ndị-isi Sị Pọlụ Ya Mẹni Ụka Rị Jerusalẹm

¹⁷ Ẹnyi e ru Jerusalẹm, ndị e sọn Jesu a ghọghọ, sị ẹnyi a lụa.

¹⁸ Eki e fọn, ẹnyi lẹ Pọlụ nọ wịrị d'a hụn Jemisi; ndị-isi ụka ile rịzịkwọ ebẹhụ.

¹⁹ Pọlụ e kelegụ wẹ, ọ nọ gi uri-uri kọwachanrịn nị wẹ ihiẹn ile Osolobuẹ gi ọrụn a mẹ imẹ ndị alị ọzọ.

²⁰ A nụgụ w'a, wẹ nọ ja Osolobuẹ mma. Ya wẹ nọ sị a, “Pọlụ nwẹnẹ ẹnyi, y'a hụnọlẹ nwan ndị Ju madụ nnụ ole-lẹ-ole kwerini Jesu. Wẹ ile rị e mẹ oku Iwu Mozizi.

²¹ A gwagụọ wẹ wẹ n'ị rị a kuzi ndị Ju ile bisọnmẹ alị ndị ọzọ wẹ latọ Iwu Mozizi, a sị wẹ akwazịlẹ ụmụ wẹ ugun, w'e gizilẹ Iwu Mozizi bi.

²² Kị ẹnyi e mẹ nwan? Wẹ k'a nụrịrị nị y'a bịagụọ.

²³ Mẹ nwan ihiẹnni ẹnyi jẹnkọ d'a gwa ị: O nwọn ikẹnnyẹ ẹnọ rị ebeni gi ẹfan Osolobuẹ kwe nkwa imẹ ụlọ-nsọ.

²⁴ Weri ikẹnnyẹ ndịnị; yụ lẹ uwẹ wịrị jẹn d'e mẹzu ọdịnalị idọn-nsọ: y'a kụnị wẹ ụgwọ w'e gi kọpụ wẹ ntutu. Ịhịan ile sikọ d'e gi ẹ marịn nị ezioku arị ihiẹn wẹ nụ, kama, nị yụ lẹ enwẹn i e gidẹ Iwu Mozizi e bi.

²⁵ O mẹ nke ndị alị ọzọ kwerini Jesu, ẹnyi e dejẹngụọnị wẹ ẹkụkwọ-ozi sị wẹ erilẹ ihiẹn wẹ gi rụa mmọn; w'e rilẹ ẹdeke mọbụ anụ ọwụlẹ wẹ rụkwọn olu; w'a ghẹrẹlẹ.”

²⁶ Ya kẹ Pọlụ nọ weri ikẹnnyẹ ndị ahụn, eki e fọn ya lẹ wẹ nọ jẹnmẹ d'e mẹ omẹnalị idọn-nsọ. E mẹgụ wẹ omẹnalị idọn-nsọ, ọ banye Ụlọ-nsọ d'e ku akpọhịn ole wẹ k'e gi dọn nsọ hụ wẹ kebe chụnnị onyẹ-onyẹ ẹjan.

A Nwụnrụn Wẹ Pọlụ Imẹ Ụlọ-nsọ

²⁷ Kanị, akpọhịn ẹsa hụ e d'e zugụ, ụfọdụ ndị Ju gha Ẹgbẹrẹ Eshịa bịa a hụn Pọlụ imẹ Ụlọ-nsọ, ya wẹ nọ kpasu igunrun hụ ile, wẹ nọ kwọndọn Pọlụ,

²⁸ yimẹ, “Ndị Izrẹlụ! Bịa nị-o! Ọnwan wụ okẹnnyẹ ahụn rị a ghahunmẹ ebe ile e gi nkuzi ẹ a lụsọn ndị alị ẹnyi lẹ Iwu ẹnyi wụ Iwu Mozizi lẹ Ụlọ-nsọnị ọgụn. Ẹlẹdẹ ọhụn sụọ, o webanhangụọzị nwan ndị alị ọzọ imẹ Ụlọ-nsọ, mẹrụ ebeni rị nsọ!”

²⁹ Wẹ ku ihiẹnni makẹni wẹ hụn Trofimọsụ onyẹ Ẹfẹsọsụ lẹ Pọlụ imẹ obodo — wẹ ro ni Pọlụ e webanhangụọ a imẹ Ụlọ-nsọ.

³⁰ Obodo hụ ile nọ susuhu, ịhịan ile nọ gbakikomẹ. Wẹ nọ kwọndọn Pọlụ, dọkpụnpụ a, kpọkinsọnmẹ ọnụmụzọ Ụlọ-nsọ ozigbo.

³¹ Ogẹn wẹ gi rị a chọ nị wẹ gbu Pọlụ, ozi nọ ru onyẹ-isi agha kanị a kị ndị-agha Rom rị Jerusalẹm ntịn nị Jerusalẹm ile e susuhu.

³² Ozigbo ahụn, onyẹ-isi agha kanị nọ weri ndị-agha lẹ ndị a kịnị wẹ, gbatu, zụnban imẹ igunrun ahụn. Igunrun hụ a hụn ndị-agha hụ, wẹ nọ gbubehi Pọlụ.

³³ Onyẹ-isi agha kanị nọ jẹnburu Pọlụ, nwụnrụn a. Ọ nọ sị wẹ kpọma a ẹgan ẹbụọ; ya ọ nọ sị wẹ, “Onyẹ wụ okẹnnyẹni? K'o mẹ?”

³⁴ Igunrun ahụn hụ e yi oro: ndịnị hụ e yi ichẹn, ndịnị hụ e yi ichẹn. Onyẹ-isi agha kanị asazịnị ẹka chọpụha ihiẹn mẹni yeni okẹn isusu hụ. Ya ọ nọ sị ndị-agha a we Pọlụ shi imẹ idumu ndị-agha.

³⁵ E jẹnru wẹ mgbanyinrin rị ọnụ-mgbọn, ya kẹ ndị-agha hụ nọ bushi Pọlụ elu makẹni ẹnya rị e nwun igunrun hụ ọkụn.

³⁶ Igunrun ahụn hụ e sọn wẹ, e yi, “Gbu n'ẹ! Gbu n'ẹ!”

Pọlụ E Kinrin Ọnụ A

³⁷ Ogẹn ndị-agha hụ gi rị a chọ nị wẹ weri Pọlụ banye idumu wẹ, Pọlụ nọ sị onyẹ-isi agha kanị, “N'i kweri nị m gwa ị oku?” Onyẹ-isi agha kanị hụ nọ jụma a, “Y'a sụ Griki?

³⁸ Ya wụ, ẹlẹ yụ wụ onyẹ Ijiptu hụ bunụmanị ndị-ọkịkị, hụnnẹi kị ndị ịkpatan nnụ iri ahụn kwashi imẹ atụ?”

³⁹ Pọlụ nọ sị, “M wụ onyẹ Ju. Tasọsụ rị Ẹgbẹrẹ Silisia kẹ wẹ nọ mụ m. M wụ nwa di-alị Tasọsụ, obodo rị mkpa. Dodo, nị m gwa ndịnị oku.”

⁴⁰ Hụn onyẹ-isi agha kanị gi ye ẹ efe ku, Pọlụ nọ wuzo elu mgbanyinrin hụ, fe ẹka ni wẹ gba nkịtịn. A gba wẹ nkịtịn, Pọlụ nọ gi asụsụ wẹ wụ Hibru gwama wẹ oku.