Ọrụn Ndị-ozi 20 - Ika

Isi Nke Ọgụn Pọlụ E Jẹn Masẹdonia Lẹ Alị Grisi D'e Zi Oziọma

¹ Ogẹn isusu hụ gi kụsịgụ, Pọlụ nọ kpọkikomẹ ndị e sọn Ụzọ-Jesu; ọ gbagụ wẹ umẹ, sịgụ wẹ nọdị ọhụnma, ọ nọ shi Masẹdonia.

² Ọ ghagbarịgụ ẹgbẹrẹ hụ ile, kugụ ihiẹn bu ọda gi gba ndị kwerini Jesu azụụn hụ umẹ, ọ nọ shi alị Grisi;

³ ọ nọ nọdị Grisi ebẹhụ ifọn ẹtọ. Ogẹn o gi nwan chọ n'o gi ụgbọ-mirin lakin Ẹgbẹrẹ Siria, ọ nọ marịn nị ndị Ju zun'ẹ eje-umẹ, ọ nọ gwarị sị n'ọ ghashi Masẹdonia lakin Siria.

⁴ Ịya lẹ ndịnị wị: Sopata nwa Paịrusu, onyẹ Bẹrịa; Arịstakusu lẹ Sekọndusu, ndị Tẹsalonika; Gayọsụ onyẹ Debẹ; lẹ Timoti; lẹzi ndị Eshịa wụ Taịkikọsụ lẹ Trofimọsụ.

⁵ Wẹ nọ bu ụzọ jẹnmẹ Trasị d'e cheri ẹnyi lẹ Pọlụ.

⁶ Ogẹn mmẹmmẹ Brẹdi nwọnlẹni yisti o gi a fụ a ghafegụ, ẹnyi nwẹn nọ gi ụgbọ-mirin gha Filipi buli, hụn m'ẹ akpọhịn isẹn, ẹnyi nọ kunrun wẹ imẹ Trasị; ẹnyi nọ nọdị ebẹhụ izuka ohu.

Ọrụn Pọlụ Rụn Imẹ Trasị Kẹ Pọlụ Dọn Welizi Yutikọsụ Nwụnnị

⁷ O ru ụhụọhịn ibuzọ imẹ izuka (hụn wụ nwan Sọnde), ogẹn ẹnyi gi nọgbama nị ẹnyi ri Oriri-nsọ, Pọlụ nọ gwama wẹ oku; ebe o mẹ ni eki fọnhụ, ọ lama, ọ nọ kusọnmẹ oku hụ d'e ru imẹ abalị.

⁸ Ukpẹ e bughọ ọda mmughẹ hụ rị ibe-elu ẹnyi nọ rị e zu.

⁹ Okorọbịa ohu ẹfan a wụ Yutikọsụ nọdị alị elu windo. Ogẹn Pọlụ gi kube oku, ezigbo ụran nọ tụma Yutikọsụ; ọ tụbe ẹ, ọ nọ buru ẹ. Ọ nọ gha windo ụlọ hụ mẹ wẹ agba ẹtọ dan; a bịa wẹ d'e weli ẹ, wẹ nọ hụn n'ọ nwụnhụngụọ.

¹⁰ Pọlụ nọ hidan: o hulụa, fiedọn Yutikọsụ, sị, “Atụlẹ ni egun, nị ọ hụ ndụn.”

¹¹ Ya Pọlụ nọ shizi ibe-elu hụ ẹnyi nọ e zu. O bebegụ brẹdi Oriri-nsọ yegụ ẹnyi ri, ọ nọ gwabiezi wẹ oku eki e we fọn; ya kẹ ọ nọ jẹnmẹ.

¹² Wẹ nwẹn nọ weri nwata-okẹnnyẹ hụ lẹ ndụn lama. Ihiẹnni gba wẹ umẹ ọda-ọda.

Pọlụ Gi Ogẹn Rụn Ọrụn A

¹³ Ẹnyi nwẹn nọ banye ụgbọ-mirin jẹnmẹgụ obodo Asọsụ, ebe Pọlụ jẹnkọ d'a nọ banyeni ẹnyi imẹ ụgbọ-mirin hụ. Ẹnịna kẹ Pọlụ ku ẹ, makẹni ọ chọ n'ọ gha akpakalị.

¹⁴ Mgbe o gi nwan kunrun ẹnyi imẹ Asọsụ, ọ nọ banyeni ẹnyi imẹ ụgbọ-mirin hụ, ẹnyi lẹ ịya nọ shi Mitilẹni.

¹⁵ Ẹnyi nọzị gi ụgbọ-mirin gha ebẹhụ buli, eki e fọn, ẹnyi nọ ru ebẹhụ bu ihun zinmẹ Kịọsụ; eki e fọnzi, ẹnyi nọ ru Samọsụ; eki e fọnzi, ẹnyi nọ ru Miletusu.

¹⁶ Ẹnyi akụbannị Ẹfẹsọsụ makẹni Pọlụ a kwademẹgụọ nị ẹlẹ o k'a banye Ẹfẹsọsụ, amamgbe ọ gha e bie imẹ Eshịa — makẹni ọ rị a hụhụ n'ọ kẹrẹn'a ru Jerusalẹm ụhụọhịn Mmẹmmẹ-Pẹntikọsụ — omẹni ọ rị nfe.

Oku Pọlụ Gwa Ndị-isi Ụka Ẹfẹsọsụ

¹⁷ Pọlụ nọ gha Miletusu zi wẹ d'a kpọ ndị-isi ụka Ẹfẹsọsụ bịa d'e kunrun ẹ.

¹⁸ A bịagụ wẹ, ọ nọ sị wẹ, “Ụnụ lẹ enwẹn ụnụ a marịnghọ kẹ m dọn bi ogẹn ahụn ile m gi rị imẹ igunrun ụnụ, ghakwọrị ụhụọhịn ibuzọ m zọ ụkụ ye imẹ Eshịa;

¹⁹ kẹ m dọn welụachanrịn enwẹn m alị, gi ẹnya-mirin fe Di-nwọnni-ẹnyi, e dingbuchanrịn nsọngbu ile bịanịnị m yeni eje-umẹ ndị Ju zuni m;

²⁰ ụnụ a marịnzịghọ nị egini m egun seri isi m ihiẹn m marịn k'e yeni ụnụ ẹka; a kuzi m ụnụ ihun ịhịan ile lẹ ụlọ-ụlọ —

²¹ a gwa kẹ ndị Ju kẹ ndị wụlẹni ndị Ju oku irogharị buru Osolobuẹ lẹ ikwerini Di-nwọnni-ẹnyi wụ Jesu.

²² “Kanị, m jẹnkọ nwan Jerusalẹm nọkẹ onyẹ Mmọn-nsọ tụ eriri ye olu sekpụnkọ; a marịn m ihiẹn k'e kunrunni m ebẹhụ.

²³ Ihiẹn m marịnhụ wụ nị Mmọn-nsọ hụ a gwa m'a imẹ obodo ọwụlẹ nị ngan lẹ nsọngbu rị e che m.

²⁴ Kanị onwọnni ihiẹn m kpọ ndụn m, kasị m gbagụ ọsọ Osolobuẹ, rụngụ ọrụn Di-nwọnni-ẹnyi wụ Jesu buche m ẹka: ọrụn izisọnmẹ oziọma banyeni ọhụnma Osolobuẹ mẹ.

²⁵ “Lee n'ẹ nwan: a marịnghọ m nwan nị imẹ ụnụ ile m nọ imẹ igunrun wẹ zi ozi Alị-eze onwọnni hụn jẹnkọ d'a hụnzịnị m.

²⁶ M rị nwan a gwa ụnụ tannị n'o nwọnni onyẹ ọwụlẹ imẹ ụnụ ẹdeke ẹ rị m isi.

²⁷ A gwachanrịngụọ m ụnụ ihiẹn ile wụ uche Osolobuẹ k'ọ nọ — eserini m isi latọ hụn ọwụlẹ.

²⁸ Lepụ nị nwan enwẹn ụnụ lẹ igunrun atụnrụn Mmọn-nsọ buche ụnụ ẹka ẹnya. O tumẹgụọ ụnụ ndị-ndu kẹni ụnụ du ụka Osolobuẹ, hụn Osolobuẹ gi ẹdeke ẹ nwọnhẹn.

²⁹ A marịnghọ m nị m pụgụ, eje-ẹwọrọ k'a bịa imẹ igunrun ụnụ d'e ripụ atụnrụn.

³⁰ Ụfọdụ imẹ ụnụ jẹnkọ d'a fịma ezioku kẹni wẹ dọrị ndị nsọnmazụụn Jizọsị.

³¹ We ni nwan ẹnya ru alị; nyanhan nị nị ezuni m ikẹn ọrọgbọ ahụa ẹtọ, kẹ uhinhin kẹ efinnaị, ebe m rị e gi ẹnya-mirin a dọ onyẹ ọwụlẹ ẹka-ntịn.

³² “M rị nwan e bu ụnụ e che ẹka Osolobuẹ lẹ ozi banyeni ọhụnma a, ozi ẹ hụn k'a s'ẹka tụn ụnụ kẹ ụlọ mẹ ụnụ turu — weye ụnụ ihiẹn runi ụnụ imẹ ndị nsọ Osolobuẹ ile.

³³ “Onwọnni onyẹ egho ẹ mọbụ goru ẹ mọbụ ẹkwa a la m ẹnya.

³⁴ Ụnụ lẹ enwẹn ụnụ a marịnghọ nị m gi ẹka m lụrụ ihiẹn mmẹ lẹ ndị mmẹ lẹ wị gi bi.

³⁵ E gigụọ m ihiẹnni ile ghọsị ụnụ n'o furu ni ẹnyi a rụnshi ọrụn ikẹn ẹrịra e gi e yeni ndị zelẹni ẹka, a nyanhan oku Di-nwọnni-ẹnyi wụ Jesu lẹ enwẹn ẹ ku, sị, ‘Iyeni ka ngọzi a wụ karị ịnarịnnị.’ ”

³⁶ Ogẹn Pọlụ gi kugụ, ya lẹ wẹ nọ sekpu alị, ọ nọ mẹ ekpere.

³⁷ Wẹ ile hụ a kwan ẹkwan, a kwanshi elu, e fiedọn Pọlụ, e susu ẹ ọnụ.

³⁸ Ihiẹn kachanrịn wẹ a fụ wụ nị ọ sị nị a hụnkọzị w'a. Ya wẹ nọ du ẹ d'e ru ebe ụgbọ-mirin rị.