Ọrụn Ndị-ozi 19 - Ika

Isi Nke Mmitenẹi Oziọma E Ru Ẹfẹsọsụ

¹ Ogẹn Apolọsụ gi rị Kọrẹntị, Pọlụ nọ ghashi akpakalị, fetu obodo bu ọda, pụha Ẹfẹsọsụ, ọ nọ hụn ndị rị e sọn Ụzọ-Jesu ebẹhụ.

² Ọ sị wẹ, “Ụnụ e nwọnhẹnghọ Mmọn-nsọ ogẹn ụnụ gi kweri?” Wẹ nọ sị, “Mba, ẹnyi anụtudẹni nị Mmọn-nsọ rị arị.”

³ Ya ọ nọ sị wẹ, “Elee mirin-Chuku kẹ wẹ mẹ nwan ụnụ?” Wẹ nọ sị, “Mirin-Chuku Jọnụ.”

⁴ Pọlụ nọ sị, “Mirin kẹ Jọnụ gi mẹ ndị rogharịnị mirin-Chuku, kanị ọ hụ a gwa wẹ kwerini onyẹ hụ lalanị ogẹn ya lẹ enwẹn e gi rụngụ ọrụn a — ya wụ, wẹ kwerini Jesu.”

⁵ Ogẹn wẹ gi nụ ihiẹnni, wẹ nọ gi ẹfan Di-nwọnni-ẹnyi wụ Jesu mẹ wẹ mirin-Chuku.

⁶ Ogẹn Pọlụ gi bu ẹka kwasị wẹ, Mmọn-nsọ nọ hidankwasị wẹ, wẹ nọ sụma asụsụ ndị ọzọ rị ichẹn-ichẹn, bumẹ amụma.

⁷ (Wẹ ile rị ihiẹn nọkẹ madụ mmẹbụọ.)

⁸ Omẹgụ, Pọlụ nọ jẹnmẹmẹ ụlọ-ofufe ndị Ju. Ọrọgbọ ifọn ẹtọ, ọ hụ e jẹn d'a gwa wẹ oku, e ku oku Alị-eze Osolobuẹ, e kushi ẹ ikẹn, e mẹ ẹ n'o we ẹnya, kẹni wẹ kweri.

⁹ Kanị ogẹn ụfọdụ rị ebẹhụ gi gbama isi-akwanran, jụ n'e kwerikọ wẹ, kujama oku Ụzọ-Jesu idẹnya ịhịan ile imẹ ụlọ-ofufe hụ, Pọlụ nọ la wẹ tọ. O weri ndị kwerini pụ d'a kuzimẹ wẹ ụhụọhịn ile imẹ ụlọ-ẹkụkwọ onyẹ w'a kpọ Taịranọsụ.

¹⁰ O mẹ ihiẹnni ọrọgbọ ahụa ẹbụọ, nke wụ nị ndị ile bi Ẹgbẹrẹ Eshịa nọ nụ oku Di-nwọnni-ẹnyi, kẹ ndị Ju kẹ ndị ọzọ.

Ụmụ Skiva

¹¹ Osolobuẹ gi Pọlụ rụnsọnmẹ ọrụn-atụmẹnya pụ-ichẹn,

¹² nke wụ nị, wẹ e wedẹ hankachifu lẹ ẹwuru-ọrụn mẹtụ Pọlụ ẹhụ e jẹnni ndị ọrịa, emu wẹ a la, eje-mmọn a gha imẹ ndị wẹ rị imẹ wẹ pụ.

¹³ Ya kẹ ụfọdụ ndị Ju a ghahunmẹni a chụpụ eje-mmọn nọ chọ nị wẹ gi ẹfan Di-nwọnni-ẹnyi wụ Jesu chụpụ eje-mmọn: wẹ hụ a sị eje-mmọn ndị hụ, “M gi ẹfan Jesu hụn Pọlụ rị e ku oku ẹ a sị ụnụ pụ!”

¹⁴ Onyẹ ohu imẹ ndị nchụn-ẹjan kanị ẹfan a wụ Skiva nwọn ụmụ-ikẹnnyẹ ẹsa hụn rị ndị rị e mẹ ihiẹnni.

¹⁵ Kanị eje-mmọn wẹ rị a chụpụ nọ shịarị wẹ, “A marịnghọ m Jesu, a marịnzịghọ m Pọlụ; ụnụ nwẹn: onyẹ kẹ ụnụ wụ?”

¹⁶ Ya okẹnnyẹ eje-mmọn hụ rị imẹ ẹ nọ wụkwasị wẹ, gbukwama wẹ ile ili, mẹshi wẹ ikẹn ọda-ọda, nke wụnị ọtọ kẹ wẹ gi gbapụ ụlọ hụ, wẹ lẹ ẹhụ ọ rụ wẹ.

¹⁷ Ndị ile rị Ẹfẹsọsụ, kẹ ndị Ju kẹ ndị wụlẹni ndị Ju nụ ihiẹnni, egun nọ tụma wẹ ile; ẹfan Di-nwọnni-ẹnyi wụ Jesu nọ nwọnkẹnmẹ ọghọ.

¹⁸ Ndị bụ ọda hụ e kwerini Jesu, a pụha idẹnya ịhịan ile, kọma ọnụ eje-ihiẹn ndị wẹ te rị a rụn.

¹⁹ Ndị bu ọda te a gwọ ọgụn nọ kpọnhẹnsọnmẹ ẹkụkwọ ndị wẹ gi a rụn ihiẹn ndị ahụn d'a dụn ọkụn idẹnya ịhịan ile. Ogẹn wẹ gi gbakọ ọnụ egho ẹkụkwọ ndị hụ, ọ gba ihiẹn nọ kẹ egho ọrụn akpọhịn nnụ-uku iri-kwasị-ọgụnnaị (50,000) nchaịn!

²⁰ Ya kẹ oku Di-nwọnni-ẹnyi nọ ghakẹnmẹ ihun, weri ọnọdị ọhụnma-ọhụnma.

Obodo Ẹfẹsọsụ E Susuhu

²¹ Ogẹn ihiẹn ndịnị gi mẹgụ, Pọlụ nọ kwademẹ obi ẹ ghahanị Mmọn-nsọ n'o k'e ru Masẹdonia lẹ Akaya rị ụzọ o jẹnkọnị Jerusalẹm. Ọ nọzị sị, “M jẹngụ Jerusalẹm, m k'e ruzirịrị Rom.”

²² Ya ọ nọ zi madụ ẹbụọ imẹ ndị rị e yen'ẹ ẹka — Timoti lẹ Ẹrastọsụ — shi Ẹgbẹrẹ Masẹdonia, ya nwẹn a nọdịzị imẹ Eshịa ẹkẹrẹ.

²³ Ogẹn hụ kẹ okẹn nsọngbu gi pụha imẹ Ẹfẹsọsụ makẹ Ụzọ-Jesu:

²⁴ O nwọn okẹnnyẹ ohu w'a kpọ Dẹmẹtrịọsụ hụn a kpụ siliva, e gi ẹ a kpụ ụlọ-mmọn wẹ nọ a rụa Atẹmisi. Ọrụn a e wẹhẹni ndị a kpụ ụzụn ọrụn ọda-ọda.

²⁵ Ọ nọ kpọkikomẹ ndị a kpụ ụzụn lẹ ndị ọzọ wẹ ile gba a rụn ọrụn hụ, ọ sị wẹ, “Ikẹnnyẹ, ụnụ a marịnghọ nị ọrụnnị kẹ ẹnyi gi a ban ihiẹn.

²⁶ Kanị ụnụ hụ e gi nwan ntịn a nụ, e gi ẹnya a hụn nị Pọlụnị e gigụọ ihiẹn ọ rị e ku nị mmọn wẹ gi ẹka mẹmẹ ẹlẹ mmọn, dọrị ndị bu ọda; ẹlẹ imẹ Ẹfẹsọsụ sụọ k'ọ rị e mẹ ihiẹnni, o d'a ghagbarịdẹ Ẹgbẹrẹ Eshịa ile!

²⁷ Okẹn eje-ihiẹn rị e mẹ. Ẹlẹdẹ eje-ẹfan ihiẹnni k'e ye ọrụn ẹnyini sụọ, kanị ụlọ-uku mmọn-onyẹnyẹ uku wụ Atẹmisi k'a wụ tan ihiẹn mmaka; ọghọ a, hụn ịhịan ile rị imẹ Eshịa lẹ ụwa ile gi e fe ẹ, a la!!”

²⁸ Ogẹn wẹ gi nụ ihiẹnni, olulu e bumẹ wẹ, wẹ nọ yimẹ, “Atẹmisi ndị Ẹfẹsọsụ wụ Okẹn Mmọn!”

²⁹ Ya obodo hụ nọ susuhu: wẹ ile a zụnpụha, dọkpụnrụn Gayọsụ lẹ Arịstakusu, ndị Masẹdonia wẹ lẹ Pọlụ wị e jẹn alị ichẹn-ichẹn d'a rụn ọrụn oziọma, kpụnrụn wẹ shi ebe ndị alị a nọ e zu iko ichẹn-ichẹn.

³⁰ Pọlụ te chọ n'o jẹn imẹ ọgbọ hụ, kanị ndị nsọnmazụụn Jizọsị anịn'a;

³¹ kẹ ụfọdụ ndị-isi Ẹgbẹrẹ Eshịa ahụn wụ ndị ọsị Pọlụ nọ zi ozi jẹnn'ẹ, rịọ a amakwọlẹ ama ru ebẹhụ ndị alị n'e zu.

³² Imẹ igunrun hụ, ndịnị hụ e yi ichẹn, ndịnị hụ e yi ichẹn, makẹni isusu rị imẹ igunrun hụ; imẹrinmẹ imẹ wẹ amarịn ihiẹn wẹ kokomẹni.

³³ Ebe o mẹ ni Alẹzanda kẹ ndị Ju nupụha ihun, ndị hụ imẹ ndị ahụn zuni nọ sị Alẹzanda kumẹ. Alẹzanda nọ gi ẹka gwa wẹ gba nkịtịn, chọma n'ọ kọwanị igunrun ahụn.

³⁴ Kanị hụn wẹ gihụ marịn n'ọ wụ onyẹ Ju, wẹ ile nọ yimẹ, “Atẹmisi ndị Ẹfẹsọsụ wụ okẹn mmọn!” Wẹ ile hụ e yi ihiẹnni mgbahunmẹ ọkụrọkụ ẹbụọ!!

³⁵ Akanwe obodo hụ nọ mẹ igunrun hụ ile gba nkịtịn, ya ọ nọ sị, “Ndị Ẹfẹsọsụ, onyẹ wụ onyẹ ahụn marịnlẹni nị ẹka ndị obodo Ẹfẹsọsụ kẹ ụlọ-uku okẹn-mmọn wụ Atẹmisi rị, nị Atẹmisi wẹ kpụ hụn gha igwere dan rịzị wẹ ẹka?

³⁶ Ebe o mẹ nị w'a ra rụ ụka ihiẹn ndịnị, o furu ni ụnụ gba nkịtịn. O furuni nị ụnụ mẹ ihiẹn ọwụlẹ ụnụ lebanlẹni ẹnya.

³⁷ Makẹni, ụnụ e wẹhẹgụọ ndịnị ebeni bụ ezunni wẹ ohin ụlọ-mmọn; e kujanị wẹ oku mmọn ẹnyi.

³⁸ “O mẹ nwan ni Dẹmẹtrịọsụ lẹ ndị omẹ-nka ya lẹ wẹ wị nwọn onyẹ wẹ k'e kpe, ọgwa ẹnyi ichẹn-ichẹn hụ a, ndị ọkịkị hụzị a; wẹ jẹnmẹ ebẹhụ d'e kpe wẹ.

³⁹ Kanị, omẹni o nwọnzighọ ihiẹn ọzọ ụnụ rị a chọ karị ọnwan, ya wụ nị ọgwa ịhịan ile e zu kẹ wẹ a nọ leban a ẹnya.

⁴⁰ Makẹni, ihiẹnni mẹ tannị nwọn ikẹn buhẹni ẹnyi oku ebe ndị-ọkịkị rị. O ru e du wẹ ẹnyi kpe nị ẹnyi rị a lụ nị ẹnyi weri enwẹn ẹnyi — makẹni onwọnni ihiẹn ẹnyi k'a saẹka ku nị ịya buhẹ isusuni.”

⁴¹ Ogẹn o gi kugụ ihiẹnni, ya ọ nọ gbashịa ndị ahụn ile zuni.