Ọrụn Ndị-ozi 18 - Ika

Isi Nke Mmẹsatọ Kẹ Pọlụ Dọn Rụn Ọrụn Jesu Imẹ Kọrẹntị

¹ Ihiẹnni e mẹgụ, Pọlụ nọ gha Atẹnsi pụ, shi obodo Kọrẹntị.

² Ọ nọ hụn onyẹ Ju w'a kpọ Akwila hụn wẹ mụ Ẹgbẹrẹ Pọntusu, hụn ya lẹ nwunyẹ ẹ wụ Prisilia gba gha alị Itali bịa ebẹhụ nke ọhụn, makẹni eze-kanị wụ Klọdiọsụ Siza sị ndị Ju ile gha Rom pụ. Ya Pọlụ nọ jẹn d'a hụn wẹ.

³ Makẹni ya nwẹn a kwazị ọdụ w'a kpụkpọrị kẹ wẹ, ọ nọ du wẹ nọdị, wẹ hụ a rụngbama ọrụn.

⁴ Ụhụọhịn Ezumikẹn ile, ọ hụ e jẹn ụlọ-ofufe ndị Ju d'a gwa wẹ oku, a lịlịma n'o mẹ wẹ kweri — kẹ ndị Ju kẹ ndị wụlẹni ndị Ju.

⁵ Ogẹn Saịlasị lẹ Timoti gi gha Masẹdonia bịa, Pọlụ nọ gi ogẹn ẹ ile e ku oku-Chuku, a kọwanị ndị Ju nị Jesu wụ Kraịstị.

⁶ Ogẹn ndị Ju gi bunụman'a, kparimẹ ẹ, ya kẹ ọ nọ zinzinpụ uzunzun rị a ẹkwa tọnị wẹ gi gwa wẹ n'e mẹọlẹ wẹ eje-ihiẹn, ọ sị wẹ, “Ẹdeke ụnụ rị ụnụ isi! Ẹka m rị ọchan! Gha kikẹnni jẹnmẹ, e buru m ndị wụlẹni ndị Ju.”

⁷ Ọ nọ gha ebẹhụ pụ, shi iwe okẹnnyẹ ohu w'a kpọ Taịtiọsụ Jọstusu, hụn wụlẹni onyẹ Ju kanị o fe Chuku kẹ ndị Ju dọn e fe. Iwe Taịtiọsụ rị e sọn ụlọ-ofufe hụ.

⁸ Krispọsụ onyẹ-isi ụlọ-ofufe hụ nọ kwerini Di-nwọnni-ẹnyi, ya lẹ ezi-lẹ-ụlọ a ile; ndị Kọrẹntị bu ọda hụn nụ oziọma Pọlụ rị e zi e kwerizighọ, wẹ nọ mẹ wẹ mirin-Chuku.

⁹ Imẹ uhinhin, Pọlụ nọ hụn ọhụn ebe Onyẹ-nwọnni-ẹnyi nọ sị a, “Atụlẹ egun; ka kumẹ; agbakwọlẹ nkịtịn,

¹⁰ makẹni m rị ị azụụn. Onwọnni onyẹ k'e mẹtụ ị ẹka, mẹ i ihiẹn ọwụlẹ, makẹni m nwọn ndị bu ọda imẹ obodoni.”

¹¹ Ya ọ nọ nọdị ebẹhụ ahụa ohu lẹ ifọn isin, a kuzi wẹ oku Osolobuẹ.

¹² Kanị ogẹn Galio gi wụ Gọvanọ rị a kịnị ndị Rom Ẹgbẹrẹ Akaya, ndị Ju nọ kpọngbama, maye Pọlụ, w'ẹ jẹn ọgwa Gọvanọ.

¹³ Wẹ nọ sị Gọvanọ, “Okẹnnyẹni rị a sị ịhịan gi ụzọ ọzọ wụlẹni hụn Iwu ku femẹ Osolobuẹ.”

¹⁴ Pọlụ a chọhụ n'o kumẹ, Galio nọ sị ndị Ju, “Omẹni oku ịdan-iwu obodo rọ mọbụ nị ịhịan mẹ ihiẹn wụ eje-ihiẹn nke-esi, nkẹ m'e gọn ụnụ ndị Ju ntịn!

¹⁵ Ebe o mẹ nwan ni oku ihiẹn onyẹ ku lẹ ẹfan ịhịan lẹ oku iwu ụnụ rọ, gi ni ẹka ụnụ leban a ẹnya; ekinkọ m ụdị ikpe ndịnị!”

¹⁶ Ya ọ nọ chụpụ wẹ imẹ ọgwa.

¹⁷ Ya wẹ ile nọ kwọndọn Sọstẹnẹsi onyẹ-isi ụlọ-ofufe ndị Ju, gbu ẹ ili ihun-ezi ọgwa hụ, kanị Galio efeyedẹni wẹ ẹnya.

Pọlụ E kinhẹn Obodo Antịọkụ Hụn Rị Siria

¹⁸ Ogẹn Pọlụ gi nọbiegụ Kọrẹntị, ọ nọ sị ndị kwerini Jesu rị ebẹhụ nọdị ọhụnma, ọ nọ banye ụgbọ-mirin, shi alị Siria. Ịya lẹ Prisilia lẹ Akwila wị. E ru wẹ obodo Sẹnkrẹ, ọ nọ kọ ntutu makẹni o nwọn nkwa o kwe.

¹⁹ E ru wẹ Ẹfẹsọsụ, ọ nọ la wẹ tọ ebẹhụ, ya sụọ nọ jẹn ụlọ-ofufe ndị Ju d'a gwa wẹ oku.

²⁰ Ogẹn wẹ gi sị a nọyezi, ọ jụ;

²¹ kanị ogẹn o gi pụkọ, ọ nọ sị, “M k'e kinhẹn, omẹni uche Osolobuẹ rọ.” Ọ nọ gi ụgbọ-mirin gha Ẹfẹsọsụ jẹnmẹ.

²² Ogẹn o gi ru Sizaria, ọ nọ kụye Jerusalẹm d'e kelegụ ndị ụka, ọ nọ nwan lashi Antịọkụ ọ lakọ.

²³ Ogẹn o gi nọbe Antịọkụ, ọ nọzị pụ, jẹnsọnmẹ ebe rị ichẹn-ichẹn Ẹgbẹrẹ Galeshịa lẹ Frigia, a gba ndị ile kwerini Jesu umẹ.

Ọrụn Apolọsụ Rụn Imẹ Ẹfẹsọsụ Lẹ Kọrẹntị

²⁴ O nwọn onyẹ Ju ohu wẹ nọ Alẹzandrịa mụ w'a kpọ Apolọsụ hụn bịa Ẹfẹsọsụ. Okẹnnyẹni ma ku oku ọhụnma-ọhụnma, marịnzị Ẹkụkwọ-nsọ ọda-ọda.

²⁵ A kuzigụọ w'a Ụzọ Di-nwọnni ẹnyi; o nwọnkẹnmẹkẹ adụdụ iku oku-Chuku; ọ kuzi banyeni Jesu ọhụnma. Kanị mirin-Chuku Jọnụ sụọ k'ọ marịn.

²⁶ Ọ nọ kushimẹ oku-Chuku ikẹn imẹ ụlọ-ofufe ndị Ju. Kanị, ogẹn Prisilia lẹ Akwila gi nụ nkuzi ẹ, wẹ nọ weri ẹ shi ụsụọ d'a kọwan'a Ụzọ Osolobuẹ ọhụnma.

²⁷ Ogẹn Apolọsụ gi chọ n'o fetu shi Ẹgbẹrẹ Akaya, ndị kwerini Jesu nọ kwadọn ẹ, de ẹkụkwọ jẹnni ndị kwerini rị Akaya, sị wẹ nabanhan a. Ogẹn o gi ru Akaya, o yekẹnmẹkẹni ndị rị ebẹhụ ẹka, ndị Osolobuẹ yeni ẹka kwerini Jesu.

²⁸ Makẹni, ọ nọ idẹnya ịhịan ile a zachanrịn ihiẹn ile ndị Ju rị a dọ, e gi Ẹkụkwọ-nsọ a ghọsịchanrịn nị Kraịstị hụ Ẹkụkwọ-nsọ rị e ku oku ẹ wụ Jizọsị.