Ọrụn Ndị-ozi 17 - Ika

Isi Nke Mmẹsa Kẹ Wẹ Dọn Kpokpo Pọlụ Imẹ Tẹsalonika

¹ Ogẹn Pọlụ lẹ Saịlasị gi ghagbarịgụ Amfipolisi lẹ Apolonia, wẹ nọ ru obodo Tẹsalonika. Ụlọ-ofufe ndị Ju rị ebẹhụ.

² Ya Pọlụ nọ jẹnmẹ ụlọ-ofufe hụ k'o dọn e mẹ ebe ile. Ụhụọhịn Ezumikẹn ẹtọ, ọ hụ e gi Ẹkụkwọ-nsọ a gwa wẹ oku,

³ a kọwa, a ghọsị nị Ẹkụkwọ-nsọ ku ẹ nị Onyẹ hụ Osolobuẹ tumẹ k'a ta afụnfụn, n'o k'a ghazịkwọ ọnwụn lihi. Ọ hụ a sị wẹ, “Jesuni m rị a gwa ụnụ oku ẹ wụ Kraịstị, Onyẹ hụ Osolobuẹ tumẹ.”

⁴ Ụfọdụ nọ kweri, ya wẹ nọ sọnmẹ Pọlụ lẹ Saịlasị. Ndị alị ọzọ bu ọda hụn e fe ofufe ndị Ju lẹ ikpoho wẹ marịn amarịn bu ọda e kwerizighọ.

⁵ Makẹni ẹnya rị a fụ ndị Ju, wẹ nọ chọrị ndị isi-mgbaka imẹ afịa, wẹ nọ bu isusu che obodo hụ. A zụnbanhan wẹ iwe Jasịnị d'a chọ Pọlụ lẹ Saịlasị, kẹni wẹ wepụha wẹ weye ndị alị.

⁶ Ahụnnị wẹ wẹ; ya wẹ nọ dọkpụnrụn Jasịnị lẹ ụfọdụ ndị kwerini jẹnni ndị-isi obodo hụ, e yi, “Ikẹnnyẹ ndịnị rị e bu ụwa isi a kpọma alị e ruzịọlẹ ebeni,

⁷ Jasịnị e bu wẹ che ụlọ! Wẹ ile rị a dan iwu eze-kanị wụ Siza, e ku n'o nwọn eze ọzọ rịnị w'a kpọ Jesu.”

⁸ Ogẹn ndị alị lẹ ndị-isi wẹ gi nụ ihiẹnni, obi eruzini wẹ alị.

⁹ Wẹ nọ be Jasịnị lẹ ndị ọzọ egho wẹ be wẹ, a hangụ w'a, ya wẹ nọ hapụ wẹ.

Ndị Bẹrịa Shịapụ Ẹfọ Nụ Oziọma

¹⁰ Ozigbo-ozigbo, ndị kwerini nọ gi uhinhin wepụ Pọlụ lẹ Saịlasị, sị wẹ jẹnmẹ obodo Bẹrịa. E ru w'ẹ, ya wẹ nọ shi ụlọ-ofufe ndị Ju.

¹¹ Ndị Ju rị Bẹrịa ka obi a shịapụ karị ndị rị Tẹsalonika. Makẹni, wẹ gichanrịn obi wẹ ile nabanhan oku Di-nwọnni-ẹnyi, e leban ẹnya Ẹkụkwọ-nsọ ụhụọhịn ile nị wẹ marịn kẹ ihiẹn ndị hụ Pọlụ ku wụ ezioku.

¹² Ya kẹ ndị bu ọda nọ kweri, wẹ lẹ ikpoho bu ọda wẹ marịn amarịn wụlẹni ndị Ju lẹ ikẹnnyẹ bu ọda.

¹³ Kanị, ogẹn ndị Ju rị Tẹsalonika gi marịn nị Pọlụ e kuọlẹ oku Chuku imẹ Bẹrịa, wẹ nọzị bịa ebẹhụ d'a kpasu ndị rị ebẹhụ.

¹⁴ Ndị rị ebẹhụ kwerini nọ weri Pọlụ pụ ozigbo-ozigbo, sị a jẹnmẹ mkpẹnrẹn Ohimin; kanị Saịlasị lẹ Timoti nọ nọdịgụ Bẹrịa ebẹhụ.

¹⁵ Ndị du Pọlụ nọ du ẹ rukwọrị Atẹnsi; o zigụ wẹ gwa Timoti lẹ Saịlasị bịakẹnrin d'e kunrun ẹ, ya wẹ nọ lama.

Ozi Pọlụ Zi Ndị Ọka-ẹkụkwọ Imẹ Atẹnsi

¹⁶ Ogẹn Pọlụ gi rị e che Timoti lẹ Saịlasị imẹ Atẹnsi, ize hụ e ze ẹ makẹni ọ hụn a nị alị hụ ile wụ mmọn-mmọn.

¹⁷ Ọ nọ gi ufiri ẹ gwama ndị Ju lẹ ndị ọzọ e fe ofufe ndị Ju oku Jesu imẹ ụlọ-ofufe ndị Ju, e sọn wẹ a dọ a, a nọzị afịa a gwa ndị ile ọ hụn ebẹhụ oku Jesu ụhụọhịn ile.

¹⁸ Ụfọdụ ndị ọka-ẹkụkwọ rị itu Epikuria lẹ itu Stọiki nọ sọn ẹ dọma. Ụfọdụ sị, “Kị onyẹ ịta-lẹ-okuni rị e ku?” Ndị ọzọ sị, “Ọ nọ kẹ sị ọ rị e ghoro mmọn ọhụn.” (Wẹ ku ẹrịra makẹni ọ rị e zi oziọma banyeni Jesu, e ku oku ịgha ọnwụn lihi.)

¹⁹ Ya wẹ nọ we ẹ jẹn Eropagọsụ, ọgwa ndị ọka-ẹkụkwọ, sị a, “Kọwanị nwan ẹnyi ihiẹn ọhụnnị ị rị a kuzi.

²⁰ Ẹnyi anụtuni ihiẹn ndịnị ị rị e ku; ẹnyi chọ nwan nị ẹnyi ghọta a.”

²¹ (Onwọnni ihiẹn ndị obodo Atẹnsi ile lẹ ndị ọbịa bi ebẹhụ gi ogẹn wẹ e mẹ karị iku lẹ ịnụ ihiẹn ọhụn.)

²² Ya Pọlụ nọ pụha ihun ndị rị ọgwa Eropagọsụ, sị, “Ndị Atẹnsi, a hụnọlẹ m'a nị ụnụ e fe ofufe ọda-ọda.

²³ Makẹni, kẹ m ghakọ imẹ obodo ụnụ, m hụ e lekpọ ihiẹn ndị ụnụ e fe; a hụnghọdẹ m ụlọ-mmọn wẹ de: ‘Ọnwan wụ nke mmọn hụ ẹnyi marịnlẹni.’ Ihiẹn ahụn ụnụ rị e fe ụnụ marịnlẹni, ịya kẹ m rị nwan a gwa ụnụ oku ẹ.

²⁴ “Osolobuẹ hụn ke ụwa lẹ ihiẹn ile rị imẹ ẹ, Onyẹ hụn nwọn elu-igwee lẹ ụwa, ara bi ụlọ-mmọn wẹ gi ẹka tụn;

²⁵ w'a ra gi ihiẹn gha ẹka ịhịan bịa fe ẹ nọkẹ sị ihiẹn rị a kọ a. Mba, ịya e yedẹ ịhịan ndụn lẹ uzun lẹ ihiẹn ile.

²⁶ Ọ gha onyẹ ohu wepụha ndị alị ile nị wẹ bigbarị elu ụwa ile, ọ nọ tumẹsọnmẹni wẹ ogẹn nke wẹ lẹ alị wẹ k'e bi.

²⁷ O mẹ ihiẹnni ni wẹ hụn ụzọ chọ ya lẹ enwẹn ẹ wụ Chuku, ikẹnkwọ a hụn w'a ebe wẹ rị e bisọnmẹ ẹka a chọ a, ọsụọn'a n'ọ nọkunmẹ onyẹ-onyẹ imẹ ẹnyi anọkunmẹ,

²⁸ makẹni ‘Ịya e ye ẹnyi ndụn, e mẹ ẹnyi a saẹka e jẹnhunmẹ, e mẹ ẹnyi a rị.’ O nwọnghọdẹ ndị nke ụnụ e deni hụn de sị, ‘Ụmụ a kẹ ẹnyi wụ.’

²⁹ “Ebe o mẹni ẹnyi wụ ụmụ Osolobuẹ, ẹlẹ hụn ẹnyi e gi e ro ni Osolobuẹ ẹnyi nọ kẹ ihiẹn goru mọbụ siliva mọbụ ọmụma ịhịan gi akọ-lẹ-uche ẹ lẹ iroro ẹ kpụ mọbụ tụ.

³⁰ Osolobuẹ e fepụghọ ẹnya ogẹn mbụ ịhịan marịnlẹn'a. Kanị, ọ sị nwan ịhịan ile rị ebe ile wẹ rogharị.

³¹ Makẹni, ọ kayegụọ ụhụọhịn o gi kin ụwa ikpe zinrinni ghahanị okẹnnyẹ ohu o tumẹ. Ọ ghọsịgụọ onyẹ okẹnnyẹ hụ wụ ghahanị iweli ẹ ogẹn o gi nwụnhụngụ.”

³² Ogẹn wẹ gi nụ oku ịgha ọnwụn lihi, ụfọdụ nọ mụma a ẹmụ; kanị ndị ọzọ sị, “Ẹnyi chọ n'ị gwazị ẹnyi okuni.”

³³ Omẹgụ, Pọlụ nọ gha imẹ igunrun hụ pụ.

³⁴ Kanị ụfọdụ ikẹnnyẹ nọ bann'a, kwerini Jesu. Ohu imẹ wẹ wụ Dionishịọsụ hụn rị ndị e zu ọgwa Eropagọsụ, ịya lẹ okpoho ohu w'a kpọ Damarisi lẹ ndị ọzọ wẹ ile wị.