Ọrụn Ndị-ozi 16 - Ika

Isi Nke Mmisin Timoti E Sọnmẹ Pọlụ lẹ Saịlasị

¹ Pọlụ nọzị bịa Debẹ lẹ Listra. Imẹ Listra, o nwọn onyẹ ohu kwerini Jesu w'a kpọ Timoti; nnẹ ẹ wụ onyẹ Ju kwerini Jesu; kanị nẹdi ẹ wụ onyẹ Griki.

² Ndị kwerini imẹ Listra lẹ Ikoniọm e ku oku Timoti ọhụnma.

³ Pọlụ chọ nị Timoti sọnmẹ ẹ, ọ nọ gi ufiri ndị Ju rị Listra lẹ Ikoniọm ebẹhụ weri ẹ, kwa a ugun, makẹni wẹ ile a marịnghọ nị nẹdi ẹ wụ onyẹ Griki, ẹlẹ onyẹ Ju.

⁴ Wẹ nọ nwan ghasọnmẹ obodo-obodo, e ye ndị ụka iwu ndị hụ ndị-ozi pụ-ichẹn lẹ ndị-isi rị Jerusalẹm ti, a sị wẹ e dọnmẹ wẹ.

⁵ Ya ụka ndị hụ nọ zekẹnmẹ imẹ okukwe, e buwaye ọda ụhụọhịn-ụhụọhịn.

Kẹ Pọlụ Dọn Jẹn Filipi Ọhụn Pọlụ Hụn Imẹ Trasị

⁶ Wẹ nọ fetu Ẹgbẹrẹ Frigia lẹ Galeshịa, ebe o mẹ ni Mmọn-nsọ anịnị wẹ ku oku-Chuku imẹ Ẹgbẹrẹ Eshịa.

⁷ E ru wẹ ọnụ Mishịa, wẹ nọ mẹmẹ ni wẹ banye imẹ Ẹgbẹrẹ Bitinia, kanị Mmọn Jizọs anịnị wẹ.

⁸ Ya wẹ nọ ghafe Mishịa jẹnmẹ Trasị.

⁹ Uhinhin hụ, Pọlụ nọ hụn ọhụn, hụn kẹ okẹnnyẹ ohu wụ onyẹ Masẹdonia turu, a rịọ a, “Dodo, bịa Masẹdonia d'e yeni ẹnyi ẹka!”

¹⁰ Ọ hụngụ ọhụn hụ, ẹnyi nọ kwademẹ ozigbo-ozigbo nị ẹnyi shi Masẹdonia, makẹni ẹnyi gi ẹ dọn nị Osolobuẹ sị ẹnyi d'e zi ndị rị ebẹhụ oziọma.

Lidia E Hutọ, Sọnmẹ Jesu

¹¹ Ya kẹ ẹnyi nọ banye ụgbọ-mirin, gha Trasị shikwọrị Samọtresi; eki e fọn, ẹnyi nọ ru Nịapolisi.

¹² Ẹnyi nọ gha ebẹhụ shi Filipi, obodo rị mkpa imẹ Ẹgbẹrẹ Masẹdonia. Ndị Rom kẹti-kẹti bi obodo Filipi. Ẹnyi nọdị ebẹhụ akpọhịn ole-lẹ-ole.

¹³ Ụhụọhịn Ezumikẹn, ẹnyi nọ gha imẹ obodo pụ, shi mkpẹnrẹn iyi, ebe ẹnyi ro nị ịya wụ ebe wẹ n'e mẹ ekpere, ẹnyi nọ nọdị alị gwama ikpoho zu ebẹhụ oku.

¹⁴ Okpoho ohu w'a kpọ Lidia hụ e gọn ntịn; onyẹ obodo Tịatira rọ; o re ẹkwa a ṅanrannị; o sọn ndị Ju e fe Osolobuẹ. Di-nwọnni-ẹnyi shịapụ a obi, ọ nọ gi ihiẹn Pọlụ rị e ku dọn.

¹⁵ Ogẹn wẹ gi mẹgụ ya lẹ ikpụlọ a mirin-Chuku, ọ nọ gi arịrịọ sị ẹnyi, “Omẹni ụnụ weri ẹ nị m kwerini Di-nwọnni-ẹnyi, bịa nị nwan iwe m d'a nọdị.” Ọ rịọ ẹnyi ọda-ọda, ẹnyi nọ kweri.

A Tụ Wẹ Pọlụ Lẹ Saịlasị Ngan

¹⁶ Ụhụọhịn ohu, ebe ẹnyi jẹnkọ ebe wẹ a nọ e mẹ ekpere, ẹnyi nọ hụn nwagbọọ ohu wụ igbọn, eje-mmọn o gi a hụn ọhụn rị imẹ ẹ. O gi ihiẹnni a kpahanị ndị nwọnn'ẹ egho ọda-ọda.

¹⁷ Nwa-agbọnị hụ e sọnhunmẹ ẹnyi lẹ Pọlụ. Ọ nọbe, ọ dọbepụ oro, sị, “Ndịnị wụ idibo Chuku Kachanrịnnị! Wẹ rị a gwa ụnụ kẹ ụnụ a dọn nwọn nzụọpụha.”

¹⁸ O mẹpụ ihiẹnni akpọhịn ole-lẹ-ole, ọ nịzịnị Pọlụ din, ya Pọlụ nọ gbehutọ, sị mmọn hụ, “M rị e gi ẹfan Jizọsị Kraịstị a sị ị gha imẹ ẹ pụ!” Ya kẹ eje-mmọn hụ nọ pụ ozigbo.

¹⁹ Kanị ogẹn ndị nwọnn'ẹ gi hụn a nị ihiẹn wẹ gi a kpa egho a la, wẹ nọ kwọndọn Pọlụ lẹ Saịlasị, dọkpụn wẹ jẹnni ndị-isi ọkịkị rị ebe wẹ a nọ e zu.

²⁰ E wẹhẹ wẹ wẹ ihun ndị-isi ọkịkị, wẹ nọ kinmẹ, “Ikẹnnyẹ ndịnị wụ ndị Ju, wẹ rị e ye obodo ẹnyi nsọngbu:

²¹ wẹ rị a kuzi ọdịnalị ndị iwu ẹnyi ndị Rom sị ẹnyi ekwerilẹ, ẹnyi emẹlẹ.”

²² Ịhịan ile jun ebẹhụ nọ kị ọnụ nwụn wẹ. Ndị-isi ọkịkị nọ tikapụ wẹ ẹkwa, sị wẹ gbu wẹ mkpịnsịn.

²³ E gbugụ wẹ wẹ mkpịnsịn ọda-ọda, wẹ nọ tụ wẹ ngan, sị onyẹ e che ndị-ngan ya kpọkin wẹ ye ọhụnma-ọhụnma.

²⁴ Ọ nọ mẹ ihiẹn ndị-isi gwa a, bu wẹ che ngan rị imẹ-imẹ. Ọ nọ gi aba kpọdọn wẹ ụkụ.

Kẹ Onyẹ E Che Ndị Ngan Dọn Rogharị

²⁵ O ru imẹ abalị, kẹ Pọlụ lẹ Saịlasị rị e mẹ ekpere, e gi ẹbụ a ja Osolobuẹ mma, ndị-ngan hụ e gọn wẹ ntịn,

²⁶ idẹnmizi, alị nọ zinzinmẹ ọda-ọda, iyetọ ụlọ-ngan nọ mẹhunmẹ; ozigbo ahụn, ụzọ ile nọ gụnpụ, ẹgan ile a ganpụ.

²⁷ Ogẹn onyẹ e che ndị ngan gi tẹnhin, hụn kẹ ụzọ ndị ahụn rị oghe, ọ nọ sepụha ọpịa-agha n'o gbu enwẹn ẹ, makẹni o ro ni ndị ngan a gbapụgụọ.

²⁸ Kanị Pọlụ nọ yi okẹn oro, sị, “Egbukwọlẹ enwẹn i! Ẹnyi ile hụ ebeni!”

²⁹ Ya okẹnnyẹ hụ nọ sị wẹ buhẹ ukpẹ; ọ zụnbanhan, gbu osekpu ihun Pọlụ lẹ Saịlasị, a ma piripiri.

³⁰ Ya ọ nọ wepụha wẹ ezi, sị, “Ndị nwọnni m, kị m'e mẹ nị m nwọn nzụọpụha?”

³¹ Wẹ nọ sị a, “Kweri ni Di-nwọnni-ẹnyi wụ Jesu, i k'e nwọn nzụọpụha — kẹ yụ kẹ ezi-lẹ-ụlọ ị!”

³² Wẹ nọ gwa ya lẹ ndị ile rị iwe ẹ oku Di-nwọnni-ẹnyi.

³³ Ọ nọ weri wẹ imẹ abalị hụ d'a chanchan wẹ ebe wẹ rụsọnmẹ wẹ ẹhụ, wẹ nọ mẹ ya lẹ ikpụlọ a ile mirin-Chuku ozigbo hụ.

³⁴ Ọ nọ we wẹ shi iwe ẹ, bupụhanị wẹ ihiẹn-oriri, ọ hụ a ghọghọ n'o kwerigụọnị Osolobuẹ, ya lẹ ikpụlọ a ile.

³⁵ Eki e fọn, ndị-isi ọkịkị nọ zi ndị ẹwuru-ogi d'a sị onyẹ e che ndị ngan, “Hapụ ndị hụ nị wẹ lama.”

³⁶ Onyẹ nche ndị-ngan hụ nọ we ozi hụ jẹnni Pọlụ, sị a, “Ndị-isi ọkịkị zihẹ ozi, sị wẹ hatu ụnụ nị ụnụ lama. Pụha nị nwan nị ụnụ gi udọn lama.”

³⁷ Kanị Pọlụ nọ sị ndị ẹwuru-ogi hụ, “E gbugụọ wẹ ẹnyi ili idẹnya ịhịan ile elebangụnị wẹ oku ẹnya; a tụgụọ wẹ ẹnyi wụ ụmụ di-alị Rom ngan; wẹ chọ nwan nị wẹ gi nzuzue hatu ẹnyi? Mba! Wẹ gi ẹka wẹ bịa d'e wepụha ẹnyi.”

³⁸ Ndị ẹwuru-ogi nọ bu okuni jẹnni ndị-isi ọkịkị. Ogẹn ndị-isi ọkịkị gi nụ nị wẹ wụ ụmụ di-alị Rom, egun nọ tụma wẹ.

³⁹ Wẹ nọ bịa d'a rịọ wẹ. Wẹ nọ wepụha wẹ, rịọma wẹ gha obodo hụ pụ.

⁴⁰ Ya wẹ nọ pụha ngan hụ, shi iwe Lidia. A hụngụ wẹ ndị kwerini, kasịgụ wẹ obi, wẹ nọ gha ebẹhụ pụ.