Ọrụn Ndị-ozi 15 - Ika

Isi Nke Mmisẹn Ọgwa Ndị-isi Ụka Alị Ichẹn-ichẹn Zu Imẹ Jerusalẹm

¹ Ogẹn ahụn, o nwọn ndị gha Judia bịa Antịọkụ, a kuzi ndị ụka, a sị, “Mmanị ụnụ kwa ugun iwu Mozizi chọ, ụnụ as'ẹka nwọn nzụọpụha.”

² Pọlụ lẹ Banabasị nọ sọn ndị hụ dọ oku hụ, e kube w'ẹ; ya ndị ụka nọ han Pọlụ lẹ Banabasị lẹ ndị ọzọ imẹ wẹ nị wẹ we okuni jẹnni ndị-ozi ahụn pụ-ichẹn lẹ ndị-isi rị Jerusalẹm.

³ Ndị ụka e zipụ wẹ, wẹ nọ buli, kụyesọnmẹ alị Finishịa lẹ alị Sameria, a gwa wẹ kẹ ndị alị ndị ọzọ rị ichẹn-ichẹn wụlẹni ndị Ju dọn rị e hutọ e sọnmẹ Jesu; ozi wẹ hụ e mẹ ndị kwerini a ghọghọ ọda-ọda.

⁴ E ru wẹ Jerusalẹm, ndị-ụka lẹ ndị-ozi ahụn pụ-ichẹn lẹ ndị-isi nọ sị wẹ alụa, wẹ nwẹn nọ gwa wẹ ihiẹn ile Osolobuẹ gi wẹ rụn.

⁵ Kanị ụfọdụ ndị kwerini rị itu Farisi nọ lihi ọtọ, sị, “Wẹ k'a gwarịrị ndị alị ọzọ wụlẹni ndị Ju nị wẹ k'a kwarịrị ugun, dọnmẹrịrị Iwu Mozizi.”

⁶ Ya ndị-ozi ahụn pụ-ichẹn lẹ ndị-isi nọ zu kẹni wẹ leban okuni ẹnya.

⁷ E kube wẹ, Pita nọ lihi ọtọ, sị wẹ, “Umunẹ m, ụnụ a marịnghọ kẹ Osolobuẹ dọn họpụha m imẹ ụnụ mbụ-mbụ, gi m mẹ ndị alị ọzọ nụ oziọma, kweri.

⁸ Osolobuẹ hụn marịn obi ịhịan ile nọzị shịanị wẹ ẹri ghahanị iye wẹ Mmọn-nsọ k'o dọn ye ẹnyi.

⁹ Onwọnni ihiẹn ọ sị n'ọ rị ichẹn ẹgbata ẹnyi lẹ wẹ, makẹni o gigụọ okukwe chanchan obi wẹ.

¹⁰ Kị ụnụ rị nwan e buni okẹn ibu e che ndị kwerini olu a chọ ihiẹn rị Osolobuẹ ọnụ, ibu hụn o mẹni kẹ ẹnyi kẹ ndị nẹdi ẹnyi kanị asanị ẹka bu?”

¹¹ Pita nọzị sị, “Mba! Ẹnyi kweri nị ẹfọma Onyẹ-nwọnni-ẹnyi wụ Jesu ahụn ẹnyi gha nwọn nzụọpụha kẹ wẹ nwẹn ghazị nwọn.”

¹² Ndị hụ ile zu ebẹhụ nọ gba nkịtịn, gọnmẹ Pọlụ lẹ Banabasị ntịn: wẹ nọ gwama wẹ ihiẹn-nghọsị lẹ ọrụn-atụmẹnya Osolobuẹ gi wẹ rụn imẹ igunrun ndị alị ọzọ.

¹³ Pọlụ lẹ Banabasị e kugụ, Jemisi nọ sị, “Umunẹ m, gọn ni m ntịn:

¹⁴ Simiọnụ e kugụọ kẹ Osolobuẹ dọn mẹni ndị alị ọzọ ẹfọma mẹ ụfọdụ imẹ wẹ wụrụ ndị a za ẹfan a.

¹⁵ Ihiẹnni lẹ ihiẹn ndị-amụma ku imẹ Ẹkụkwọ-nsọ a laye. Makẹni, imẹ Ẹkụkwọ-nsọ, ndị-amụma de, sị,

¹⁶ ‘Ihiẹnni mẹgụ, m k'e kinhẹn; m k'a tụndọnzi ụlọ Defidi dannị; m k'a tụndọnzi ihiẹn wiwini, e mẹ m'ẹ rịzị k'ọ rị mbụ,

¹⁷ kẹni ndị ile họdụnị hụn ụzọ bịa d'e kunrun Di-nwọnni-ẹnyi — kẹ ndị alị ọzọ ile m k'a kpọ d'a za ẹfan m. Ya kẹ Di-nwọnni-ẹnyi hụn mẹ wẹ

¹⁸ marịn ihiẹn ndịnị ketekete ku.’

¹⁹ “Ya wụ, ihiẹn ẹnyi jẹnkọ d'e mẹ wụ ọnwan: ẹnyi esọngbukọ ndị wụlẹni ndị Ju hụn rị e gbehutọnị a bịa d'e kunrun Osolobuẹ.

²⁰ Kama, ẹnyi k'e dejẹnni wẹ ẹkụkwọ, sị wẹ hụ erilẹ ihiẹn ọwụlẹ wẹ gi rụa mmọn, makẹni ọ rụ arụ; w'a ghẹrẹlẹ; w'e rilẹ anụ ọwụlẹ wẹ rụkwọn olu; w'e rilẹ ẹdeke.

²¹ Makẹni, ndị a kuzi Iwu Mozizi arịọlẹ imẹ obodo ọwụlẹ kete-kete, gha agbọ d'e ru agbọ; wẹ hụ a gụnnị ịhịan ile ya imẹ ụlọ-ofufe ndị Ju rị obodo ichẹn-ichẹn Ụhụọhịn Ezumikẹn ile.”

Ẹkụkwọ-ozi Wẹ Dejẹnni Ndị Nke Jesu Hụn Wụlẹni Ndị Ju

²² Ya kẹ ndị-ozi ahụn pụ-ichẹn lẹ ndị-isi lẹ ndị ụka ile rị Jerusalẹm nọ kwerigbama nị wẹ hanpụha ịhịan imẹ wẹ, nị wẹ sọn Pọlụ lẹ Banabasị jẹn Antịọkụ. Mmadụ ẹbụọnị kẹ wẹ han: Judasị w'a kpọ Basabasị lẹ Saịlasị; wẹ ẹbụbụọ wụ ndị-isi imẹ ndị kwerini.

²³ Wẹ nọ de ẹkụkwọ-ozi ye wẹ. Ihiẹn wẹ de wụ: “Ẹnyi umunẹ ụnụ, kẹ ndị-ozi ahụn pụ-ichẹn kẹ ndị-isi, gba de ẹkụkwọ-ozini; ẹnyi rị e dejẹnni umunẹ ẹnyi wụlẹni ndị Ju, hụn rịsọnmẹ obodo Antịọkụ rị Siria lẹ Siria ile lẹ Silisia. Ẹnyi e kele ụnụ!

²⁴ “Ẹnyi a nụgụọ n'o nwọn ndị gha imẹ ẹnyi bịa d'e kunrun ụnụ, e gi ihiẹn wẹ rị e ku e sọngbu ụnụ, e mẹ obi e kọnrin ụnụ elu, bụ ẹnyi ezini wẹ.

²⁵ Ẹnyi e kugụọ nwan, kwerigbama; ẹnyi a hangụọ ndị k'a nọkin ẹnya ẹnyi, nị wẹ sọnhẹn ezi umunẹ ẹnyi wụ Banabasị lẹ Pọlụ

²⁶ hụn bu ndụn wẹ che ọb'ẹka makẹ ufiri Di-nwọnni-ẹnyi wụ Jesu Kristi.

²⁷ “Ya kẹ ẹnyi zini nwan Judasị lẹ Saịlasị; wẹ bịa e gi wẹ ọnụ gwa ụnụ ihiẹn ẹnyi deye imẹ ẹkụkwọ.

²⁸ Makẹni ọ hụghọ Mmọn-nsọ lẹ ẹnyi lẹ enwẹn ẹnyi mma nị ẹnyi ebuyekọ ụnụ ibu ọzọ — wezụka ihiẹn ndịnị rị mkpa:

²⁹ erilẹ ni ihiẹn-oriri wẹ gi rụa mmọn lẹzi ẹdeke lẹzi anụ wẹ rụkwọn olu; aghẹrẹlẹ ni. Ụnụ la ihiẹn ndịnị wẹ tọ, o k'a rịnị ụnụ mma. Nọdị nị ọhụnma.”

³⁰ Ya wẹ nọ zipụ wẹ, wẹ nọ shi Antịọkụ. E ru w'ẹ, wẹ nọ kpọgbama ndị ụka hụ ile we ẹkụkwọ-ozi hụ ye wẹ.

³¹ A gụngụ w'a, wẹ nọ ghọghọma makẹni ozi rịn'a kasị wẹ obi.

³² Judasị lẹ Saịlasị wụzị ndị-amụma; ya wẹ nọ kuzi ihiẹn bu ọda gi kasị ndị kwerini obi, mẹ wẹ kwerikẹnmẹ.

³³ Judasị lẹ Saịlasị nọ nọdịzị ẹkẹrẹ; o mẹgụ, ndị kwerini nọ gi udọn lẹ ndọnkwa ha wẹ ụla nị wẹ laburu ndị zihẹni wẹ.

³⁴ [Saịlasị nkẹ nọ sị n'o k'a nọdị ebẹhụ.]

³⁵ Kanị Pọlụ lẹ Banabasị a nọdị imẹ Antịọkụ, wẹ lẹ ndị bu ọda hụ a kuzi, e zi ozi Di-nwọnni-ẹnyi.

Kẹ Pọlụ lẹ Banabasị Dọn Kebe

³⁶ O tebe, Pọlụ nọ sị Banabasị, “Nị ẹnyi kin d'a hụn umunẹ ẹnyi imẹ Kraịstị rị obodo ile ẹnyi nọ zi ozi Di-nwọnni-ẹnyi, nị ẹnyi hụn kẹ wẹ rị.”

³⁷ Banabasị te chọ nị wẹ weri Jọnụ w'a kpọ Makị.

³⁸ Kanị Pọlụ achọnị nị wẹ weri onyẹ la wẹ tọ imẹ Pamfilia, onyẹ hụn sọnlẹni wẹ rụn ọrụn wẹ jẹn d'a rụn.

³⁹ Ezigbo oku nọ seni wẹ, nke wụ nị onyẹ-onyẹ nọ jẹnmẹ nke ẹ: Banabasị e weri Makị, e gi wẹ ụgbọ-mirin shi Saịprọsụ.

⁴⁰ Pọlụ nkẹ nọ weri Saịlasị — kẹ ndị ụka hagụ a ye ẹka Di-nwọnni-ẹnyi kẹn'o yen'ẹ ẹka.

⁴¹ Ọ nọ ghagbarị Siria lẹ Silisia, e mẹ ndị ụka rị ebẹhụ e kẹnrẹn.