Ọrụn Ndị-ozi 14 - Ika

Isi Nke Mmẹnọ Oziọma E Ru Ikoniọm

¹ Ihiẹn mẹ imẹ Antịọkụ rị Pisidia mẹzikwọ imẹ Ikoniọm. Pọlụ lẹ Banabasị banye imẹ ụlọ-ofufe ndị Ju rị ebẹhụ, ku oku-Chuku, nke wụ nị ndị bu ọda nọ kwerini Jesu, kẹ ndị Ju kẹ ndị wụlẹni ndị Ju.

² Kanị ndị Ju kwerilẹni nọ kpasu ndị wụlẹni ndị Ju, wiwi obi wẹ, wẹ nọ bunụmanị ndị kwerini.

³ Wẹ nọbie ebẹhụ, e zini Di-nwọnni-ẹnyi ozi e zishi ẹ ikẹn. Di-nwọnni-ẹnyi hụ e gi wẹ a rụn ihiẹn-nghọsị lẹ ọrụn-atụmẹnya bu ọda o gi kwadọn ozi ẹfọma a.

⁴ Kanị ndị obodo hụ kebe ekebe: ndịnị a nọyeni ndị Ju, ndịnị a nọyeni ndị-ozi hụ pụ-ichẹn wụ Banabasị lẹ Pọlụ.

⁵ Ogẹn ndị Ju lẹ ndị wụlẹni ndị Ju lẹ ndị-isi alị gi chọ nị wẹ mẹshi ndị-ozi hụ pụ-ichẹn ikẹn, gi ọmụma magbu wẹ,

⁶ ndị-ozi ahụn a nụ a, ya wẹ nọ gbashi Likonịa. Wẹ nọ jẹnsọnmẹ obodo ndị rị ebẹhụ, kẹ Listra kẹ Debẹ kẹ alị ndị nọhunmẹ ni wẹ,

⁷ zikọ oziọma jẹnkọ.

Kẹ Wẹ Dọn Zi Oziọma Imẹ Listra lẹ Debẹ

⁸ Imẹ Listra, o nwọn okẹnnyẹ ohu nọdị alị, ngụrọ k'ọ wụ kete wẹ mụl'a; o jẹntuni ijẹn.

⁹ Ọ hụ e gọn ntịn ebe Pọlụ rị e ku oku-Chuku. Pọlụ nkẹ e bu ẹnya zinmẹ ẹ, hụn a n'o nwọnghọ okukwe o gi dịnhịn,

¹⁰ ya ọ nọ yi, “Gi ụkụ ị ẹbụbụọ wuzo ọtọ!” Ya kẹ okẹnnyẹ nwẹn nọ tụshi elu, jẹnmẹ ijẹn.

¹¹ Ogẹn ndị hụ jun ebẹhụ gi hụn ihiẹn Pọlụ mẹ, wẹ nọ gi asụsụ Likonịa wẹ yimẹ, “Ndị mmọn e họnringụọ ịhịan hidan d'e kunrun ẹnyi-oo!”

¹² Wẹ nọ kpọ Banabasị Zeusu, kpọ Pọlụ Hẹmisi makẹni ya wụ hụn e kuni.

¹³ Ụlọ-mmọn Zeusu rịhụ ọnụ obodo hụ. Ya ohẹn-mmọn Zeusu nọ wẹhẹ okẹn-efin bu ọda lẹ obobo ọnụ-mgbọn obodo hụ, ya lẹ igunrun hụ, ọ chọkọ n'ọ chụnyeni ndị-ozi hụ pụ-ichẹn ẹjan.

¹⁴ Kanị ogẹn ndị-ozi hụ pụ-ichẹn wụ Banabasị lẹ Pọlụ gi nụ ihiẹnni, wẹ nọ dọka ẹwuru ye enwẹn wẹ olu, gbaban imẹ igunrun hụ, e yi,

¹⁵ “Ibe ẹnyi, kị ụnụ rị e mẹ ihiẹnni?! Ẹnyi wụhụ ịhịan mmaka nọ kẹ ụnụ!! Ẹnyi wẹhẹni ụnụ oziọma, kẹni ụnụ hụn ụzọ gbehutọ, la ihiẹn ndịnị nwọnlẹni-isi tọ, pụha d'e kunrun Osolobuẹ rị ndụn, onyẹ hụn ke elu-igwee lẹ ụwa lẹ ohimin lẹ ihiẹn ile rị imẹ wẹ.

¹⁶ Ogẹn mbụ, ọ nị alị ile rị ichẹn-ichẹn bi k'ọ sụọ wẹ.

¹⁷ Kanị, onwọnni ogẹn o gi latọ ịshịanị enwẹn ẹ ẹri ghahanị mma ọ rị e mẹ. Ọ gha elu-igwee e mẹ mirin e zueni ụnụ, e ye ụnụ mkpụrụ a ghọrị udu wẹ, e ye ụnụ ihiẹn-oriri ụnụ gi e rijun ẹfọ, e mẹ ịghọghọ e jun ụnụ obi.”

¹⁸ Ihiẹnni ile Pọlụ lẹ Banabasị e ku, ọ fụkwọ wẹ ọrụn nị wẹ d'a s'ẹka gbọndọn igunrun hụ achụnyelẹni wẹ ẹjan.

E Kinhẹn Wẹ Antịọkụ Rị Siria

¹⁹ Kanị o nwọn ndị Ju gha Antịọkụ lẹ Ikoniọm bịa Listra. A dọrịgụ wẹ igunrun hụ ye azụụn nke wẹ, ya wẹ nọ weri Pọlụ mama ọmụma, dọkpụnpụ a imẹ obodo hụ, e ro n'ọ nwụnhụngụọ.

²⁰ Kanị, ogẹn ndị kwerini gi fihunmẹ ẹ, ọ nọ lihi ọtọ, banye imẹ obodo hụ. Eki e fọn, ya lẹ Banabasị nọ shi Debẹ.

A Lakin Wẹ Antịọkụ Rị Siria

²¹ Ogẹn wẹ gi zigụ oziọma imẹ Debẹ, kpọhagụnị Jesu ndị bu ọda, wẹ nọ kin azụụn, shizi obodo Listra, gha ebẹhụ shizi Ikoniọm, gha Ikoniọm shizi Antịọkụ rị Pisidia:

²² wẹ hụ e jẹn, wẹ hụ a gba ndị nke Jesu rị imẹ obodo ndịnị umẹ; a gwa wẹ kwọnkẹnmẹ okukwe wẹ kwerini Kraịstị, nị “Ẹnyi k'a tarịrị afụnfụn bu ọda omẹni ẹnyi jẹnkọ d'a banye Alị-eze Osolobuẹ.”

²³ Ogẹn wẹ gi ghagbarịgụ ụka ndị rị ẹgbẹrẹ hụ, tumẹsọnmẹgụni wẹ ndị-isi, wẹ nọ gi ekpere lẹ ibu-ọnụ ha wẹ ye ẹka Di-nwọnni-ẹnyi hụn wẹ kwerini.

²⁴ Ya wẹ nọ ghashi Pisidia lụapụhazị Pamfilia.

²⁵ Ogẹn wẹ gi zigụ oziọma imẹ Pẹga rị Pamfilia, wẹ nọ jẹnmẹ Atalịa hụn wụ isi-obodo Pamfilia.

²⁶ Ya wẹ nọ nwan gi ụgbọ-mirin gha Atalịa lakin Antịọkụ rị Siria ebe wẹ nọ bu wẹ che ẹka Osolobuẹ nị wẹ d'a rụnma ọrụnnị wẹ rụngụ nwan.

²⁷ Ogẹn wẹ gi ru Antịọkụ rị Siria, wẹ nọ kpọgbama ndị ụka, gwa wẹ ihiẹn ile Osolobuẹ gi wẹ rụn lẹ k'o dọn kpọpụnị ndị alị ọzọ ụzọ okukwe.

²⁸ Ya wẹ nọ sọn ndị kwerini nọbie ebẹhụ.