Ọrụn Ndị-ozi 13 - Ika

Isi Nke Mmẹtọ Ndị-ụka E Zipụ Banabasị Lẹ Sọlụ D'e Zi Oziọma

¹ O nwọn ndị amụma lẹ ndị-nkuzi rị ụka rị Antịọkụ. Ndịnị wụ: Banabasị lẹ Simiọnụ w'a kpọ Onyẹ-ogi lẹ Lushiọsụ onyẹ alị Saịrini lẹ Manẹni hụn ya lẹ Hẹrọdụ nọ ụlọ ohu sue lẹzi Sọlụ.

² Ebe wẹ zu e fe Di-nwọnni-ẹnyi, e bu ọnụ, Mmọn-nsọ nọ sị, “Wepụha nị nị m Banabasị lẹ Sọlụ, nị wẹ hụn ụzọ d'a rụn ọrụn m kpọ wẹ d'a rụn.”

³ E bugụ wẹ ọnụ, mẹgụ ekpere, bugụ ẹka kwasị Banabasị lẹ Sọlụ, wẹ nọ zipụ wẹ.

Kẹ Banabasị Lẹ Pọlụ Dọn Zi Ozi Imẹ Saịprọsụ

⁴ Ogẹn Mmọn-nsọ gi nwan zipụ Banabasị lẹ Sọlụ, wẹ nọ shi Selusia, gi ụgbọ-mirin gha ebẹhụ shi alị Saịprọsụ ohimin nọhunmẹ.

⁵ Ogẹn wẹ gi ru Salamisi rị imẹ Saịprọsụ, wẹ nọ ku oku Chuku imẹ ụlọ-ofufe ndị Ju rịsọnmẹ ebẹhụ. Wẹ weri Jọnụ kẹ wẹ jẹnkọ n'ọ hụn ụzọ e yeni wẹ ẹka.

⁶ Ogẹn wẹ gi ghagbarịgụ alị hụ d'e rukwọrị Pafọsụ, wẹ nọ kunrun onyẹ Ju ohu gi ikẹn ọzọ a kpa ikẹn; onyẹ amụma-ntụ k'ọ wụ; ẹfan a wụ Ba-Jizọsị.

⁷ Ya lẹ gọvanọ wụ Sẹjọsụ Pọlọsụ rị. Sẹjọsụ Pọlọsụnị nwọn uche, o zi wẹ kpọhan'a Banabasị lẹ Sọlụ, makẹni ọ chọ n'ọ nụ oku Chuku.

⁸ Kanị okẹnnyẹ ahụn gi ikẹn ọzọ a rụn, hụn ẹfan Griki ẹ wụ Ẹlimasị, anịnị wẹ kuye; ọ hụ e mẹ n'o wiwi obi Gọvanọ, amamgbe o kwerini Jizọsị.

⁹ Kanị Sọlụ hụn wụzị Pọlụ hụn Mmọn-nsọ jun imẹ ẹ nọ bu ẹnya zinmẹ okẹnnyẹ hụ:

¹⁰ sị a, “Onyẹ hụn ẹro lẹ eje-ihiẹn ile jun imẹ ẹ! Nwa Ekwensụ! Eṅẹnrẹn ihiẹn ile rị ọchan! Y'a fịbehikọ ezioku Di-nwọnni-ẹnyi?!

¹¹ Gọn nwan ntịn: ẹka Di-nwọnni-ẹnyi jẹnkọ d'e bitụ ị kikẹnni, ẹnya k'e kpu i ishi ẹkẹrẹ ogẹn, y'e leghakọ ụzọ!” Ozigbo, ụzọ ile nọ mẹ Ẹlimasị igirigi-igirigi, gba a ishi ẹnya. Ọ nọ bisọnmẹmẹ ẹka, chọkọ onyẹ k'e dun'ẹ.

¹² Ogẹn Gọvanọ hụ gi hụn ihiẹn mẹni, ọ nọ kwerini Di-nwọnni-ẹnyi, makẹni nkuzi Di-nwọnni-ẹnyi ri ẹ ọnụ.

E Zi Wẹ Oziọma Imẹ Antịọkụ Rị Pisidia

¹³ Pọlụ lẹ ndị ya lẹ wẹ wị nọ gi ụgbọ-mirin gha Pafọsụ jẹnmẹ Pẹga rị Pamfilia. Ebẹhụ kẹ Jọnụ w'a kpọ Makị nọ la wẹ tọ, lakin Jerusalẹm.

¹⁴ Wẹ nọ jẹnshi ihun, gha Pẹga shi Antịọkụ rị Pisidia. O ru Ụhụọhịn Ezumikẹn, wẹ nọ banye imẹ ụlọ-ofufe ndị Ju, nọdị alị.

¹⁵ Ndị gụn Iwu Mozizi lẹ ihiẹn ndị-amụma de a gụngụ, ndị-isi ụlọ-ofufe ahụn nọ zi ịhịan d'a jụ wẹ, “Umunẹ, omẹni ụnụ nwọn oku ụnụ k'e gi kasị ndị rị ebeni obi, ku ni nwan.”

¹⁶ Ya kẹ Pọlụ nọ lihi ọtọ, gi ẹka gwa wẹ gba nkịtịn, ọ nọ kumẹ, sị, “Ndị Izrẹlụ lẹ ndị ọzọ a tụ egun Osolobuẹ, gọn ni ntịn!

¹⁷ Chuku ndị Izrẹlụ họrị ndị nẹdi ẹnyi kanị kẹ wẹ rị alị Ijiptu, o mẹ wẹ wụrụ okẹn alị; o mẹgụ, ọ nọ kpa ikẹn hi-ogbe wepụha wẹ alị Ijiptu.

¹⁸ Ọ nọ dinchanrịn ihiẹn ile wẹ mẹ imẹ atụ ọrọgbọ ahụa ọgụnnaị.

¹⁹ O tikpọ alị ẹsa te rị Kenaanị, we alị wẹ ye ndị Izrẹlụ weri.

²⁰ Ihiẹn nọkẹ ọrọgbọ ahụa iri-kwasị-ọgụnnaị kwasị nnụ (450) kẹ ihiẹn ndịnị gi mẹ. Omẹgụ, Osolobuẹ nọ yesọnmẹ wẹ ndị ahụn hannị wẹ eṅẹn d'e ru ogẹn Samuẹlụ onyẹ-amụma.

²¹ Ogẹn wẹ gi sị, ‘Ye ẹnyi eze’, Chuku nọ ye wẹ Sọlụ nwa Kishi, onyẹ ebọn Bẹnjamini. Sọlụ nọ kị wẹ ọrọgbọ ahụa ọgụnnaị.

²² Chuku nọ wepụ Sọlụ, webanhan Defidi n'ọ wụrụ eze wẹ. Chuku ku oku Defidi, sị, ‘A hụngụọ m'a nị Defidi nwa Jese wụ ụdị ịhịan a sụọnị m, onyẹ hụn k'e mẹchanrịn uche m.’

²³ Chuku e mẹgụọ ihiẹn o kwe nkwa a: ọ ghagụọ ebọn okẹnnyẹni wụ Defidi wepụhanị ndị Izrẹlụ Onyẹ-nzụọpụha wụ Jizọsị.

²⁴ “Nị Jesu d'e bidọn ọrụn a, Jọnụ e zigụọlẹ ndị Izrẹlụ ile ozi sị wẹ rogharị, mẹ mirin-Chuku gi ghọsị a.

²⁵ Ogẹn ọrụn Jọnụ gi gụma, Jọnụ nọ sị, ‘Onyẹ kẹ ụnụ ro nị ịya kẹ m wụ? Ẹlẹ m Kraịstị. Mba. O nwọn onyẹ lalanị m mẹmẹgụ; erudẹni m hụn a tọpụ eriri akpụkụ rị a ụkụ.’

²⁶ “Umunẹ m ndị ebọn Ebraham lẹ ndị a tụ egun Osolobuẹ imẹ ụnụ, e zihẹgụọnị wẹ ẹnyi oziọma nzụọpụhanị.

²⁷ Kanị, makẹni ndị bi Jerusalẹm lẹ ndị-isi wẹ aghọtanị ihiẹnni lẹ oku ndị-amụma w'a gụn Ụhụọhịn Ezumikẹn ile, wẹ nọ gbu ẹ, oku ndị hụ nọ gha ẹka wẹ bụn.

²⁸ Ọsụọn'a nị onwọnni ihiẹn wẹ hụn wẹ e gi ma a ikpe ọnwụn, a sịkwọ wẹ Paịleti gbu ẹ.

²⁹ Ogẹn wẹ gi mẹgụ ihiẹn ile Ẹkụkwọ-nsọ ku banyen'ẹ, wẹ nọ gha elu osisi ahụn butu ẹ, bu e che imẹ ili.

³⁰ Kanị Osolobuẹ nọ gha ọnwụn weli ẹ.

³¹ Ọ nọ pụhasọnmẹ ọrọgbọ akpọhịn ole-lẹ-ole, e we enwẹn ẹ a ghọsị ndị gha Galili sọnhẹn ẹ Jerusalẹm. Uwẹ rị nwan a shịa ẹri, a gwa ịhịan ile oku ẹ.

³² “Ẹnyi wẹhẹni nwan ụnụ oziọma, hụn wụ nị: nkwa hụ Osolobuẹ kwe ndị nẹdi ẹnyi kanị,

³³ o mẹzugụọnị ẹnyi wụ ụmụ wẹ ya ghahanị iweli Jesu. O mẹgụọ kẹ wẹ dọn de ẹ imẹ Ẹbụ-ọma nke ẹbụọ, sị, ‘Ị wụ Nwa m; e họnringụọ m nẹdi i tannị.’

³⁴ Banyeni oweli Osolobuẹ gha ọnwụn weli Kraịstị hụn wụnị Kraịstị erehikọ, Osolobuẹ ku oku ẹ imẹ Ẹkụkwọ-nsọ, sị, ‘M k'e mẹni i ihiẹn ndị hụ rị nsọ hụn m kwe Defidi nkwa a.’

³⁵ Ya k'ọ nọ kpọ ihiẹn nwẹn ẹfan imẹ ẹbụ-ọma ọzọ, sị, ‘Y'a nịkọ Onyẹ-nsọ ị rehi.’

³⁶ “O mẹ nke Defidi, k'o mẹgụ uche Osolobuẹ ogẹn nke ẹ, ọ nọ nwụnhụn, e li w'ẹ kẹ wẹ dọn li ndị nẹdi ẹ, ya ọ nọ rehi;

³⁷ kanị onyẹ hụ Osolobuẹ weli erehini.

³⁸ “Umunẹ m, marịn nị nwan nị ẹfan Jizọsịnị kẹ wẹ gi nwan e zi ụnụ ozi mgbagharị njọ; nị Osolobuẹ a gbagharị ndị ile kwerinin'ẹ ihiẹn ile,

³⁹ ihiẹn ile Iwu Mozizi ghalẹni a sa ẹka a hatu onyẹ mẹn'ẹ.

⁴⁰ “Kpachanpụ nị nwan ẹnya amamgbe ihiẹn ndị-amụma ku gha e mẹ ụnụ: ndị amụma sị,

⁴¹ ‘Ndị-nlelịa, lee n'ẹ! Y'a tụ ụnụ ẹnya, gbu ụnụ la iwi — makẹni o nwọn ihiẹn m rị e mẹ ogẹn nke ụnụ, ihiẹn ụnụ jẹnkọlẹni d'e kweri, kẹ wẹ gwalẹ ụnụ ru.’ ”

⁴² Ogẹn Pọlụ lẹ Banabasị gi pụkọ, wẹ nọ rịọ wẹ nị wẹ gwazị wẹ ihiẹn ndịnị Ụhụọhịn Ezumikẹn lalanị.

⁴³ Ogẹn wẹ gi gbashịagụ, ndị Ju bu ọda lẹ ndị ọzọ e fe ofufe ndị Ju nọ sọnmẹ Pọlụ lẹ Banabasị. Pọlụ lẹ Banabasị nọ gba wẹ umẹ, sị wẹ turusọnmẹ imẹ ẹfọma Osolobuẹ mẹni ẹnyi.

⁴⁴ Ụhụọhịn Ezumikẹn sọnn'ẹ, obodo hụ ile e d'a gụ-ezi gụ-ụlọ, e jun wẹ ebẹhụ kẹni wẹ nụ oku-Chuku.

⁴⁵ Kanị ndị Ju a hụn igunrun hụ, ẹnya nọ fụma wẹ; Pọlụ ku, a kagbu wẹ; a kparimẹ wẹ Pọlụ.

⁴⁶ Kanị Pọlụ lẹ Banabasị hụ e ku e kushi ẹ ikẹn, a sị, “O te rị mkpa nị wẹ gwagụ ụnụ ndị Ju oku Osolobuẹ. Kanị, ebe o mẹ ni ụnụ a jụgụọ a, gi ẹ sị ụnụ efuruni ndị e nwọn ndụn itẹbitẹ, lee n'ẹ, ẹnyi wejẹnkọnị nwan ndị wụlẹni ndị Ju ya.

⁴⁷ Makẹni ya kẹ Di-nwọnni-ẹnyi sị ẹnyi mẹ: ọ sị, ‘E tumẹgụọ m ụnụ nị ụnụ wụrụ ukpẹ ndị alị ọzọ, kẹni ụnụ wẹhẹ nzụọpụha ebe ile rị elu ụwa.’ ”

⁴⁸ Ogẹn ndị wụlẹni ndị Ju gi nụ ihiẹnni, ya wẹ nọ ghọghọma, jama oku Di-nwọnni-ẹnyi mma. Ndị ile wẹ họtọ nị wẹ nwọnrin ndụn-itẹbitẹ nọ kweri.

⁴⁹ Ẹrịra kẹ oku Di-nwọnni-ẹnyi dọn ghagbarị ẹgbẹrẹ hụ ile.

⁵⁰ Ya ndị Ju nọ kpasu ikpoho wẹ marịn amarịn wụlẹni ndị Ju, hụn e sọn ndị Ju e fe Osolobuẹ, uwẹ lẹ ikẹnnyẹ wẹ marịn amarịn obodo hụ, wẹ ile nọ kpokpomẹ Pọlụ lẹ Banabasị, chụpụ wẹ ẹgbẹrẹ wẹ.

⁵¹ Ya kẹ Pọlụ lẹ Banabasị nọ tichanpụ ẹjan rị wẹ ụkụ tọnị wẹ, gi gwa wẹ nị ikpe a magụọ wẹ; ya wẹ nọ gha alị hụ pụ, shi Ikoniọm.

⁵² Ịghọghọ lẹ Mmọn-nsọ e jun imẹ ndị hụn e sọn Jesu hụn rị Antịọkụ Pisidia.