Ọrụn Ndị-ozi 11 - Ika

Isi Nke Mmanaị Pita A Kọwanị Ndị Ghọtafien'ẹ K'o Jẹn

¹ Omẹgụ, ndị-ozi ahụn pụ-ichẹn lẹ ndị ụka Judia ile nọ nụ nị ndị wụlẹni ndị Ju a nabanhangụọzị oku Osolobuẹ.

² Ogẹn Pita gi nwan ru Jerusalẹm, ndị Ju kwa ugun kwerini Jesu nọ du ẹ kpemẹ,

³ sị, “Kị haịn i gi jẹn nke ndị kwalẹni ugun, sọndẹ wẹ ri ihiẹn-oriri?!”

⁴ Ya Pita nọ gi uri-uri kọwanị wẹ k'o dọn mẹ, sị,

⁵ “Ebe m rị e mẹ ekpere imẹ obodo Jọpa; ọ nọ kẹ sị ụran rọ bụ ẹlẹ ụran, m nọ hụn ọhụn: M nọ hụn ihiẹn nọ kẹ ẹkwa shịanị k'ọ gha elu-igwee lala nọkẹ sị wẹ dọdọn ẹ ntịn ẹnịnọ, ọ nọ ru ebe m rị.

⁶ E lekpọ m'a, m nọ hụn anụ ụkụ ẹnọ rị ichẹn-ichẹn lẹ anụ e ri anụ imẹ ẹ, lẹ ihiẹn ndị a rịnị lẹ nnụnụ e fe elu.

⁷ Ya kẹ m nọ nụ olu sị m, ‘Pita, lihi, gbu n'i ri.’

⁸ Kanị, m nọ sị, ‘Mba Di-nwọnni-ẹnyi, nị ihiẹn rụnị mọbụ ihiẹn ẹnyi a sọ abantuni m ọnụ.’

⁹ Kanị olu hụ a gha elu-igwee sịzị, ‘Ihiẹn Osolobuẹ mẹgụ n'ọ rị ọchan, akpọkwọl'a ihiẹn w'a sọ.’

¹⁰ Ihiẹnni e mẹpụ mgbe ẹtọ, wẹ nọ dọrị ihiẹn hụ ile shi elu-igwee.

¹¹ “Ozigbo hụ, ikẹnnyẹ ẹtọ wẹ gha Sizaria zi ozi bịanị m nọ ru ụlọ ẹnyi rị.

¹² Ya Mmọn-nsọ nọ sị m sọnmẹ wẹ, m'e tulẹ. Mmẹ lẹ ikẹnnyẹ isinni wụ umunẹ ẹnyi imẹ Kraịstị wị jẹn, ẹnyi nọ banye iwe okẹnnyẹ hụ.

¹³ Ọ nọ gwa ẹnyi k'o dọn hụn mmọn-ozi ohu turu iwe ẹ, sị a, ‘Zi ịhịan Jọpa d'a kpọha Saịmọnụ hụn w'a kpọ Pita.

¹⁴ O k'e zi i ozi yụ lẹ ikpụlọ i ile e gi nwọn nzụọpụha.’

¹⁵ Ogẹn m gi kumẹ, Mmọn-nsọ nọ hidankwasị wẹ k'o dọn hidankwasị ẹnyi isi-ibuzọ.

¹⁶ Ya m nọ nyanhan ihiẹn Di-nwọnni-ẹnyi ku: k'o dọn sị, ‘Mirin kẹ Jọnụ gi mẹ mirin-Chuku, kanị Mmọn-nsọ kẹ wẹ e gi mẹ ụnụ mirin-Chuku.’

¹⁷ O mẹ nwan nị Osolobuẹ ye wẹ oyiye ohu hụ o ye ẹnyi ogẹn ẹnyi gi kwerini Di-nwọnni-ẹnyi wụ Jesu Kristi, onyẹ kẹ m wụ hụn m'e gi gbọndọn Osolobuẹ!?”

¹⁸ A nụgụ wẹ ihiẹnni, onwọnzini ihiẹn wẹ ku; a ja wẹ Osolobuẹ mma, sị, “Ya wụ nị Osolobuẹ e yegụọzị nwan ndị wụlẹni ndị Ju oghere rogharị, nwọnrin ndụn!”

Ụka E Bidọn Imẹ Antịọkụ

¹⁹ Ndị ụka hụn gbayịya makẹ ukpokpo oku Stivini buhẹni ụka gbarukwọrị Finishịa, Saịprọsụ lẹ Antịọkụ, zikọ oziọma; kanị ndị Ju sụọ kẹ imẹrinmẹ wẹ zi oziọma.

²⁰ Kanị, o nwọnghọ ikẹnnyẹ gha alị Saịprọsụ lẹ Saịrini lụaha imẹ ndị ụka gbayiyanị hụn ru nwan Antịọkụ, gwama ndị wụlẹni ndị Ju oku-Chuku, e zi wẹ ozi Di-nwọnni-ẹnyi wụ Jesu Kristi.

²¹ Makẹni ẹka Di-nwọnni-ẹnyi rị imẹ wẹ, ndị bu ọda nọ kweri, rogharị sọnmẹ Di-nwọnni-ẹnyi.

²² Ogẹn ndị ụka rị Jerusalẹm gi nụ a, wẹ nọ zi Banabasị Antịọkụ.

²³ Ogẹn o gi ru ẹ, hụn ẹfọma Osolobuẹ k'ọ rị ọrụn, ọ nọ ghọghọ; ọ nọ dụn wẹ ọdụn wẹ wechanrịn enwẹn wẹ kwanị Di-nwọnni-ẹnyi, kwọnkẹnmẹchanrịn Di-nwọnni-ẹnyi.

²⁴ Banabasị wụ ezigbo ịhịan Mmọn-nsọ lẹ okukwe jun imẹ ẹ, nke wụnị ndị bugbu enwẹn wẹ ọda nọzị sọnmẹ Di-nwọnni-ẹnyi.

²⁵ Ya kẹ Banabasị nọ jẹnmẹ Tasọsụ d'a chọ Sọlụ.

²⁶ Ọ hụn a, ọ nọ wẹhẹ ẹ Antịọkụ. Uwẹ lẹ ndị ụka ahụn hụ e zu, wẹ hụ a kuzi igwerigwe, ọrọgbọ ahụa. Imẹ Antịọkụ kẹ wẹ nọ kpọma ndị nsọnmazụụn Kraịstị “Kristiansị,” ya wụ, “Ndị Nke Kraịstị.”

Ẹka Ndị-ụka Alị ọzọ Yeni Ụka Ndị Ju

²⁷ Ogẹn ahụn, o nwọn ndị-amụma gha Jerusalẹm bịa Antịọkụ.

²⁸ Onyẹ ohu imẹ wẹ ẹfan a wụ Agabusu nọ lihi ọtọ, bu amụma ghahanị ikẹn Mmọn-nsọ, nị okẹn ụnwụn sikọ d'a mụgbarị ụwa ile. Amụmanị bụn ogẹn Klọdiọsụ gi kị alị-eze ndị Rom.

²⁹ Ndị e sọn ụzọ Jesu nọ kwerigbama nị onyẹ-onyẹ jẹnkọ d'e wẹhẹ kẹ ẹka a han, nị wẹ zijẹnni ndị Ju kwerini Jesu hụn bi imẹ Judia.

³⁰ Ya wẹ nọ nwan tụ ihiẹn kẹ wẹ dọn ku, we ihiẹn wẹ tụ ye Banabasị lẹ Sọlụ jẹnni ndị-isi ụka rị Jerusalẹm.