Ọrụn Ndị-ozi 1 - Ika

Isi Nke Ohu Jesu A Lashi Elu-igwee Idẹnya Ndị nsọnmazụụn A

¹ Tiofilọsụ, imẹ ẹkụkwọ nke ibuzọ, m de ihiẹn ile Jesu rụn lẹ ihiẹn ile ọ kuzi, ghakwọrị ogẹn o gi bidọn ọrụn a

² d'e ru ụhụọhịn hụ wẹ weri ẹ shi elu-igwee, kẹ o gigụ ikẹn Mmọn-nsọ gwa ndị-ozi hụ pụ-ichẹn ọ họpụha ihiẹn wẹ jẹnkọ d'e mẹ.

³ Ogẹn o gi tagụ afụnfụn, nwụnhụngụ, ọ hụ a bịa d'e kunrun ndị-ozi hụ pụ-ichẹn ọrọgbọ akpọhịn ọgụnnaị, e gi ụzọ rị ichẹn-ichẹn a ghọsị wẹ n'ọ ghagụọ ọnwụn lihi, a gwa wẹ oku Alị-eze Osolobuẹ.

⁴ Ụhụọhịn ohu, ebe ya lẹ wẹ rị e ri ihiẹn-oriri, ọ nọ sị wẹ, “Aghakwọlẹ ni Jerusalẹm pụ; ka cheri ni onyẹ ahụn Nẹdi m kwe nkwa n'o k'e zihẹ, hụn m gwa ụnụ oku ẹ.

⁵ Jọnụ gi mirin mẹ mirin-Chuku; kanị, o gini d'e mẹ akpọhịn ole-lẹ-ole, wẹ k'e gi Mmọn-nsọ mẹ ụnụ mirin-Chuku.”

Jesu E Shi Elu-igwee

⁶ Ogẹn wẹ gi zuzi, wẹ nọ jụma a, “Di-nwọnni-ẹnyi, n'ị gbapụha nwan alị ẹnyi wụ Izrẹlụ ẹka ndị rị a kịnị ẹnyi nị ẹnyi kịmazị enwẹn ẹnyi?”

⁷ Ya Jizọsị nọ shịarị wẹ, sị, “Chuku-Nẹdi gi ẹka e ku ogẹn lẹ ụdị ogẹn ndị ahụn, ẹlẹ hụn ụnụ e gi marịn.

⁸ Kama, ụnụ jẹnkọ d'e nwọnhẹn ikẹn ogẹn Mmọn-nsọ e gi hidankwasịgụ ụnụ, ụnụ a wụrụ ndị ọshẹri m imẹ Jerusalẹm lẹ imẹ Judia ile lẹ imẹ Sameria d'e ru ebe ụwa ru.”

⁹ O kugụ ihiẹnni, ebe wẹ rị e lee ẹ, o buli elu, orukpu nọ kpumẹ ẹ, ahụnzịnị w'a.

¹⁰ Hụn ahụn wẹ rị e lee igwere moo k'ọ lakọ, ikẹnnyẹ ẹbụọ yi ẹwuru ọchan tueni nọ nwọnpụha idẹnmizi, turuyeni wẹ,

¹¹ sị wẹ, “Ikẹnnyẹ Galili, kị ụnụ turuni ebeni e lee igwere moo? Jesuni wẹ weri ebe ụnụ rị weshi elu-igwee jẹnkọ d'e kinhẹn kẹ ụnụ dọn nwan hụn a k'ọ lakọ elu-igwee.”

Onyẹ Nọkin Ẹnya Judasị

¹² Ya ndị nsọnmazụụn Jesu nọ gha ugu hụ w'a kpọ Olivẹtị, hụn nọkunmẹ Jerusalẹm lakin Jerusalẹm, ijẹn Ụhụọhịn Ezumikẹn hụn wụ nkirishi maịlị.

¹³ A banye wẹ obodo hụ, ya wẹ nọ shi mmughẹ hụ rị ibe elu hụn w'a nọdị. Wẹ wụ ndịnị: Pita, Jọnụ, Jemisi, Andrụ; Filipu lẹ Tamọsị, Batolomi lẹ Matiu, Jemisi nwa Alịfịọsụ lẹ Saịmọnụ lẹ Judasị nwa Jemisi. Saịmọnụ te rị ndị hụn gi ẹka ikẹn a nwan nị wẹ chụpụ ndị Rom rị a kị alị wẹ.

¹⁴ Ndịnị ile gi obi ohu e bu enwẹn wẹ e che imẹ ekpere, uwẹ lẹ ikpoho ndị ọzọ lẹ Meri nnẹ Jizọsị lẹzi umunẹ Jizọs ikẹnnyẹ.

¹⁵ Ogẹnni kẹ Pita gi lihi ọtọ imẹ igunrun ndị kwerini, gwama wẹ oku. Wẹ rị ihiẹn nọ kẹ mmadụ ọgụn-isin gbakikomẹ ebẹhụ. Ọ sị wẹ,

¹⁶ “Umunẹ m, Ẹkụkwọ-nsọ jẹnkọ d'e mẹzurịrị. O mẹgụọ nwan ebe Judasị rị nọkẹ kẹ Mmọn-nsọ dọn ku ghahanị Defidi, banyeni Judasị hụn duhẹ ndị nwụnrụn Jesu.

¹⁷ Makẹni, o te wụ onyẹ ohu imẹ ẹnyi; o te nwọnghọ ogbo ẹ imẹ ọrụnnị.” Ya kẹ Pita ku.

¹⁸ (Makẹni, okẹnnyẹ ahụn wụ Judasị gi egho eje-ihiẹn hụ o mẹ ṅọnrin alị: ọ dan, gi isi zu alị, ẹfọ a nọ gbawa, akụ-ẹfọ a nọ yọpụha.

¹⁹ Ndị ile bi imẹ Jerusalẹm nụ ihiẹnni, wẹ nọ gi asụsụ wẹ kpọ alị hụ, “Hakẹludama” ya wụ “Ogige ẹdeke.”)

²⁰ Ya Pita nọ kusọnmẹ, sị, “Makẹni wẹ de ẹ imẹ Ẹkụkwọ Ẹbụ-ọma, sị, ‘Wẹ la ụlọ a tọ okpokoro; onyẹ ọwụlẹ ebilẹ ẹ; onyẹ ọzọ ya weri ọkwa a.’

²¹ Ya wụ nwan nị onyẹ ọzọ jẹnkọ d'e sọn ẹnyi wụrụ ọshẹri. O k'a wụrịrị onyẹ ohu imẹ ikẹnnyẹ ndị hụ sọnni ẹnyi ogẹn hụ ile Di-nwọnni-ẹnyi wụ Jesu gi bi imẹ igunrun ẹnyi —

²² ghakwọrị ogẹn Jọnụ gi rị e mẹ mirin-Chuku d'e ru ụhụọhịn wẹ gha imẹ igunrun ẹnyi weri Jesu shi elu-igwee. Onyẹ hụ sikọ d'e sọn ẹnyi a shịa ẹri nị Jesu a ghagụọ ọnwụn lihi.”

²³ Ya wẹ nọ họpụha madụ ẹbụọ: Josẹfụ lẹ Matịasị. W'a kpọ Josẹfụ Basabasị, a kpọzịkwọ a Jọstusu.

²⁴ Ya wẹ nọ mẹ ekpere, sị, “Di-nwọnni-ẹnyi, ịyụ marịn obi ịhịan ile; dodo, ghọsị ẹnyi onyẹ ị họrị imẹ madụ ẹbụọnị,

²⁵ n'o weri ọkwa lẹ ọrụn onyẹ-ozi pụ-ichẹn, hụn Judasị latọ jẹnmẹ ebẹhụ furun'ẹ.”

²⁶ A tụ wẹ mkpọ, ọ nọ nwụn Matịasị; wẹ nọ we ẹ cheni ndị-ozi pụ-ichẹn mmanaị hụ.