Ọpụpụ 9 - Ika

Isi Nke Itenẹi Ube-mkpịnsịn Nke Isẹn: Anụ Ndị Ijiptu A Nwụnchanrịn

¹ Ya kẹ Osolobuẹ nọ sị Mozizi, “Jẹn d'e kunrun Fẹro; sị a, ‘Lee ihiẹn Osolobuẹ Chuku ndị Hibru ku: “Hatu ndị nke m, nị wẹ lama, kẹni wẹ fe m.

² Ị jụ nị y'a hatukọ wẹ, nị y'a tọ e gbọndọn wẹ,

³ mmẹ wụ Osolobuẹ jẹnkọ a tụ anụ ụnụ ile emu k'e gbuni wẹ, kẹ ẹshin kẹ jaki kẹ anyịnyan-mkpukpuke ụnụ, uwẹ lẹ efin lẹ atụnrụn lẹ ewu ụnụ.

⁴ Kanị m k'e mẹ nị ihiẹn rị ichẹn rị ẹgbata anụ ndị Izrẹlụ lẹ nke ndị Ijiptu, nke wụnị onwọnni anụ ọwụlẹ wụ nke ndị Izrẹlụ jẹnkọ d'a nwụnnị.” ’ ”

⁵ Ya kẹ Osolobuẹ nọ kaye ogẹn, sị, “Ekile kẹ m jẹnkọ d'e mẹ ihiẹnni imẹ alị Ijiptu.”

⁶ Eki e fọn, Osolobuẹ nọ mẹ ya wụ ihiẹn: ihiẹn-uriri ile ndị Ijiptu nwọn nọ nwụnhụn, kanị o nwọnni akpụ anụ ohu nwụnnị imẹ nke ndị Izrẹlụ.

⁷ Eze nọ zi ndị ọrụn a d'e lee k'o mẹ; ọ nọ hụn a n'o nwọnni akpụ anụ ohu nwụnnị imẹ nke ndị Izrẹlụ. Kanị obi anịn'a gbehutọ; ọ jụ n'ọ hatukọ ndị Izrẹlụ.

Ube-mkpịnsịn Nke Isin: Ẹsusue

⁸ Osolobuẹ nọ sị Mozizi lẹ Ẹrọnụ, “Nọ nị ẹnya-ọkụn kọrịsọnmẹ ẹnwụnrụn-ụkọ jun ẹka ole-lẹ-ole; Mozizi ya nọ idẹnya Fẹro bụọshi ẹ elu nị ufere buru ẹ.

⁹ O jẹnkọ d'e riẹn kẹ ntụn, ghagbarịcharịn alị Ijiptu ile — ẹsusue dọnmẹ ẹbụn e jun ịhịan lẹ ihiẹn-uriri ẹhụ.”

¹⁰ Ya wẹ nọ nọ ẹnya-ọkụn kọrị ẹnwụnrụn-ụkọ; wẹ nọ bịa d'e turu ihun eze. Mozizi nọ bụọshi ẹ elu ye imẹ ufere, ẹsusue kụma ẹbụn nọ suesọnmẹ ịhịan lẹ ihiẹn-uriri ẹhụ.

¹¹ Ndị ahụn a gwọ ọgụn asanị ẹka turu ihun Mozizi, makẹni ẹsusue ahụn suesọnmẹ wẹ nwẹn ẹhụ — kẹ wẹ kẹ ndị Ijiptu ile.

¹² Kanị Osolobuẹ nọ kpọkin obi Fẹro, o gọnni Mozizi lẹ Ẹrọnụ ntịn; o mẹhụ kẹ Osolobuẹ gwa Mozizi.

Ube-mkpịnsịn Nke Ẹsa: Ẹkwan Igwere

¹³ Ya kẹ Osolobuẹ nọ sị Mozizi, “Zọtẹnhin ekile, y'e jẹn d'e chekin Fẹro ụzọ; y'e sị a, ‘Lee ihiẹn Osolobuẹ, Chuku ndị Hibru ku: “Hatu ndị nke m nị wẹ lama, kẹni wẹ fe m.

¹⁴ Ị jụ ujeni, m jẹnkọ d'e yesọnmẹ yụ lẹ e nwẹn i lẹ ịhaịmẹ i lẹ ndị nke i afụnfụn ndịnị, ọ tụ ụnụ ọnụ, kẹni ị marịn nị onwọnni onyẹ ọwụlẹ rị kẹ mmẹ elu ụwa ile.

¹⁵ Nkẹ e weshigụọ m ẹka elu mẹ yụ lẹ ndị nke i ihiẹn; nkẹ a zachanpụgụọ ụnụ elu ụwa.

¹⁶ Kanị, ihiẹn m gi hatu i ye wụ ọnwan: kẹni m ghọsị ị ikẹn m lẹni ẹfan m kpọgbarị ụwa ile.

¹⁷ Echẹn kẹ ị rịkwọ e mẹni ndị nke m bugan-bugan, jụ nị y'a hatukọ wẹ nị wẹ la.

¹⁸ Ufiri ẹ, mgbeni ekile, m jẹnkọ d'e mẹ ẹkwan-igwere dan — ụdị hụn dantulẹni imẹ alị Ijiptu kete wẹ e pumẹlẹ ẹ.

¹⁹ Gwakwọ wẹ nwan weban ihiẹn-uriri i lẹ ihiẹn ọzọ ọwụlẹ wụ nke i hụn rị ogbe imẹ mmụlọ. Makẹni ya wụ ẹkwan-igwere jẹnkọ a dankwasị onyẹ ọwụlẹ lẹ anụ ọwụlẹ wẹ webanlẹni mmụlọ hụn o k'e kunrun ogbe; o k'a dangbu wẹ.” ’ ”

²⁰ Ịhaịmẹ Fẹro hụn tụ egun ihiẹn Osolobuẹ ku nọ jẹnmẹ ozigbo-ozigbo d'e weban igbọn wẹ lẹ ihiẹn-uriri wẹ mmụlọ.

²¹ Kanị ndị gilẹni ihiẹn ahụn Osolobuẹ ku dọn nọ na igbọn wẹ lẹ ihiẹn-uriri wẹ tọ ogbe.

²² Ya kẹ Osolobuẹ nọ sị Mozizi, “Weshi ẹka ị zinmẹ igwere kẹni ẹkwan-igwere dan imẹ alị Ijiptu ile, dankwasị ịhịan lẹ ihiẹn-uriri lẹ ihiẹn-akụnkụn ile rị ugbo imẹ alị Ijiptu.”

²³ Ogẹn Mozizi gi bu ọkpọ a zinmẹ igwere, Osolobuẹ nọ zihẹ akpara lẹ ẹkwan-igwere; amụma hụ e beye alị. Ẹrịra kẹ Osolobuẹ gi mẹ ẹkwan-igwere zue kẹ mirin alị Ijiptu;

²⁴ ẹkwan-igwere hụ a dan, amụma hụ ebejẹn ebelụa. Ẹbi jọgbu enwẹn ẹ ẹnịna akpọtuni imẹ alị Ijiptu kete wẹ e pumẹlẹ ẹ.

²⁵ Ebe ọwụlẹ imẹ Ijiptu, ẹkwan-igwere ahụn hụ a dangbuchanrịn ihiẹn ile rị ogbe kẹ ịhịan kẹ anụ, dangbuchanrịn ihiẹn-akụnkụn ile rị ugbo, tigichanrịn osisi ile.

²⁶ Azụụn Goshẹni ebe ndị Izrẹlụ rị sụọ kẹ ẹkwan-igwere danlẹni.

²⁷ Ya kẹ Fẹro nọ zi wẹ d'a kpọ Mozizi lẹ Ẹrọnụ. Ọ nọ sị wẹ, “Ujeni, e mẹọlẹ m njọ; mmẹ lẹ ndị nke m kẹ ikpe ma, ẹlẹ Osolobuẹ.

²⁸ Dodo, mẹ ekpere rịọ Osolobuẹ, makẹni akpabọnị lẹ ẹkwan-igwereni e higụọ ẹnyi! M jẹnkọ d'a hatu ụnụ nị ụnụ lama; ẹnyi egbọndọnkọzị ụnụ.”

²⁹ Mozizi nọ sị a, “Hụn m gihụ gha imẹ obodoni pụ, m jẹnkọ d'a kịshi ẹka elu zinmẹ Osolobuẹ, mẹ ekpere. Akpabọnị jẹnkọ d'a kụsị; ẹkwan-igwere a danbehi, kẹni i marịn nị ụwa wụ nke Osolobuẹ.

³⁰ Kanị a marịnghọ m nị kẹ ịyụ kẹ ịhaịmẹ i e ke tụmakwọ egun Osolobuẹ wụ Chuku.”

³¹ Ẹkwan-igwere ahụn wiwi osisi-flasị wẹ gi a kpa ẹkwa lẹ ọka-bali, makẹni bali a changụọ, flasị nkẹ a mịmagụọ obobo.

³² Kanị ọka-witi lẹ ọka-spẹtị ewiwini, makẹni w'e ke mịma — w'a ra mẹmẹ ẹgwa.

³³ Ya Mozizi nọ na eze tọ, gha imẹ obodo pụ. Ọ nọ kịshi ẹka enu zinmẹ Osolobuẹ; akpara lẹ ẹkwan-igwere nọ kụsị; mirin rị e zueni nọ zuebehi alị ahụn.

³⁴ Ogẹn Fẹro gi hụn nị mirin ahụn rị e zueni lẹ ẹkwan-igwere lẹ akpara a kụsị, ọ nọ mẹzi njọ — ịya lẹ ịhaịmẹ ẹ nọ kpọkin obi wẹ.

³⁵ Ya wụ, obi Fẹro kpọkin akpọhịn, o kwerini hapụ ndị Izrẹlụ nị wẹ lama. O mẹhụ kẹ Osolobuẹ dọn ku ghahanị Mozizi.