Ọpụpụ 8 - Ika

Isi Nke Ẹsatọ

¹ Osolobuẹ nọ sị Mozizi, “D'e kunrun Fẹro, y'a sị a, ‘Lee ihiẹn Osolobuẹ ku, “Hatu ndị nke m nị wẹ lama, kẹni wẹ hụn ụzọ fe m.

² Ị jụ nị y'a nịkọ wẹ, m k'e gi ẹwọ mẹshi alị ị ile ikẹn.

³ Ẹwọ k'e jun Iyi Naịlị. Wẹ k'a gha ebẹhụ banhan obi-eze i, ọgwa ị lẹ mmughẹ i lẹ elu bẹdi i; wẹ k'a banyesọnmẹ iwe ịhaịmẹ i; wẹ k'e nyinrin ndị alị ị ẹhụ; wẹ k'a tụban ẹnya-mgba ụnụ lẹ odo ụnụ.

⁴ Wẹ k'a tụkwasị kẹ ịyụ kẹ ndị alị ị kẹ ịhaịmẹ i.” ’ ”

⁵ Ya kẹ Osolobuẹ nọ sị Mozizi, “Sị Ẹrọnụ, ‘Tịnpụ ẹka ị n'i bu ọkpọ ị zinmẹ iyi ile lẹ uroro-amị ile wẹ gu mirin gha e ru ugbo lẹ ọgbọ-mirin ile, n'i mẹ ẹwọ gha imẹ wẹ pụha d'e jun alị Ijiptu ile.’ ”

⁶ Ya kẹ Ẹrọnụ nọ tịnpụ ẹka zinmẹ mirin rị alị Ijiptu, ẹwọ ndị ahụn nọ pụha, jun alị hụ.

⁷ Kanị ndị Ijiptu ahụn a gwọ ọgụn nọ gi ọgụn wẹ mẹzikwọ ihiẹn ohu ahụn: mẹ ẹwọ pụhazịkwọ alị Ijiptu.

⁸ Fẹro e zi wẹ kpọ Mozizi lẹ Ẹrọnụ. Ọ nọ sị, “Mẹ ni ekpere rịọ Osolobuẹ n'o wepụnị mmẹ lẹ ndị nke m ẹwọ ndịnị, ogẹn hụ, a hatu m ndị Izrẹlụ nị wẹ jẹn d'a chụnnị Osolobuẹ ẹjan.”

⁹ Mozizi nọ sị a, “Kaye ogẹn sụọn'ị, nị m gi mẹni yụ lẹ ịhaịmẹ i lẹ ndị nke i ekpere, ẹwọ ndịnị a gha ụnụ ẹhụ pụ, gha iwe ụnụ pụ — ọ họdụ ndị rị imẹ mirin Naịlị sụọ.”

¹⁰ Eze nọ za, sị, “Ekile.” Mozizi nọ sị “O jẹnkọ d'a rị k'i dọn ku, kẹni i gi ẹ marịn n'o nwọnni onyẹ nọ kẹ Osolobuẹ, Chuku ẹnyi.

¹¹ Ẹwọ ndịnị jẹnkọ d'a gha ẹhụ ụnụ lẹ iwe ụnụ pụ, yụ lẹ ịhaịmẹ i lẹ ndị nke i; imẹ mirin Naịlị sụọ kẹ wẹ k'a họdụ.”

¹² Ogẹn Mozizi lẹ Ẹrọnụ gi gha ebe Fẹro rị pụ, Mozizi nọ kpọku Osolobuẹ yeni ẹwọ ndị ahụn o zihẹni Fẹro.

¹³ Osolobuẹ nọ mẹ ihiẹn Mozizi rịọ a; ẹwọ ndị ahụn nọ nwụntọsọnmẹ imẹ ụlọ iwe wẹ, ezi wẹ lẹ imẹ ugbo wẹ.

¹⁴ Ndị Ijiptu hụ e kpọnkikomẹ wẹ; alị hụ ile e shinkpo.

¹⁵ Kanị ogẹn Fẹro gi hụn a nị ẹhụ e fuzi ndị Ijiptu, ọ nọ kpọkin obi, jụ n'o gọnkọ Mozizi lẹ Ẹrọnụ ntịn: ọ rịhụ kẹ Osolobuẹ dọn ku.

Ube-mkpịnsịn Nke Ẹtọ: Ịwawa

¹⁶ Ya kẹ Osolobuẹ nọ sị Mozizi, “Sị Ẹrọnụ, ‘Weshi ọkpọ ị elu fịan ẹjan rị alị’; ẹjan ile rị alị Ijiptu jẹnkọ d'e họnrin ịwawa.”

¹⁷ Wẹ nọ mẹ ẹ. Ogẹn Ẹrọnụ gi weshi ẹka a lẹ ọkpọ ahụn elu fịan anị, ịwawa nọ kpụ kẹ ịhịan kẹ anụ; ẹjan ile rị alị Ijiptu nọ họnrin ịwawa-ịwawa.

¹⁸ Ndị ahụn a gwọ ọgụn nọ nwan ikẹn wẹ nị wẹ gi ọgụn wẹ mẹmẹ ịwawa, ọ nịnị wẹ mẹ; ịwawa a kpụ kẹ ịhịan kẹ anụ.

¹⁹ Ndị ahụn a gwọ ọgụn nọ sị Fẹro, “Ọnwan wụkwọ ẹka ọrụn Osolobuẹ!” Kanị obi Fẹro kpọkin akpọhịn, o gọnni ntịn. O mẹhụ kẹ Osolobuẹ sị o k'e mẹ.

Ube-mkpịnsịn Nke Ẹnọ: Nzinzin

²⁰ Osolobuẹ nọ sị Mozizi “Zọtẹnhin ekile, n'i jẹn d'e chekin Fẹro ụzọ ebẹhụ o jẹnkọ Iyi; y'a sị a, ‘Lee ihiẹn Osolobuẹ ku: “Hatu ndị nke m nị wẹ la, kẹni wẹ fe m.

²¹ Omẹni y'a hatuni ndị nke m, e zihẹ m nzinzin d'a kpụ yụ lẹ ịhaịmẹ i lẹ ndị nke i, e zi m wẹ ye imẹ ụlọ ụnụ. Nzinzin k'e junchanrịn ụnọ ndị Ijiptu, kpụjundẹ akpakalị wẹ wuzo.

²² Kanị m k'e gi ẹka rị ichẹn sọn alị Goshẹni, ebẹhụ ndị nke m bi; nzinzin akpụkọ ebẹhụ, kẹni i gi ẹ marịn nị mmẹ, Osolobuẹ, rị ọrụn imẹ alịnị.

²³ M jẹnkọ d'e mẹ nị ihiẹn rị ichẹn rị ẹgbata ndị nke m lẹ ndị nke i. Ihiẹn-atụmẹnyanị jẹnkọ d'e mẹ ekile!” ’ ”

²⁴ Ya Osolobuẹ nọ mẹ ya wụ ihiẹn. Nzinzin nọ kpụjun obi-eze Fẹro lẹ ụnọ ịhaịmẹ ẹ, alị Ijiptu ile a la iwi yeni nzinzin.

²⁵ Ya kẹ Fẹro nọ kpọ Mozizi lẹ Ẹrọnụ. Ọ nọ sị wẹ “E jẹn ni! D'a chụnyeni ni Osolobuẹ ụnụ ẹjan, ka nọ nị alị ẹnyi ebeni chụn a.”

²⁶ Kanị Mozizi nọ sị, “Ọ rịkọ mma ẹrịra. Makẹni ụdị ẹjan ẹnyi a chụnyeni Osolobuẹ Chuku ẹnyi wụ agwa ebe ndị Ijiptu rị. Ẹnyi chụn nwan ẹjan w'a sọ, egikọ wẹ ọmụma magbu ẹnyi?

²⁷ Ẹnyi k'e jẹnrịrị imẹ atụ d'a chụnyeni Osolobuẹ Chuku ẹnyi ẹjan k'o dọn gwa ẹnyi. Ọrọgbọ akpọhịn ẹtọ kẹ ẹnyi e gi ru ebẹhụ.”

²⁸ Fẹro nọ sị a, “M k'a hatu ụnụ nị ụnụ jẹn d'a chụnyeni Osolobuẹ wụ Chuku ụnụ ẹjan imẹ atụ; ka ejẹntekwọlẹ ni. Mẹni ni m ekpere.”

²⁹ Mozizi nọ za sị “Hụn m gihụ gha ebeni ị rị pụ, m jẹnkọ d'e mẹ ekpere rịọ Osolobuẹ. O ru ekile, nzinzin ndịnị a pụnị Fẹro lẹ ịhaịmẹ ẹ lẹ ndị nke ẹ. Kanị, Fẹro ya hụnkwọ a n'o mẹzini ẹro jụ n'ọ hatukọ ndịnị d'a chụnyeni Osolobuẹ ẹjan.”

³⁰ Ya Mozizi nọ gha ebe Fẹro rị pụ, mẹ ekpere rịọ Osolobuẹ;

³¹ Osolobuẹ nọ mẹ ihiẹn Mozizi rịọ: nzinzin ndị hụ nọ pụnị Fẹro lẹ ịhaịmẹ ẹ lẹ ndị nke ẹ; akpụ nzinzin ohu ahọdụnị.

³² Kanị Fẹro nọzị kpọkin obi, jụ n'ọ hatukọ ndị Izrẹlụ.