Ọpụpụ 7 - Ika

Isi Nke Ẹsa

¹ Ya kẹ Osolobuẹ nọ sị Mozizi, “Lee ẹ, e mẹgụọ m'ị nọ kẹ Osolobuẹ ebe eze wụ Fẹro rị — Ẹrọnụ nwẹnẹ i a wụrụ ọnụ ị, nọkẹ onyẹ-amụma.

² I jẹnkọ d'e kuchanrịn ihiẹn ile m k'a gwa ị ku; Ẹrọnụ nwẹnẹ i k'a gwa Fẹro n'ọ hatu ndị Izrẹlụ nị wẹ gha alị a pụ.

³ Kanị m k'a kpọkin obi Fẹro; ọsụọdẹn'a nị m rụn ọrụn atụmẹnya lẹ ihiẹn-ghọsị bugbu enwẹn ẹ ọda imẹ alị Ijiptu,

⁴ o gọnkọ ụnụ ntịn. Ogẹn hụ kẹ m'e gi mẹ alị Ijiptu ihiẹn, yesọnmẹ wẹ ezigbo afụnfụn, gi e wepụha itu-agha m ile, ndị nke m ndị Izrẹlụ.

⁵ Ogẹn hụ kẹ ndị Ijiptu e gi marịn nị m wụ Osolobuẹ — ogẹn m k'e gi mẹshi wẹ ikẹn, gha imẹ alị Ijiptu wepụha ndị Izrẹlụ.”

⁶ Mozizi lẹ Ẹrọnụ mẹchanrịn kẹ Osolobuẹ dọn gwa wẹ.

⁷ Mozizi rị ahụa ọgụn ẹnọ ogẹn wẹ gi gwa Fẹro oku, Ẹrọnụ rị ahụa ẹtọ kwasị ọgụn ẹnọ.

Ọkpọ Ẹrọnụ E Họnrin Agwọ

⁸ Osolobuẹ nọ sị Mozizi lẹ Ẹrọnụ,

⁹ “Ogẹn Fẹro k'e gi sị ụnụ ‘Rụnghọsịnị ẹnyi ọrụn-atụmẹnya w'e gi kweri oku ụnụ’, y'a sị Ẹrọnụ, ‘Weri ọkpọ ị tụye alị ihun Fẹro’, o k'e họnrin agwọ.”

¹⁰ Ya Mozizi lẹ Ẹrọnụ nọ jẹn d'e kunrun Fẹro; wẹ nọ mẹchanrịn kẹ Osolobuẹ dọn gwa wẹ: Ẹrọnụ a tụ ọkpọ a ye ihun Fẹro lẹ ịhịamẹ ẹ, ọkpọ a nọ họnrin agwọ.

¹¹ Ya kẹ Fẹro nọ kpọbanhan ndị marịn ihiẹn lẹ ndị a gwọ ọgụn. Ndị Ijiptu ndịnị wẹ kpọbanhan nọzị gi ọgụn wẹ mẹzikwọ ihiẹn ohu hụ:

¹² onyẹ-onyẹ nọ tụ ọkpọ a ye alị, ọkpọ wẹ nọ họnrinsọnmẹ agwọ; kanị, ọkpọ Ẹrọnụ nọ luepụsọnmẹ nke wẹ.

¹³ Kanị obi Fẹro kpọkin akpọhịn, o gọnni Mozizi lẹ Ẹrọnụ ntịn; ọ rịhụ kẹ Osolobuẹ dọn ku.

Ube-mkpịnsịn Iri Chuku Fịan Alị Ijiptu Ube-mkpịnsịn Ibuzọ: Okẹn Iyi Wẹ E Họnrin Ẹdeke

¹⁴ Osolobuẹ nọ sị Mozizi “Obi Fẹro kpọkin akpọhịn; ọ jụgụọ n'ọ hatukọ ndịnị nị wẹ lama.

¹⁵ Ụzụtụntụn y'e jẹn d'e kunrun ẹ ebẹhụ o jẹnkọ Iyi Naịlị. Turu mkpẹnrẹn Naịlị ebẹhụ cheri ẹ; weri ọkpọ ahụn họnrin agwọ kwọndọn.

¹⁶ Y'a sị a, ‘Osolobuẹ, Chuku ndị Hibru, zi m d'a sị ị “Hatu ndị nke m, kẹni wẹ fe m imẹ atụ, kanị y'e ke gọnkwọ nwan ntịn.”

¹⁷ Osolobuẹ rị nwan a sị ị, “M jẹnkọ nwan d'a ghọsị ị nị m wụ Osolobuẹ: Lee ẹ, m jẹnkọ d'e gi ọkpọnị rị m ẹka fịan mirin Naịlịnị, mirin ẹ e họnrin ẹdeke.

¹⁸ Azụn rị imẹ ẹ k'a nwụn, mirin ẹ e shinmẹ; ndị Ijiptu asakọ ẹka ra a.” ’ ”

¹⁹ Osolobuẹ nọzị sị Mozizi, “I k'a sị Ẹrọnụ, ‘Weri ọkpọ ị, y'a tịnpụ ẹka ị zinmẹ mirin ile rị alị Ijiptu: kẹ mirin rị iyi kẹ hụn rị uroro-amị ndị wẹ gu mirin gha e ru ugbo wẹ kẹ ọgbọ-mirin kẹ mirin ile wẹ dọnmẹtọ imẹ Ijiptu’; wẹ ile k'e họnrinchanrịn ẹdeke. Ẹdeke k'e jun ụzọ ile imẹ Ijiptu, kẹ ihiẹn-mirin wẹ gi osisi mẹmẹ kẹ hụn wẹ gi ọmụma tụ.”

²⁰ Ya Mozizi lẹ Ẹrọnụ nọ mẹchanrịn kẹ Osolobuẹ dọn ku. Idẹnya eze lẹ ịhaịmẹ ẹ, Mozizi nọ weshi ọkpọ a elu, fịan mirin Naịlị hụ, mirin ẹ ile nọ họnrin ẹdeke.

²¹ Azụn rị Naịlị nọ nwụnhụn, mirin iyi ahụn nọ shinmẹ, o shinkpo nke wụ nị ọ nịnị ndị Ijiptu ra; ẹdeke e jun ụzọ ile imẹ alị Ijiptu.

²² Kanị ndị a gwọ ọgụn imẹ alị Ijiptu nọzị gi ọgụn wẹ mẹzikwọ ihiẹn ohu ahụn. Obi nọ kpọkin Fẹro eze Ijiptu, ọ jụ n'o gọnkọ Mozizi lẹ Ẹrọnụ ntịn. Ihiẹn mẹhụ kẹ Osolobuẹ dọn ku.

²³ Eze Ijiptu e gbehutọdẹ, kin azụụn shi imẹ ọgwa a; onwọnzikwọnị ihiẹn ọ kpọ hụnnị.

²⁴ Ya kẹ ndị Ijiptu nọ gumẹ mkpẹnrẹn mirin Naịlị nị wẹ hụn mirin ra, makẹni asanị wẹ ẹka ra mirin Iyi hụ.

Ube-mkpịnsịn Nke Ẹbụọ: Ẹwọ E Jun, Nwụnhụn, E Shin

²⁵ O mẹpụ akpọhịn ẹsa Osolobuẹ mẹ ihiẹn hụ o mẹ Iyi Naịlị,