Ọpụpụ 6 - Ika

Isi Nke Isin

¹ Ya kẹ Osolobuẹ nọ sị Mozizi “I jẹnkọ nwan d'a hụn ihiẹn m k'e mẹ Fẹro. M mẹgụọ a ihiẹn m k'e mẹ ẹ, o k'e gi ẹ hatu ndị nke m nị wẹ la; m mẹgụọ a ihiẹn m k'e mẹ ẹ, ọchụchụ k'o k'a chụdẹ wẹ alị a.”

² Osolobuẹ nọzị gwa Mozizi oku, sị, “Mmẹ wụ Osolobuẹ.

³ Kẹ m we enwẹn m ghọsị Ebraham lẹ Aziki lẹ Jekọpụ, m ghọsị wẹ nị m wụ Chuku Nwọn Ikẹn Ile, kanị, egini m ẹfan m wụ Osolobuẹ ghọsị wẹ enwẹn m.

⁴ M mẹmẹzikwọ nkwerigbama ẹgbata mmẹ lẹ wẹ, kwe wẹ nkwa nị m jẹnkọ e ye wẹ alị Kenaanị hụn wẹ bi ogẹn ahụn rịkẹ abịamabịa.

⁵ A nụgụọzị m udẹn ndị Izrẹlụ rị a sụn, okpuru ndị Ijiptu rị nwan a kpa wẹ igbọn; a nyanhanlẹ m nkwerigbama m.

⁶ “Sị nwan ndị Izrẹlụ, ‘M wụ Osolobuẹ; m k'e wepụha ụnụ imẹ ẹgbụn ndị Ijiptu kẹn ụnụ; m k'e mẹ ụnụ weri enwẹn ụnụ ẹka ndị Ijiptu, e gi m ikẹn m jẹnkọ d'a kpa lẹ okẹn ihiẹn ndị m k'e mẹ gi ye wẹ afụnfụn zụọpụha ụnụ.

⁷ M k'e weri ụnụ che ẹhụ m nọkẹ ndị nke m, e mẹ m ụnụ kẹ Chuku ụnụ. Ogẹn hụ, ụnụ a marịn nị mmẹ wụ Osolobuẹ, Chuku ụnụ, hụn tọpụ ẹgbụn ndị Ijiptu kẹn ụnụ.

⁸ M k'e webanhan ụnụ alị ahụn m kịshi ẹka ẹbụọ elu, kun enwẹn m, kwe nkwa nị m k'e ye Ebraham lẹ Aziki lẹ Jekọpụ ya. M k'e ye ụnụ ya weri. Mmẹ wụ Osolobuẹ.’ ”

⁹ Mozizi nọ gwa ndị Izrẹlụ ihiẹnni, kanị egọnni w'ẹ ntịn makẹni ndụn a gụchanrịngụọ wẹ yeni ihiẹn rị e mẹni wẹ lẹ eje-igbọn wẹ rị a kpa wẹ.

¹⁰ Ya kẹ Osolobuẹ nọ nwan sị Mozizi,

¹¹ “Jẹnmẹ d'a gwa eze Ijiptu ya hatu ndị Izrẹlụ nị wẹ gha alị a pụ.”

¹² Kanị Mozizi nọ sị Osolobuẹ, “Omẹni ndị Izrẹlụ egọnni m ntịn, nanị kẹ Fẹro k'a dọn gọn m ntịn hụnnị m malẹni ku oku?!”

¹³ Kanị Osolobuẹ a tọ a gwashi Mozizi lẹ Ẹrọnụ oku ikẹn banyeni ndị Izrẹlụ lẹ Fẹro, eze ndị Ijiptu, sị wẹ gha alị Ijiptu wepụha ndị Izrẹlụ.

Ezi-lẹ-ụlọ Mozizi Lẹ Ẹrọnụ Gha Pụha

¹⁴ Ndịnị wụ ndị nẹdi wẹ imẹ ikpụlọ wẹ rị ichẹn-ichẹn: Ikẹnnyẹ Rubẹni nwa-ibuzọ Jekọpụ mụ wụ Hanọkụ, Palu, Hẹzrọnụ lẹ Kami; ẹka wẹ kẹ ikpụlọ ichẹn-ichẹn rị ebọn Rubẹni gha pụha.

Ụmụ Rubẹni Ụmụ Simiọnụ

¹⁵ Ikẹnnyẹ Simiọnụ mụ wụ Jemuẹlụ, Jamini, Ohadị, Jakini, Zoha lẹ Shaulu hụn nnẹ mụn'a wụ onyẹ Kenaanị; ẹka wẹ kẹ ikpụlọ ichẹn-ichẹn rị ebọn Simiọnụ gha pụha.

Ụmụ Livaị

¹⁶ Ndịnị wụ ẹfan ikẹnnyẹ Livaị mụ kẹ wẹ dọnsọnmẹ detu wẹ: Gẹshọnụ, Kohatị lẹ Mẹrari. Livaị tọ ahụa ẹtọ arịa ọgụn-ẹsa.

¹⁷ Ikẹnnyẹ Gẹshọnụ mụ wụ Libni lẹ Shimei; ẹka wẹ kẹ ikpụlọ ichẹn-ichẹn wụ ụmụ Gẹshọnụ gha pụha.

¹⁸ Ikẹnnyẹ Kohatị mụ wụ Amram, Iziha, Hibrọnụ lẹ Uziẹlụ. Kohatị tọ ahụa mmẹtọ kwasị ọgụn-isin.

¹⁹ Ikẹnnyẹ Mẹrari mụ wụ Mali lẹ Mushi. Ọnwan wụ ẹbozo rịsọnmẹ ebọn Livaị lẹ ụmụ wẹ.

²⁰ Amram lụ Jokẹbẹdi, nwẹnẹ-nẹdi ẹ; ọ nọ mụn'a Ẹrọnụ lẹ Mozizi. Amram tọ ahụa ẹtọ arịa ọgụn ẹsa.

²¹ Ikẹnnyẹ Iziha mụ wụ Kora, Nẹfẹgi lẹ Zikri.

²² Ikẹnnyẹ Uziẹlụ mụ wụ Mishẹlụ, Ẹl'zafanị lẹ Sitri.

²³ Ẹrọnụ lụ Ẹlishẹba nwa Aminadabụ; Ẹlishẹba-nị wụ nwẹnẹ Nashọnụ. Ọ nọ mụnị Ẹrọnụ Nadabụ lẹ Abihu lẹ Ẹliẹza lẹ Itama.

²⁴ Ikẹnnyẹ Kora mụ wụ Asiri, Ẹl'kana lẹ Abiasafụ: ẹka wẹ kẹ ikpụlọ rịsọnmẹ ebọn Kora gha pụha.

²⁵ Ẹliẹza nwa Ẹrọnụ lụ onyẹ ohu imẹ ụmụ-ikpoho Putiẹlụ. Ọ nọ mụ n'a Finẹhasị. Ndịnị wẹ kẹ ikpụlọ ndị rịsọnmẹ ebọn Livaị gha pụha — onyẹ-onyẹ lẹ ẹbozo ẹ.

²⁶ Ẹrọnụ-nị lẹ Mozizi-ni kẹ Osolobuẹ sị, “D'a gha nị alị Ijiptu kịpụha ebọn ile rị Izrẹlụ uri-uri.”

²⁷ Uwẹ ẹbụbụọ wụ ndị hụn gwa Fẹro wụ eze Ijiptu oku kẹni wẹ gha alị Ijiptu wepụha ndị Izrẹlụ.

Ihiẹn Osolobuẹ Sị Mozizi Lẹ Ẹrọnụ Mẹ

²⁸ Ogẹn Osolobuẹ gi gwa Mozizi oku imẹ alị Ijiptu,

²⁹ ọ sị Mozizi, “Mmẹ wụ Osolobuẹ; gwa eze Ijiptu wụ Fẹro ihiẹn ile m rị a gwa ị.”

³⁰ Kanị Mozizi nọ sị Osolobuẹ, “Kịnị k'e mẹ Fẹro gọn m ntịn, hụnnị o mẹni ama m ku oku ọhụnma!”