Ọpụpụ 5 - Ika

Isi Nke Isẹn Mozizi Lẹ Ẹrọnụ E Jẹn D'a Hụn Eze Alị Ijiptu

¹ Mozizi lẹ Ẹrọnụ nọ jẹn d'e kunrun eze Ijiptu wụ Fẹro; wẹ nọ sị, “Osolobuẹ, Chuku ndị Izrẹlụ sị, ‘Hatu ndị nke m, kẹni wẹ jẹn d'e mẹni m mmẹmmẹ imẹ atụ gi fe m ofufe.’ ”

² Eze nọ sị, “Onyẹ wụ Osolobuẹ hụ, hụn m'e gi gọn ẹ ntịn hatu Izrẹlụ? Amarịn m Osolobuẹ; ahatukọ m Izrẹlụ.”

³ Mozizi lẹ Ẹrọnụ nọ sị, “Chuku ndị Hibru e kunrungụọ ẹnyi. Hatu nwan ẹnyi nị ẹnyi jẹn ijẹn akpọhịn ẹtọ imẹ atụ d'a chụnyeni Osolobuẹ wụ Chuku ẹnyi ẹjan, amamgbe ọ tụ ẹnyi emu mọbụ gi ọpịa-agha gbu ẹnyi.”

⁴ Eze alị Ijiptu nọ sị, “Mozizi lẹ Ẹrọnụ, ụnụ anịkọ ndịnị rụn ọrụn wẹ rị a rụn?! D'a rụnma nị ọrụn ahụn wẹ sị ụnụ rụn!”

⁵ Ọ sịzị wẹ, “Lee kẹ ndịnị buhan ọda, ụnụ hụ e mẹ wẹ arụnzịlẹ ọrụn wẹ rị a rụn!”

⁶ Ụhụọhịn ohu hụ, eze nọ ye ndị Ijiptu hụn a kị igbọn lẹ ndị Izrẹlụ hụ rị a kị ibe wẹ iwu, sị wẹ,

⁷ “Eyezilẹ ni ndịnị ẹfịfịa ọkpọ nkụn ahụn wẹ gi a kpụ blọkụ; wẹ jẹnmẹ d'e gi ihiẹn ẹka wẹ chọrị a.

⁸ Ka sịkwọ nị wẹ kpụ ole w'a kpụ mbụ! Ebebelụakwọlẹ ni ole w'a kpụ. Onwọnni ihiẹn wẹ rị a rụn; ya haịn wẹ gi e yi ‘Ẹnyi chọ nị ẹnyi jẹn d'a chụnyeni Chuku ẹnyi ẹjan.’

⁹ Yekẹnmẹ ni wẹ ọrụn rụn, kẹni ọrụn kẹn wẹ, ogẹn ahụn, ahụnkọzị wẹ efe gọnmẹ ntịn ntụ ahụn wẹ rị a tụ wẹ!”

¹⁰ Ndị Ijiptu ahụn a kị igbọn lẹ ndị Izrẹlụ hụ rị a kị ibe wẹ nọ pụ, jẹnmẹ d'a gwa ndị Izrẹlụ, sị, “Eze sị, ‘Eyekọzị m ụnụ ẹfịfịa ọkpọ-nkụn.

¹¹ Gi ni ihiẹn-ẹka ụnụ d'a chọrị a ebe ọwụlẹ ụnụ k'a nọ hụn a. Kanị, ebelụakọkwọ wẹ ole ụnụ a kpụ mbụ, kaka!’ ”

¹² Ya kẹ ndị Izrẹlụ nọ wahunmẹmẹ alị Ijiptu d'e huerisọnmẹ ukun ọka-witi wẹ be isi tọ anị gi họnrin ẹfịfịa ọkpọ-nkụn.

¹³ Ndị hụn a kị igbọn a tọ a sị wẹ, “Rụnzukwọ nị ihiẹn wẹ sị ụnụ a rụn ụhụọhịn, ihiẹn ụnụ a rụn ogẹn wẹ gi rị e ye ụnụ ẹfịfịa.”

¹⁴ Ndị a kịnị Fẹro igbọn nọ gbu ndị Izrẹlụ hụ a kị ibe wẹ ili, sị wẹ, “Kị haịn, kẹ ụnyanhụn kẹ tannị, ụnụ akpụzuni blọkụ ole furu nị ụnụ kpụ kẹ ụnụ dọn e mẹ mbụ?”

¹⁵ Ya kẹ ndị Izrẹlụ ahụn wụ ndị-isi ọrụn nọ jẹn d'a kwanghọsị eze, sị, “Kị haịn i gi rị e mẹ ẹnyi ndị idibo i ẹnịna?

¹⁶ Eyeni wẹ ẹnyi ẹfịfịa bụ wẹ hụkwọ a sị ẹnyi ‘Kpụ nị blọkụ!’ Wẹ hụdẹ e gbu ẹnyi ili, kanị ẹka ndị nke i k'ọ rị!”

¹⁷ Eze nọ sị, “Onwọnni ihiẹn ụnụ rị a rụn! Onwọnni ihiẹn ụnụ rị a rụn haịn ụnụ gi rị a sị, ‘Nị ẹnyi jẹn d'a chụnyeni Osolobuẹ ẹjan.’

¹⁸ Jẹnmẹ ni ozigbo d'a rụnma ọrụn! Eyekọ wẹ ụnụ ẹfịfịa ọwụlẹ; kanị, ụnụ k'a kpụzurịrị blọkụ ole wẹ sị ụnụ a kpụ ụhụọhịn-ụhụọhịn.”

¹⁹ Ya kẹ ọ nọ we ndị Izrẹlụ ahụn wụ ndị-isi ọrụn ẹnya nị ezigbo nsọngbu kẹ wẹ rị imẹ ẹ — ebe wẹ nọ sị wẹ, “Ebelụakwọlẹ nị blọkụ ole wẹ sị ụnụ a kpụ ụhụọhịn-ụhụọhịn.”

²⁰ Ogẹn wẹ gi gha ebe Fẹro rị pụha, wẹ nọ kunrun Mozizi lẹ Ẹrọnụ ebe wẹ rị e che wẹ.

²¹ Wẹ nọ sị Mozizi lẹ Ẹrọnụ “Osolobuẹ ya hụn ihiẹn ụnụ mẹ, gi ẹ hannị ẹnyi eṅẹn, makẹni ụnụ e segụọ ẹnyi ye oku Fẹro lẹ ihu ẹ; ụnụ e bugụọ ọpịa che wẹ ẹka nị wẹ gi gbu ẹnyi.”

Mozizi A Kwanghọsị Osolobuẹ

²² Mozizi nọ kunrunzi Osolobuẹ sị, “Osolobuẹ kị haịn i gi bu ndị nke i che oku? Ọnwan k'i zihẹni m?

²³ Kete m gwagụlẹ eze wụ Fẹro ihiẹn i ku, nsọngbu-nsọngbu k'ọ rị e ye ndịnị, bụ y'e ke zụọpụhakwọ wẹ kaka!”