Ọpụpụ 4 - Ika

Isi Nke Ẹnọ Osolobuẹ E Ye Mozizi Ikẹn

¹ Mozizi nọ sị Osolobuẹ, “O mẹ nwan nị ndị Izrẹlụ ekwerini nị ihiẹn m gwa wẹ wụ ezioku mọbụ nị egọnni wẹ m ntịn? Omẹni wẹ sị m, ‘Ntụ, onwọnni ogẹn i gi hụn Osolobuẹ’?”

² Ya kẹ Osolobuẹ nọ sị Mozizi, “Kị wụ ihiẹn ahụn rị ị ẹka?” Ọ nọ sị, “Ọkpọ rọ.”

³ Osolobuẹ nọ sị, “Tụ a ye anị.” Mozizi a tụ a ye alị, ọ nọ họnrin agwọ; ya Mozizi nọ gbazụkan'a.

⁴ Osolobuẹ nọ sị Mozizi, “Tịnpụ ẹka, n'i kwọndọn ẹ ọdụndụn.” Ya Mozizi nọ tịnpụ ẹka, kwọndọn agwọ hụ ọdụndụn; ọ nọ nọ a ẹka họnrinzi ọkpọ.

⁵ Osolobuẹ nọ sị, “Ihiẹnni kẹ y'e gi ghọsị wẹ nị ya hụngụọ Osolobuẹ, Chuku ndị nẹdi wẹ — Chuku Ebraham, Chuku Aziki, Chuku Jekọpụ.”

⁶ Osolobuẹ nọ sịzị Mozizi, “Rụ ẹka ye imẹ ẹwuru i.” Mozizi nọ mẹ ẹ. O sepụha ẹka a, ọ nọ hụn a nị oti a fụkpogụọ a ẹka — ẹka a hụ a chan kẹ ẹkwa ọchan.

⁷ Ya kẹ Osolobuẹ nọ sị, “Rụzị a ye imẹ ẹwuru i.” Ya Mozizi nọ rụzị ẹka ye ẹwuru ẹ. O sepụha a nwan, ọ nọgụọzị kẹ akpụkpọ-ẹhụ a.

⁸ Osolobuẹ nọ sị “Omẹni ekwerini wẹ ihiẹn i ku mọbụ nị egini wẹ ahịma ibuzọ ahụn dọn, ikẹnkwọ nị wẹ gi ahịma hụnnị dọn.

⁹ Wẹ jụchanrịn n'e gikọ wẹ ahịma ẹbụbụọnị dọn, jụ n'e gọnkọ wẹ i ntịn, y'e weri ẹkẹrẹ mirin imẹ Iyi Naịlị, hu ẹ ye alị; mirin ahụn i weri imẹ Iyi Naịlị k'e họnrin ẹdeke ebẹhụ i hutọ a.”

Mozizi Sị Ẹlẹ O K'a Saẹka Jẹn

¹⁰ Kanị Mozizi a sị “Euu, Osolobuẹ, amatuni m ku oku — kẹ mbụ kẹ hụnnị ị gwama mmẹ odibo i oku. M'a ta oku ata; m'a sụ nsụ.”

¹¹ Osolobuẹ nọ sị a, “Onyẹ ye ịhịan ọnụ? Onyẹ e mẹ ịhịan anụlẹ ihiẹn mọbụ ekulẹ oku? Onyẹ e mẹ ẹ legha ụzọ mọbụ họnrin ẹnya-ishi? Ẹlẹ mmẹ wụ Osolobuẹ rọ?

¹² Jẹnmẹ nwan; m jẹnkọ e yeni i ẹka ku, gwazịkwọ ị ihiẹn i jẹnkọ d'e ku.”

¹³ Kanị Mozizi nọ sị, “Euu Osolobuẹ, dodo zijẹn onyẹ ọzọ!”

Osolobuẹ Sị Mozizi K'e Jẹnrịrị

¹⁴ Ya kẹ Osolobuẹ nọ buni Mozizi olulu, sị, “Nwẹnẹ i wụ Ẹrọnụ onyẹ ebọn Livaị arịa? A marịnghọ m n'ọ maghọ ku oku ọhụnma. Ọ rị nwan ụzọ lala d'e kunrun i; ọ hụn ị, ẹfọ sikọ d'a sụọ a ụsụọ.

¹⁵ I jẹnkọ d'a rị a gwa a oku, e ye ẹ ihiẹn o sikọ d'e ku. M jẹnkọ e yeni ụnụ ẹbụọ ẹka ku oku, gwazịkwọ ụnụ ihiẹn ụnụ jẹnkọ e mẹ.

¹⁶ Ịya k'a rị a gwa wẹ ihiẹn i ku — o k'a wụ ọnụ ị, yụ nwẹn a wụrụn'a Chuku wẹ rị e kuni, a gwa a ihiẹn o k'e ku.

¹⁷ Weri ọkpọnị i jẹnkọnị, hụn i k'e gi rụn ọrụn atụmẹnya.”

Mozizi E Kinhẹn Ijiptu

¹⁸ Ya kẹ Mozizi nọ kin azụụn d'e kunrun ọgọ a wụ Jẹtro hụn w'a kpọzị Rẹwuẹlụ, sị a, “Nị m laburu ndị nke m imẹ alị Ijiptu, nị m lele kẹ o nwọnghọzị onyẹ rị ndụn imẹ wẹ.” Jẹtro nọ sị a, “Jẹnmẹ nwan. Ijẹn ẹwẹrẹ.”

¹⁹ Ogẹn ahụn Mozizi gi rị alị Midianị, Osolobuẹ sị a, “Lakin Ijiptu, nị ndị ile te chọ nị wẹ gbu i a nwụnchanrịngụọ.”

²⁰ Ya kẹ Mozizi nọ nwan weri nwunyẹ ẹ lẹ ụmụ a ẹbụbụọ. Wẹ ẹbụbụọ wụ ikẹnnyẹ. O bu wẹ che elu jaki, buli, shikọ alị Ijiptu. O gihụ ọkpọ Osolobuẹ ahụn ẹka.

²¹ Osolobuẹ nọ sịzị Mozizi “I ruzi alị Ijiptu, hụnkwọ a nị ị nọ idẹnya eze rụnchanrịn ọrụn atụmẹnya ile m ye i ikẹn rụn. Kanị m jẹnkọ d'a kpọkin ẹ obi, amamgbe ọ nị ndị Izrẹlụ la.

²² Ogẹn hụ, y'a sị a, ‘Lee ihiẹn Osolobuẹ ku: Izrẹlụ wụ okẹnnyẹ ibuzọ m.’

²³ M sị ị, ‘Hatu nwa m n'ọ la kẹni ọ hụn ụzọ fe m’ y'a jụ; m jẹnkọ nwan d'e gbu okẹnnyẹ ibuzọ ị.”

Kẹ Mozizi Dọn Kwa Nwa A Ugun

²⁴ Kẹ wẹ jẹnkọ alị Ijiptu, ebe wẹ kụsị nị wẹ ranhịn imẹ uhinhin, Osolobuẹ nọ bịa d'e kunrun Mozizi, chọma n'o gbu ẹ.

²⁵ Kanị Zipora nwunyẹ ẹ nọ gi ọmụma tụ nkọ wẹ gi e be ihiẹn kwa nwa a ugun ozigbo. Ọ nọ we ihiẹn o bepụha mẹtụ Mozizi ụkụ, sị, “Di m gi ẹdeke gbarị k'ị wụ nwan.”

²⁶ Ya kẹ Osolobuẹ nọ hatu Mozizi. Ogẹn ahụn kẹ Zipora gi gi ufiri ugun hụ sị “Di wẹ gi ẹdeke gbarị”.

Osolobuẹ E Wegbama Mozizi Lẹ Ẹrọnụ

²⁷ Osolobuẹ gwa Ẹrọnụ sị, “Shi imẹ atụ d'e kunrun Mozizi.” Ya kẹ ọ nọ jẹn d'e kunrun Mozizi Ugu Osolobuẹ, dide ẹ.

²⁸ Ya kẹ Mozizi nọ gwachanrịn Ẹrọnụ ihiẹn ile Osolobuẹ zi ẹ d'e ku lẹ ọrụn atụmẹnya ile ọ sị a d'a rụnghọsị wẹ nị wẹ gi wẹ kweri.

²⁹ Ya kẹ Mozizi lẹ Ẹrọnụ nọ shi alị Ijiptu. Wẹ nọ kpọkikomẹ ndị-isi Izrẹlụ;

³⁰ Ẹrọnụ nọ gwachanrịn wẹ ihiẹn ile Osolobuẹ gwa Mozizi. Ya Mozizi nọ rụn ọrụn atụmẹnya ndị hụ idẹnya ndị Izrẹlụ,

³¹ wẹ nọ kweri. Ogẹn wẹ gi nụ nị Osolobuẹ a bịagụọ d'a tụnị wẹ ụya, lẹni ọ hụngụọ ụya wẹ rị e ri, wẹ nọ kụnị Osolobuẹ isi alị.